អង្គការ WCS និងអាជ្ញាធរពាក់ព័ន្ធ រួមទាំងសហគមន៍នេសាទចុះកិច្ចព្រមព្រៀងពីសប្តាហ៍មុន។ រូប WCS
ភ្នំពេញៈ អង្គការសមាគមអភិរក្សសត្វព្រៃកម្ពុជា WCS គ្រោងដាក់ឯកសារច្បាប់ ស្តីពីការសុំចុះបញ្ជីសហគមន៍នេសាទចំនួន ៥ ទៅក្រសួងកសិកម្ម រុក្ខាប្រមាញ់ និងនេសាទនៅសប្តាហ៍ទី ៣ នៃខែកុម្ភៈនេះ បន្ទាប់ពីបានចុះកិច្ចព្រមព្រៀងពីទីកន្លែងនេសាទ និងមានការទទួលស្គាល់ពីអាជ្ញាធរមូលដ្ឋានកាលពីសប្តាហ៍មុន។
លោក សោម ស៊ីថា ប្រធានគម្រោងអភិរក្សប្រចាំខេត្តកោះកុង និងទន្លេសាបនៃអង្គការសមាគមអភិរក្សសត្វព្រៃកម្ពុជា WCS ថ្លែងនៅថ្ងៃទី ៨ ខែកុម្ភៈថា ក្នុងសប្តាហ៍កន្លងទៅ អង្គការ WCS សហការជាមួយនាយកដ្ឋានអភិវឌ្ឍន៍សហគមន៍នេសាទនៃរដ្ឋបាលជលផលបានរៀបចំពិធីចុះកិច្ចព្រមព្រៀងកន្លែងនេសាទសហគមន៍ចំនួន ៥ ដើម្បីគ្រប់គ្រង និងអភិរក្សធនធានជលផល ជាពិសេសអណ្តើកហ្លួង និងក្រពើត្រីប្រកបដោយនិរន្តរភាព។ ក្រោយពីចុះកិច្ចព្រមព្រៀងជាមួយអាជ្ញាធរមូលដ្ឋានរួចអង្គការ គ្រោងដាក់លិខិតផ្លូវច្បាប់នោះទៅកាន់ក្រសួងកសិកម្ម រុក្ខាប្រមាញ់ និងនេសាទនៅសប្តាហ៍ក្រោយ។ លោកថ្លែងថា៖ «ឥឡូវនេះយើងដល់ដំណាក់កាលចុងក្រោយ បន្ទាប់ពីយើងចុះកិច្ចព្រមព្រៀងកន្លែងនេសាទរបស់សហគមន៍មួយៗជាមួយអាជ្ញាធរ ជាមួយស្រុកដឹងឮអស់ហើយយើងនឹងជូនលិខិតហ្នឹងទៅក្រសួងកសិកម្ម រុក្ខាប្រមាញ់ និងនេសាទ ដើម្បីចុះបញ្ជីស្របច្បាប់របស់សហគមន៍ទាំង ៥ ហ្នឹង»។
លោកបញ្ជាក់ថា សហគមន៍នេសាទទាំង ៥ ដែលគ្រោងស្នើសុំចុះបញ្ជីនោះមាន ទី ១ សហគមន៍នេសាទអភិវឌ្ឍន៍ទឹកប៉ោងអូរជ្រៅមានសមាជិកចូលរួមសរុបចំនួន ៤៩២ នាក់ (ស្រី ១៨៨ នាក់) ស្ថិតក្នុងឃុំបឹងព្រាវ ស្រុកស្រែអំបិល គ្របដណ្ដប់លើផ្ទៃដី ១៧៦,៥០ ហិកតា។ ទី ២ សហគមន៍នេសាទសាលាម្នាង មានសមាជិកចូលរួម ១៧៨ នាក់ (ស្រី ៧៨ នាក់) ស្ថិតក្នុង ឃុំបឹងព្រាវ ស្រុកស្រែអំពិល គ្របដណ្ដប់លើផ្ទៃដី ៨១ ហិកតា។
ទី ៣ សហគមន៍នេសាទព្រះអង្គកែវមានសមាជិកចូលរួម ៤៩៧ នាក់ (ស្រី ២៥៧ នាក់ )ស្ថិតក្នុងឃុំដងពែង ស្រុកស្រែអំបិល គ្របដណ្ដប់លើផ្ទៃដី ៧៥០ ហិកតា។ ទី ៤ សហគមន៍នេសាទបាក់អង្រុត មានសមាជិកចូលរួម ៣៣៣ នាក់ (ស្រី ១៨២ នាក់) ស្ថិតក្នុងឃុំដងពែង ស្រុកស្រែអំពិល គ្របដណ្ដប់លើផ្ទៃដី ៥៤០ ហិកតា និងទី ៥ សហគមន៍នេសាទសាមគ្គីព្រែកកំពង់សីលា មានសមាជិកចូលរួម ៤៦៣ នាក់ (ស្រីចំនួន ២៣៣ នាក់) មាន ៤ ភូមិ ក្នុងឃុំកំពង់សិលា និងឃុំចំការហ្លួង ស្រុកកំពង់សិលា ខេត្តព្រះសីហនុ គ្របដណ្ដប់លើផ្ទៃដី ៤៦៦ ហិកតា។
លោក ទី យោង មេឃុំដងពែង ស្រុកស្រែអំបិល ថ្លែងនៅថ្ងៃទី ៨ ខែកុម្ភៈថា កាលពីអាទិត្យមុនខាងអង្គការ WCS និងអ្នកជំនាញខាងរដ្ឋបាលជលផលខេត្តបានចុះទៅធ្វើកិច្ចព្រមព្រៀងនៅសាលាឃុំចំការហ្លួង ស្រុកកំពង់សិលា។ លោកថា ការចុះកិច្ចព្រមព្រៀងនេះ គឺដើម្បីបង្កើតកន្លែងនេសាទសម្រាប់ប្រជាពលរដ្ឋចូលរួមដើម្បីថែរក្សាសិន ហើយទៅថ្ងៃមុខនឹងចងក្រងបង្កើតជាសហគមន៍នេសាទ។
លោកថ្លែងថា៖ «គេមិនទាន់បង្កើតជាសហគមន៍នៅឡើយទេ គេគ្រាន់តែឱ្យប្រជាពលរដ្ឋហ្នឹងចែកជាក្រុមៗ ដើម្បីឱ្យជួយការពារសិនទេ ហើយគេនឹងធ្វើលក្ខខន្តិកៈអីត្រឹមត្រូវបញ្ជូនទៅក្រសួងដើម្បីបង្កើតជាសហគមន៍នេសាទពេលក្រោយ។ ឥឡូវហ្នឹងគេការពារតាមដងព្រែក ឃ្លាតពីដងព្រែកទៅ ៣០ ម៉ែត្រមាននិយាមការរបស់គេ កន្លែងខ្លះគេទុកឱ្យប្រជាពលរដ្ឋ កន្លែងខ្លះគេការពារសម្រាប់កន្លែងអណ្តើកហ្លួង»។
លោក សុញ ពៅ ប្រធានសហគមន៍បាក់អង្រុត នៅឃុំបឹងព្រាវ ស្រុកស្រែអំពិល ថ្លែងនៅថ្ងៃទី ៨ ខែកុម្ភៈថា សហគមន៍របស់លោកបានធ្វើការល្បាតថែរក្សាអភិរក្សតំបន់បាក់អង្រុតជារៀងរាល់ថ្ងៃ ដើម្បីការពារធនធានធម្មជាតិ និងជីវចម្រុះ។ អំឡុងពេលចុះល្បាតបានជួបបទល្មើសនេសាទជាច្រើន ប៉ុន្តែមិនមានអ្វីដើម្បីទប់ស្កាត់ ព្រោះសហគមន៍មិនទាន់ត្រូវបានចុះបញ្ជី ហើយគ្មានឧបករណ៍សម្ភារបច្ចេកទេសគ្រប់គ្រាន់ ចំណែកសមត្ថកិច្ចរដ្ឋបាលជលផលចុះល្បាតមានពេលកំណត់។
លោកថ្លែងថា៖ «ការល្បាតយើងជួបបទល្មើសច្រើនណាស់កំពុងផ្ទុះខ្លាំងមែនទែន ដោយសារយើងអត់ទាន់មានអីទប់ស្កាត់គាត់។ ខាងជលផល ១ ខែគាត់ចុះជាមួយខ្ញុំបាន ១ ដង ឬ ២ ដងអស់ហើយ ចំណែកពលរដ្ឋដែលគាត់ចូលរួមមានគ្រប់គ្រាន់ ប៉ុន្តែយើងអត់ទាន់មានឧបករណ៍បច្ចេកទេសផ្សេងៗ ខ្វះថវិកា និយាយរួមខ្វះគ្រប់មុខ»។
លោក សេង ប៊ុណ្ណា នាយខណ្ឌរដ្ឋបាលជលផលស្តីទីខេត្តកោះកុង ថ្លែងនៅថ្ងៃទី ៨ ខែកុម្ភៈថា កម្លាំងសមត្ថកិច្ចរដ្ឋបាលជលផលតែងឆ្លៀតទៅបង្ក្រាបបទល្មើសនេសាទដែលប្រើឧបករណ៍ឆក់ និងឧបករណ៍មួយចំនួនផ្សេងទៀត ដែលរំខានដល់ការរស់នៅរបស់អណ្តើកហ្លួង និងក្រពើត្រី។
លោកបានថ្លែងថា៖ «យើងចុះទៅជាបន្តបន្ទាប់រហូត ប៉ុន្តែយូរៗជួបម្តង បទល្មើសភាគច្រើនគឺប្រើឧបករណ៍ឆក់ ដែលពេលយើងចុះ ខ្លះក៏រត់ចោលឧបករណ៍ឆក់ អាហ្នឹងមានជួបច្រើន ក្រៅពីនោះមានមងដាក់កាត់ទទឹងព្រែក ហើយសូម្បីតែសន្ទូចដែលដាក់ទៅកៀកនឹងតំបន់អណ្តើកហ្លួងហ្នឹងក៏យើងហាមឃាត់ដែរ»៕
