ស្ត្រីម្នាក់កំពុងកាត់សម្អាតត្រី ដើម្បីធ្វើប្រហុកនៅក្នុងស្រុកពញាឮ កាលពីថ្ងៃទី ១៤ ខែធ្នូ ២០២១។ ហុង មិនា
រដ្ឋបាលជលផលនៃ ក្រសួងកសិកម្ម រុក្ខាប្រមាញ់ និងនេសាទ ណែនាំដល់ប្រជាពលរដ្ឋដែលតែងតែនិយមធ្វើត្រីប្រហុក ឬផ្អក សម្រាប់បរិភោគ អាចរួសរាន់ធ្វើចាប់ពីថ្ងៃទី ៩ ខែមករានេះតទៅ ស្របពេលដែលការប្រមូលផលនេសាទក្នុងអំឡុងខែនេះ ទទួលបានទិន្នផលច្រើន។
សេចក្តីជូនដំណឹងរបស់រដ្ឋបាលជលផល ចុះថ្ងៃទី ៦ ខែមករានេះ បានជម្រាបជូន សាធារណជនឱ្យបានជ្រាបថា ក្នុងរដូវនេសាទឆ្នាំ ២០២១-២០២២ នេះ បន្ទាប់ពីបានធ្វើការសង្កេតតាមដាន កម្ពស់ទឹកដែលហូរចេញពីបឹងទន្លេសាប ពិនិត្យឃើញថា គន្លងដាយនៅតាមដងទន្លេសាប ក្នុងភូមិសាស្ត្រខេត្តកណ្តាល និងរាជធានីភ្នំពេញ អាចបន្តនេសាទត្រីបានច្រើន ចាប់ពីថ្ងៃទី ៩ ដល់ថ្ងៃទី ១៤ ខែមករា ឆ្នាំ ២០២២ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។
យោងលើស្ថានភាពដូចបានជម្រាបជូនខាងលើ រដ្ឋបាលជលផលបានណែនាំប្រជាពលរដ្ឋដែល មានបំណង ធ្វើប្រហុក ផ្អក ឬត្រីឆ្អើរ សម្រាប់ទុកបរិភោគប្រចាំឆ្នាំនោះ សូមអញ្ជើញមកទិញត្រីឱ្យបានរួសរាន់ តាមពេលវេលា និងទីកន្លែងដូចបានជម្រាបជូនខាងលើ។
ចំពោះករណីនេះ រដ្ឋបាលជលផលសូមសំណូមពរដល់អាជ្ញាធរមូលដ្ឋាន និងសមត្ថកិច្ចពាក់ព័ន្ធ មេត្តាជួយបង្កលក្ខណៈងាយស្រួលជូនដល់បងប្អូនប្រជាពលរដ្ឋក្នុងការធ្វើដំណើរ ស្នាក់នៅ និងដឹកជញ្ជូនផលិតផលផលនេសាទបានដោយរលូនតាមការគួរ។ ទន្ទឹមនឹងនេះ រដ្ឋបាលជលផលក៏សូមសំណូមពរដល់បងប្អូនប្រជាពលរដ្ឋ មេត្តា អនុវត្តតាមការណែនាំរបស់ក្រសួងសុខាភិបាលអំពីវិធានការការពារមេរោគកូវីដ ១៩ ឱ្យបានខ្ជាប់ខ្ជួនផងដែរ។
ពាក់ព័ន្ធរដូវសម្បូរត្រីនេះ រដ្ឋបាលជលផល ក៏បានធ្លាប់បានណែនាំពលរដ្ឋឱ្យធ្វើប្រហុក ផ្អក ទុកផងដែរ កាលពីថ្ងៃទី ១២ ដល់ថ្ងៃទី ១៦ ខែធ្នូ ឆ្នាំ ២០២១ កន្លងទៅ៕
