ស្ត្រីម្នាក់ឈរលក់បាច់ផ្កា ក្នុងទិវាក្តីស្រឡាញ់នៅរាជធានីភ្នំពេញ នាពេលកន្លងមក។ ហេង ជីវ័ន
ក្រសួងវប្បធម៌និងវិចិត្រសិល្បៈ បានធ្វើការពន្យល់ថា ទិវានៃក្តីស្រឡាញ់នៅកម្ពុជា គួរជាឱកាសមួយក្នុងការចែកចាយ និងធានានូវក្តីស្រឡាញ់ប្រកបដោយភាពថ្លៃថ្នូរ ស្មោះសរបរិសុទ្ធ ចំពោះមនុស្សជាទីគោរពស្រឡាញ់នៅជុំវិញខ្លួន និងបានអំពាវនាវដល់មនុស្សមួយចំនួនកុំមានភាពភ័ន្តច្រឡំនឹងទិវានេះដែលធ្វើឱ្យប៉ះពាល់ដល់វប្បធម៌ ទំនៀមទម្លាប់ ប្រពៃណីជាតិ។
យោងតាមសេចក្តីណែនាំ របស់ក្រសួងវប្បធម៌ និង វិចិត្រសិល្បៈ បានឱ្យដឹងថា ថ្ងៃទី១៤ កុម្ភៈ ដែលមនុស្សមួយចំនួននិយមហៅថា ទិវានៃក្តីស្រឡាញ់ ជិតឈានចូលមកដល់ហើយ។
បច្ចុប្បន្ន ទិវានេះបាននិងកំពុងជ្រៀតចូលក្នុងសង្គមជាតិកម្ពុជា ជាពិសេសក្នុងស្រទាប់ យុវជន បណ្តាលឱ្យមនុស្សមួយចំនួនបានទទួលយក និងប្រើប្រាស់ដោយភាពភ័ន្តច្រឡំ នាំឱ្យមានផលប៉ះពាល់ដល់វប្បធម៌ ទំនៀមទម្លាប់ ប្រពៃណីជាតិរបស់យើងទៀតផង។
សេចក្តីណែនាំបានបន្តថា ក្នុងបរិការណ៍នេះប្រជាជន ជាពិសេស យុវជនកម្ពុជា ចាំបាច់ត្រូវសិក្សាស្វែងយល់ឱ្យស៊ីជម្រៅពីវប្បធម៌ប្រពៃណី ដែលជាមរតកដ៏ថ្លៃថ្លារបស់ដូនតា ព្រមទាំងឈ្វេងយល់ឱ្យបានគ្រប់ជ្រុងជ្រោយ អំពីខ្លឹមសារនៃថ្ងៃទី១៤ កុម្ភៈ ដែលជាវប្បធម៌ ទំនៀមទម្លាប់នាំចូលពីក្រៅ។
ក្រសួងវប្បធម៌និងវិចិត្រសិល្បៈ បានបញ្ជាក់ថា ទិវានៃក្តីស្រឡាញ់នៅកម្ពុជា គួរជាឱកាសមួយក្នុងការចែកចាយ និងធានានូវក្តីស្រឡាញ់ប្រកបដោយភាពថ្លៃថ្នូរ ស្មោះសរបរិសុទ្ធ ចំពោះមនុស្សជាទីគោរពស្រឡាញ់នៅជុំវិញខ្លួនយើងជាអាទិ៍ ក្រុមគ្រួសារ, ឪពុកម្តាយ, ប្ដី/ប្រពន្ធ, កូន, ចៅ និងចំពោះញាតិមិត្ត។
ប្រភពដដែលបានបន្តថា៖ «ធ្វើការចែកចាយនូវក្តីស្រឡាញ់ ដល់ក្រុមមនុស្សមួយចំនួនដូចជា ជនពិការ, កុមារកំព្រា, និងអ្នកដែលខ្សត់ខ្សោយជាងខ្លួន...ជាដើម ក្រោមរូបភាព សរសេរលិខិតជូនពរ, ការជូនអំណោយផ្សេងៗ, ការសំណេះសំណាល ឬទទួលទានអាហាររួមគ្នាដោយក្តីសោមនស្សរីករាយ តែត្រូវគោរពតាមវិធានសុខាភិបាល ដោយរក្សាគម្លាត និងនៅទីតាំងបើកចំហ»។
ក្នុងឱកាសនេះដែរ ក្រសួងវប្បធម៌ និងវិចិត្រសិល្បៈ ក៏បានអំពាវនាវដល់មាតា បិតា អាណាព្យាបាល សមត្ថកិច្ចពាក់ព័ន្ធគ្រប់លំដាប់ថ្នាក់ ជាពិសេស យុវជនចូលរួមផ្សព្វផ្សាយ, អប់រំ, ពន្យល់ណែនាំ, ក្រើនរំឭកដល់បងប្អូន, កូន, ចៅ ក្នុងគោលដៅប្រើប្រាស់ទិវានេះ ឱ្យស្របតាមគន្លងប្រពៃណីដ៏ល្អ ត្រកាលរបស់ខ្មែរដើម្បីកិត្តិយសនិងភាពថ្លៃថ្នូររបស់ខ្លួន ក្រុមគ្រួសារខ្លួន ពិសេសដើម្បីរួមចំណែក លើកកម្ពស់កិត្យានុភាពនៃសង្គមជាតិ៕
វីដេអូ៖
