ស្រឡាងចម្លងអ្នកដំណើរកោះពេជ្រ-កោះនរា ឆ្លងកាត់ទន្លេបាសាក់។ រូបថត ហ្វេសប៊ុក
ភ្នំពេញៈ ចាប់ពីថ្ងៃទី ២១ ខែកុម្ភៈ ឆ្នាំ ២០២២ នេះតទៅ សាលារាជធានីភ្នំពេញ បានដាក់ឱ្យដំណើរការជាបណ្តោះអាសន្ននូវស្រឡាងចម្លងកោះពេជ្រ-កោះនរា ឆ្លងកាត់ទន្លេបាសាក់ ក្នុងព្រំប្រទល់ខណ្ឌចំការមន និងខណ្ឌច្បារអំពៅ រាជធានីភ្នំពេញ ចាប់ពីព្រឹករហូតដល់យប់។
លោក ឃួង ស្រេង អភិបាលរាជធានី-ភ្នំពេញបានចេញសេចក្តីជូនដំណឹងនាថ្ងៃទី ១៨ ខែកុម្ភៈពីការដាក់ឱ្យដំណើរការជាបណ្តោះអាសន្នស្រឡាងចម្លងកោះពេជ្រ-កោះនរា ឆ្លងកាត់ទន្លេបាសាក់ ក្នុងព្រំប្រទល់ខណ្ឌចំការមន និងខណ្ឌច្បារអំពៅ។
រដ្ឋបាលរាជធានីភ្នំពេញបានអនុញ្ញាតជូនក្រុមហ៊ុនជលយានចម្លងអរិយក្សត្រ អាន សំអន ធ្វើអាជីវកម្មស្រឡាងចម្លងអ្នកដំណើរ រួមទាំងមធ្យោបាយយានយន្តគ្រប់ប្រភេទឆ្លងកាត់ទន្លេបាសាក់ជាបណ្តោះអាសន្នចាប់ពីថ្ងៃទី ២១ ខែ កុម្ភៈ ឆ្នាំ ២០២២ នេះតទៅ ដោយចាប់ផ្តើមពីម៉ោង ៦:០០ នាទីព្រឹកដល់ម៉ោង ១៩:០០ នាទីយប់ ជារៀងរាល់ថ្ងៃ។
លោក ឃួង ស្រេង បានលើកឡើងថា៖ «ការដាក់ឱ្យដំណើរការស្រឡាងនេះជាបណ្តោះអាសន្ន ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋឆ្លងកាត់ស្ពានព្រះមុនីវង្ស ដែលតែងតែជួបប្រទះនូវការកកស្ទះចរាចរណ៍ជាញឹកញាប់ និងដោយសារតែស្ពានកោះពេជ្រ-កោះនរាកំពុងតែដំណើរការសាងសង់ផងដែរនោះ»។ លោកថា ប្រជាពលរដ្ឋអាចចូលរួមធ្វើដំណើរតាមស្រឡាងចម្លងនេះ ដើម្បីកាត់បន្ថយការកកស្ទះចរាចរណ៍នៅលើដងស្ពានព្រះមុនីវង្ស។
លោក ជា រឿន ប្រជាពលរដ្ឋដែលរស់នៅក្នុងភូមិកោះនរាបានបង្ហាញនូវក្តីសប្បាយរីករាយបន្ទាប់ពីទទួលដំណឹងពីការដាក់ឱ្យប្រើប្រាស់ស្រឡាងចម្លងនេះ ដោយសារលោកមានការធុញទ្រាន់នឹងការកកស្ទះចរាចរណ៍ដែលលោកជួបស្ទើរតែរាល់ថ្ងៃ។ លោកបានថ្លែងថា៖ «ខ្ញុំនឹងសាកល្បងជិះស្រឡាងនេះថាតើវានឹងជួយសម្រួលដល់ពេលវេលាច្រើនជាងកាលពេលដែលខ្ញុំជិះម៉ូតូតាមផ្លូវជាតិឬយ៉ាងណា។ ប្រសិនបើពេលវេលាខុសគ្នាច្រើន ខ្ញុំនឹងដូរមកប្រើស្រឡាងចម្លងនេះ ច្រើនជាងធ្វើដំណើរតាមផ្លូវជាតិវិញ»។
ចំណែកលោក ចាន់ តារា ពលរដ្ឋរស់នៅភូមិបឹងឈូក សង្កាត់និរោធខណ្ឌច្បារអំពៅ មានសុទិដ្ឋិនិយមតិចតួចប៉ុណ្ណោះទៅលើការប្រើប្រាស់ស្រឡាងសម្រាប់សម្រួលចរាចរណ៍នៅតំបន់នេះ។ លោកថា ការឡើងចុះស្រឡាងអាចចំណាយពេលរង់ចាំយូរ ដែលធ្វើឱ្យអ្នកដំណើរខ្លះ មិនអាចចាំបាន ហើយការធ្វើដំណើរតាមស្រឡាងអាចមានហានិភ័យ ប្រសិនបើមានផ្ទុកយានយន្តធំៗ និងដឹកធ្ងន់។
លោកបានប្រាប់ថា៖ «ខ្ញុំនឹងរង់ចាំមើលជាមុនសិនថា នៅពេលដាក់ដំណើរការនេះ អាចជួយកាត់បន្ថយការកកស្ទះបានកម្រិតណា ហើយសុវត្ថិភាពនៃការធ្វើដំណើរតាមស្រឡាងនេះ ត្រូវបានធានាកម្រិតណា។ យ៉ាងណាមិញខ្ញុំសូមអរគុណដល់អាជ្ញាធរ ក៏ដូចជារាជរដ្ឋាភិបាល ដែលបានពិចារណាលើបញ្ហានេះ និងបានខិតខំរកវិធីដោះស្រាយបញ្ហាកកស្ទះចរាចរណ៍នេះ»។
គួរបញ្ជាក់ផងដែរ ស្ពានខ្សែកាប្លិ៍បេតុងតភ្ជាប់ពីតំបន់អភិវឌ្ឍន៍កោះនរាទៅកាន់ទីក្រុងរណបកោះពេជ្រត្រូវបានបើកការដ្ឋានសាងសង់តាំងពីខែតុលាឆ្នាំ ២០២០ ដោយនឹងប្រើប្រាស់រយៈពេលសាងសង់ប្រមាណ ៣៥ ខែ។ ស្ពាននេះមានបណ្តោយប្រវែង ៨២៤ ម៉ែត្រ និងទទឹងប្រវែង ២៤,៥ ម៉ែត្រ និងមានសសរខ្សែកាប្លិ៍ កម្ពស់ ៦០ ម៉ែត្រចំនួន ២ ដើម ដែលមានចម្លាក់ក្បាច់ខ្មែរ៕
វីដេអូ៖
