កូនកន្ធាយក្បាលកង្កែប ដែលត្រូបានដោះលែងនៅខេត្តក្រចេះ។ រូបថត WCS
ក្រចេះ: អង្គការ WCS សហការជាមួយខណ្ឌរដ្ឋបាលជលផលក្រចេះនៃមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះបានលែងកូនកន្ធាយក្បាលកង្កែបចំនួន ៣៥ ក្បាលផ្សេងទៀត ចូលក្នុងទីជម្រកធម្មជាតិតាមដងទន្លេមេគង្គស្ថិតក្នុងស្រុកសំបូរ ខេត្តក្រចេះ។ នេះបើយោងតាមអង្គការ WCS នៅថ្ងៃសុក្រទី ១៨ ខែកុម្ភៈនេះ។
ពិធិលែងនេះបានរៀបចំធ្វើឡើងនៅក្នុងឃុំកំពង់ចាម ស្រុកសំបូរ ដោយមានការអញ្ជើញចូលរួមពីលោក កែន សេរីរដ្ឋា នាយកអង្គការ WCS ប្រចាំកម្ពុជា លោក អ៊ិន ហ៊ុល អនុប្រធាននាយកដ្ឋានអភិរក្សជលផល លោក ម៉ុក ពន្លក នាយខណ្ឌរដ្ឋបាលជលផលក្រចេះ ក្រុមការពារសម្បុកសហគមន៍ និងអង្គការ WCS។
កូនកន្ធាយ (ឬល្មិច) ទាំងនោះត្រូវបានក្រុមការពារសម្បុកសហគមន៍ ប្រមូលយកពីលើឆ្នេរខ្សាច់តាមបណ្តោយដងទន្លេមេគង្គក្រោយពីវាបានញាស់ចេញពីសម្បុកភ្លាម។ បន្ទាប់មក ពួកគេបានយកវាទៅចិញ្ចឹមថែទាំរយៈពេលពី ២ ទៅ ៤ សប្តាហ៍បន្តទៀត ទើបលែងចូលក្នុងទីជម្រកធម្មជាតិរបស់វាវិញ។ រៀងរាល់ឆ្នាំកន្ធាយក្បាលកង្កែបចាប់ផ្តើមបង្កកំណើតចន្លោះពីខែវិច្ឆិកា ដល់ ខែមិថុនា។ ក្នុងរដូវពងកូនឆ្នាំនេះ គិតត្រឹមពាក់កណ្តាលខែកុម្ភៈ ឆ្នាំ ២០២២ ក្រុមការពារសម្បុកសហគមន៍បានរកឃើញសម្បុកពងកន្ធាយក្បាលកង្កែបចំនួន ២៨ សម្បុកហើយ ដែលមានពងសរុបចំនួន ៨២៣ ពង។ ចំនួននេះ កើនលើស ៥០% បើធៀបទៅនឹងរដូវពងកូនឆ្នាំ ២០២០-២០២១ ក្នុងរយៈពេលដូចគ្នា។
លោក កែន សិរីរដ្ឋា ប្រធានអង្គការសមាគមអភិរក្សសត្វព្រៃកម្ពុជា WCS ថ្លែងនៅថ្ងៃទី ២០ ខែកុម្ភៈថា ក្រោយពីការលែងកូនសត្វកន្ធាយទាំងនោះមន្ត្រីជំនាញមិនបានបំពាក់ប្រព័ន្ធតាមដានលើខ្លួនរបស់ពួកវាបានទេ គ្រាន់តែល្បាតដើម្បីតាមការពារកុំឱ្យមានអ្នកលួចចាប់ ប៉ុន្តែជាការកត់សម្គាល់ ទូទៅបន្ទាប់ពីលែងកូនកន្ធាយក្បាលកង្កែបទាំងនោះភាគច្រើនគឺមានអត្រានៅរស់ច្រើន។
លោកថ្លែងថា៖ «កូនកន្ធាយក្បាលកង្កែបទាំងនោះតូចប៉ុនសម្បកគ្រំ អ៊ីចឹងវាតូចៗហើយស្តើងយើងបំពាក់អីអត់កើតទេ ប៉ុន្តែពួកហ្នឹងជាទូទៅអត់មានអ្នកណាចាប់ទេ ដោយសារតូចអ៊ីចឹងម៉េចៗវាឈ្មុលដីខ្សាច់។ ភាគច្រើនគោលដៅអ្នកដែលចង់ចាប់ គឺយកតែពួកធំៗទេ ព្រោះអាចយកទៅហូបទៅអីបាន ឬមួយក៏វាជាប់មងជាប់បង្កៃ»។
លោកប្រធាន WCS ថា ការអភិរក្សសត្វកន្ធាយក្បាលកង្កែបទាំងនេះ ព្រោះវាជាសត្វជិតផុតពូជហើយការថែរក្សានេះក៏ជាផ្នែកមួយនៃការការពារប្រព័ន្ធបរិស្ថាននៅក្នុងទន្លេមេគង្គ ដែលធ្វើឱ្យមានប្រព័ន្ធអេកូធម្មជាតិមួយដែលមានលំនឹង៕
