សារអប់រំដល់ពលរដ្ឋដែលធ្វើចំណាកស្រុកពីវិធីការពារកុំឱ្យកើតជំងឺគ្រុនចាញ់នាពេលកន្លងមក។ ហុង មិនា
ភ្នំពេញៈ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលជំរុញឱ្យមានការរួមគ្នាបន្ថែមទៀតដោយមិនត្រូវបន្ធូរដៃនោះទេ ដើម្បីធ្វើយ៉ាងណាឈានទៅសម្រេចគោលដៅចុងក្រោយ ដែលគ្មានជំងឺគ្រុនចាញ់នៅក្នុងឆ្នាំ ២០២៥ បើទោះជាកម្ពុជាគ្មានតួលេខអ្នកស្លាប់ដោយសារជំងឺនេះក្នុងរយៈពេល ៤ ឆ្នាំជាប់គ្នាមកហើយក៏ដោយ។
ការថ្លែងបែបនេះបានធ្វើឡើង កាលពីថ្ងៃទី ២ ខែមីនា ក្នុងជំនួបពិភាក្សាការងាររវាងលោកស្រីជាមួយលោក Pedro Alonso ប្រធានកម្មវិធីប្រយុទ្ធជំងឺគ្រុនចាញ់ជាសកលរបស់អង្គការសុខភាពពិភពលោក អមដោយមន្ត្រី និងទីប្រឹក្សាបច្ចេកទេស អង្គការសុខភាពពិភពលោក នៃទីស្នាក់ការកណ្តាល និងថ្នាក់តំបន់នាទីស្តីការក្រសួងសុខាភិបាល។ ក្នុងឱកាសនោះ លោកស្រី ឱ វណ្ណឌីន ដែលបានសង្កត់ធ្ងន់លើកិច្ចខិតខំប្រឹងប្រែងនៃកម្មវិធីលុបបំបាត់ជំងឺគ្រុនចាញ់នៅកម្ពុជាបាននិយាយថា ដោយមានការយកចិត្តទុកដាក់ខ្ពស់បំផុតដល់សុខភាព និងសុខុមាលភាពប្រជាជនកម្ពុជា ដែលបានផ្តួចផ្តើម និងអនុម័តដាក់ឱ្យប្រើប្រាស់ជាផ្លូវការនូវយុទ្ធសាស្ត្រជាតិលុបបំបាត់ជំងឺគ្រុនចាញ់នៅក្នុងប្រទេសឆ្នាំ ២០១១-២០២៥។
យុទ្ធសាស្ត្រជាតិនេះត្រូវបានយកមកប្រើប្រាស់ និងដាក់ចេញនូវសកម្មភាព និងគោលការណ៍ណែនាំផ្សេងៗសំដៅជំរុញការងារលុបបំបាត់ជំងឺគ្រុនចាញ់យ៉ាងសកម្ម សម្រាប់ក្រុមការងារ ដៃគូ និងភ្នាក់ងារផ្តល់មូលនិធិនានា។
លោកស្រីបានបញ្ជាក់ថា៖ «ជាលទ្ធផលរយៈពេល ១០ ឆ្នាំនៃការអនុវត្តយុទ្ធសាស្ត្រជាតិលុបបំបាត់ជំងឺគ្រុនចាញ់ពីឆ្នាំ ២០១១ ដល់ឆ្នាំ ២០២១ កន្លងមកនេះឃើញថា សូចនាករអត្រាស្លាប់ដោយជំងឺគ្រុនចាញ់ត្រូវបានបញ្ចប់ គឺគ្មានអ្នកស្លាប់ដោយជំងឺនេះចាប់តាំងពីឆ្នាំ ២០១៨ មក។ នេះសបញ្ជាក់ថា កម្ពុជាសម្រេចបានជោគជ័យ ៣ ឆ្នាំ មុនគោលដៅកំណត់»។
លោកស្រី ឱ វណ្ណឌីន បានសង្កត់ធ្ងន់បន្ថែមថា៖ «ចំពោះសូចនាករ ការគ្មានជំងឺគ្រុនចាញ់ (Zero malaria) ក្នុងឆ្នាំ ២០២៥ ក៏ជាកិច្ចការដែលយើងទាំងអស់គ្នាត្រូវតែប្រឹងប្រែងរួមគ្នាជាបន្តទៀតដោយមិនបន្ធូរដៃ នៅក្នុងដំណាក់កាលចុងក្រោយ ដើម្បីឈានទៅសម្រេចបាននូវគោលដៅនេះ»។
តាមទំព័រហ្វេសប៊ុករបស់ក្រសួងសុខាភិបាលបានឱ្យដឹងថា កិច្ចប្រជុំជាមួយមន្ត្រីអង្គការសុខភាពពិភពលោក នៅពេលនេះ គឺរៀបចំឡើងក្នុងគោលបំណងពិភាក្សាលើការងារលុបបំបាត់ជំងឺគ្រុនចាញ់នៅក្នុងប្រទេសកម្ពុជាដោយបានផ្ដោតទៅលើចំណុចសំខាន់ៗជាច្រើន ដើម្បីធ្វើយ៉ាងណា ឱ្យសម្រេចបានគោលដៅគ្មានជំងឺគ្រុនចាញ់ (Zero malarie ) ក្នុងឆ្នាំ ២០២៥។
ក្នុងនោះ ក្រសួងសុខាភិបាលបានឱ្យដឹងថា កម្ពុជាត្រូវធ្វើយ៉ាងណាបន្តយកចិត្តទុកដាក់កាត់បន្ថយជំងឺគ្រុនចាញ់ទាំងប្រភេទហ្វាល់ស៊ីប៉ារ៉ូម និងប្រភេទវីវ៉ាក់ ដែលជាក់ស្តែងបានកត់សម្គាល់ឃើញថា ចំនួនករណីអត្រាឈឺជំងឺគ្រុនចាញ់បានបង្ហាញថា មានការបន្ថយរហូតដល់ ៩៧,៥% ចាប់ពីឆ្នាំ២០១១ ដល់ឆ្នាំ ២០២១។
ចំពោះជំហានចុងក្រោយនៃការលុបបំបាត់ជំងឺគ្រុនចាញ់ គឺជាដំណាក់កាលដ៏សំខាន់បំផុតនៅក្នុងការសម្រេចបាននូវគោលដៅលុបបំបាត់ជំងឺគ្រុនចាញ់នាឆ្នាំ ២០២៥ និងការរក្សានិរន្តរភាពកុំឱ្យមានការកកើតឡើងវិញនូវជំងឺគ្រុនចាញ់នៅតាមតំបន់គ្រុនចាញ់ដែលមានមុនពេលអនុវត្តកម្មវិធីលុបបំបាត់ជំងឺគ្រុនចាញ់ផង។
ក្រសួងបានបញ្ជាក់ថា៖ «បន្តកាត់បន្ថយតំបន់ឆ្លងជំងឺគ្រុនចាញ់នៅក្នុងប្រទេស៖ ដោយកាត់បន្ថយករណីឆ្លង និងករណីឈឺជំងឺគ្រុនចាញ់រហូតដល់មានការរាយការណ៍ថា គ្មានករណីឈឺជំងឺគ្រុនចាញ់ (Zero case) តាមរយៈការពង្រឹងការងារនេះនៅតាមមូលដ្ឋាននៃតំបន់ដែលមានជំងឺគ្រុនចាញ់បន្ថែមទៀត និងប្រើប្រាស់ប្រព័ន្ធតាមដានឃ្លាំមើល (MIS) ដែលជួយសម្រួលដល់ការងារ ប្រមូល និងបញ្ចូលទិន្នន័យឱ្យបានទាន់ពេលវេលា»។
តាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រកាលពីថ្ងៃទី ២២ កុម្ភៈបានឱ្យដឹងថា ជំងឺគ្រុនចាញ់ក្នុងឆ្នាំ ២០២១ មានចំនួន ៤ ២៧៩ ករណី (អត្រាអាំងស៊ីដង់ ០,២៦/១ ០០០ ប្រជាជន) គឺមានការថយចុះ ៥៤ ភាគរយ បើប្រៀបធៀបឆ្នាំ ២០២០ ។
របាយការណ៍ដដែលបានឱ្យដឹងបន្តថា ក្នុងនោះប្រភេទជំងឺគ្រុនចាញ់ហ្វាល់ស៊ីប៉ារ៉ូម (ទម្រង់សន្ធំ) និងចម្រុះ ឆ្នាំ ២០២១ មាន ៣២០ ករណី ដែលជាចំនួនកាត់បន្ថយយ៉ាងគំហុក ៦៦ ភាគរយ បើប្រៀបនឹងឆ្នាំ ២០២០ បានន័យថា ឆ្នាំ ២០២១ គឺអត្រាអាំងស៊ីដង់ប្រភេទហ្វាល់ស៊ីប៉ារ៉ូមតិចជាង ១ មាន ១០០ ភាគរយស្រុកប្រតិបត្តិ។
តាមរបាយការណ៍ដដែលនេះ ក៏បានបង្ហាញថា អត្រាអាំងស៊ីដង់ជំងឺគ្រុនចាញ់គ្រប់ប្រភេទក្នុងចំណោមប្រជាជន ១ ០០០ នាក់ តិចជាង ១ មាន ៩១ ភាគរយស្រុកប្រតិបត្តិ និងអត្រាអាំងស៊ីដង់ជំងឺធំជាង ឬស្មើ ១ នៅសល់តែ ៩ ស្រុកប្រតិបត្តិ ដែលថយចុះពីឆ្នាំ ២០២០ មាន ១១ ស្រុកប្រតិបត្តិ និងឆ្នាំ ២០១៩ មាន ២៥ ស្រុកប្រតិបត្តិ៕
