មេបញ្ជាការកងទ័ពជើងគោក កម្ពុជា-ចិន បានចុះហត្ថលេខារួមគ្នាតាមប្រព័ន្ធអនឡាញលើអនុស្សរណៈនៃការយោគយល់ស្តីពីកិច្ចសហប្រតិបត្តិការរវាងកងទ័ពជើងគោកនៃប្រទេសទាំង ២ កាលពីថ្ងៃទី ៣១ ខែមីនា ឆ្នាំ ២០២២ នៅបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ។ នាយកដ្ឋានព័ត៌មាន ក្រសួងការពារជាតិ
មេបញ្ជាការកងទ័ពជើងគោក កម្ពុជា-ចិន បានចុះហត្ថលេខារួមគ្នាតាមប្រព័ន្ធអនឡាញលើអនុស្សរណៈនៃការយោគយល់ស្តីពីកិច្ចសហប្រតិបត្តិការរវាងកងទ័ពជើងគោកនៃប្រទេសទាំង ២ កាលពីថ្ងៃទី ៣១ ខែមីនា ឆ្នាំ ២០២២ នៅបញ្ជាការដ្ឋានកងទ័ពជើងគោកនៃកងយោធពលខេមរភូមិន្ទ។
នាយកដ្ឋានព័ត៌មាន ក្រសួងការពារជាតិបានឱ្យដឹងនៅថ្ងៃទី ០១ ខែមេសា នេះថា លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានជួបពិភាក្សាទ្វេភាគីតាមប្រព័ន្ធអនឡាញជាមួយនឹងលោក លីវ ចេន លី (Liu Zhen Li) មេបញ្ជាការកងទ័ពជើងគោកនៃកងទ័ពរំដោះប្រជាជនចិន។
ក្នុងជំនួបនេះ ភាគីទាំង ២ បានសម្តែងនូវមោទនភាពចំពោះទំនាក់ទំនងមិត្តភាពប្រកបដោយការជឿទុកចិត្ត និងការគោរពគ្នាទៅវិញទៅមករួមជាមួយនឹងកិច្ចសហប្រតិបត្តិការជិតស្និទ្ធលើគ្រប់វិស័យរវាងប្រទេស និងប្រជាជនទាំង ២ កម្ពុជា-ចិន។
ទំនាក់ទំនងនងនេះបាននាំមកនូវផលប្រយោជន៍ទៅវិញទៅមក ការអភិវឌ្ឍរីកចម្រើនរួមគ្នា និងការរួមសុខរួមទុក្ខលើមូលដ្ឋាននៃភាពជាដៃគូយុទ្ធសាស្ត្រគ្រប់ជ្រុងជ្រោយ មិត្តភាពដែកថែប និងការកសាងសហគមន៍វាសនារួមកម្ពុជា-ចិន ដូចដែលស្តែងឡើងតាមរយៈ កិច្ចខិតខំប្រឹងប្រែងជួយគ្នា និងឧបត្ថម្ភគាំទ្រគ្នាទៅវិញទៅមក ក្នុងកាលៈទេសៈនៃការរាតត្បាតសកលនៃជំងឺកូវីដ ១៩ កន្លងមកនេះ។
ក្រសួងការពារជាតិ នៅក្នុងឱកាសនោះផងដែរ ភាគីទាំង ២ ក៏បានផ្លាស់ប្តូរទស្សនៈគ្នាទៅវិញទៅមកលើបញ្ហាសន្តិសុខសកល និងតំបន់ដែលកំពុងកើតមានឡើង និងបានបង្ហាញឆន្ទៈក្នុងការគាំទ្រ ជំរុញ និងលើកកម្ពស់ដល់កិច្ចសហប្រតិបត្តិការរវាងកងទ័ពជើងគោកនៃប្រទេសទាំង ២ ដើម្បីបន្តចូលរួមចំណែកថែរក្សាសន្តិភាព សន្តិសុខ ស្ថិរភាព និងវិបុលភាពសម្រាប់ទាំងអស់គ្នា។
នៅក្រោយជំនួបពិភាក្សាទ្វេភាគីនេះមេបញ្ជាការកងទ័ពជើងគោក កម្ពុជា-ចិន បានសម្រេចចុះហត្ថលេខារួមគ្នាលើអនុស្សរណៈនៃការយោគយល់ស្តីពីកិច្ចសហប្រតិបត្តិការរវាងកងទ័ពជើងគោកនៃកងយោធពលខេមរភូមិន្ទ និងកងទ័ពជើងគោកនៃកងទ័ពរំដោះប្រជាជនចិន។
ការចុះហត្ថលេខានេះក្នុងគោលបំណងដើម្បីពង្រឹងកិច្ចសហប្រតិបត្តិការ និងទំនាក់ទំនងជិតស្និទ្ធយូរអង្វែងរវាងកងទ័ពជើងគោកទាំង ២ ដោយឈរលើមូលដ្ឋានសមភាព និងផលប្រយោជន៍ទៅវិញទៅមក។
ក្រសួងការពារជាតិបានបញ្ជាក់ថា៖ «ឯកសារនេះគឺជាមូលដ្ឋានមួយដ៏សំខាន់នៅក្នុងការត្រួសត្រាយផ្លូវ ដើម្បីឈានទៅលើកកម្ពស់កិច្ចសហប្រតិបត្តិការលើវិស័យសំខាន់ៗឱ្យមានកម្រិតកាន់តែខ្ពស់ឡើងបន្ថែមទៀត ហើយព្រឹត្តិការណ៍នេះ អាចចាត់ទុកថាជាការបើកទំព័រប្រវត្តិសាស្ត្រថ្មីមួយទៀតនៃកិច្ចទំនាក់ទំនងរវាងកងទ័ពជើងគោកទាំង ២ ផងដែរ»៕
