ទិដ្ឋភាពទឹកជំនន់ជន់លិចនៅស្រុកមង្គលបុរី ខេត្តបន្ទាយមានជ័យ។ រូបថត ក្រសួងធនធានទឹក និងឧតុនិយម
បន្ទាយមានជ័យៈ យ៉ាងហោចណាស់មានស្រូវពង្រោះជាង ២ ០០០ ហិកតារបស់ប្រជាកសិករនៅក្នុងស្រុកមង្គលបុរីបាននិងកំពុងរងផលប៉ះពាល់ពីជំនន់ទឹកភ្លៀងដើមរដូវវស្សា ខណៈដែលមន្ត្រីជំនាញផ្នែកធនធានទឹក និងកសិកម្មនៃរដ្ឋបាលខេត្តបន្ទាយមានជ័យកំពុងរួមសហការគ្នារំដោះទឹកចេញពីដីស្រែ ដើម្បីសង្គ្រោះពីការខូចខាត។ នេះបើតាមការប្រាប់ឱ្យដឹងពីមន្ត្រីពាក់ព័ន្ធ។
លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យបានប្រាប់ភ្នំពេញ-ប៉ុស្តិ៍ នៅថ្ងៃទី ១៧ ខែឧសភាថា ភ្លៀងធ្លាក់ជាប់ៗគ្នាក្នុងរយៈពេល ១ សប្ដាហ៍ចុងក្រោយនេះបានបណ្តាលឱ្យលិច និងប៉ះពាល់ស្រូវពង្រោះរបស់ប្រជាពលរដ្ឋចំនួន ២ ៣៦៥ ហិកតានៅក្នុងឃុំចំនួន ៣ នៃស្រុកមង្គលបុរី។ ក្នុងនោះនៅឃុំរហាត់ទឹកបានលិចប៉ះពាល់ដំណាំស្រូវសរុប ៩៦៥ ហិកតា ខណៈឃុំអូរប្រាសាទប៉ះពាល់ដំណាំស្រូវ ៦០០ ហិកតា និងឃុំចំណោមប៉ះពាល់ដំណាំស្រូវ ៨០០ ហិកតា។
លោកបានថ្លែងថា៖ «ដំណាំស្រូវទាំងនេះអាចនឹងរងការខូចខាតមួយចំនួន ប្រសិនបើភ្លៀងនៅតែបន្តធ្លាក់ច្រើនថ្ងៃខាងមុខនេះទៀត ព្រោះបើតាមការអះអាងរបស់កសិករមួយចំនួន ស្រូវពង្រោះរបស់ពួកគេ ទើបតែដុះបានក្នុងរយៈពេលក្រោម ២ សប្ដាហ៍ និងមានកម្ពស់ប្រមាណ ១២ សង់ទីម៉ែត្រពីដីស្រែប៉ុណ្ណោះ»។
បើតាមការពន្យល់ពីលោក វណ្ណាសេដ្ឋ ដើមស្រូវដែលមានអាយុកាលជាង ១ ខែឡើងទៅ ឬស្រូវដែលកំពុងបែកគុម្ព អាចធន់ទ្រាំនឹងការលិចទឹកបានក្នុងរយៈពេលពី ៧-១០ ថ្ងៃ ហើយបន្ទាប់ពីទឹកស្រកទៅវិញ វាអាចលូតលាស់ និងផ្ដល់ទិន្នផលខ្ពស់ដូចស្រូវធម្មតា។ ប៉ុន្តែបើវាមានអាយុកាលតិចជាង ៣ សប្ដាហ៍ ហើយត្រូវទឹកលិចផុតចុង នោះវានឹងងាយរងការខូចខាត ព្រោះដើមរបស់វាខ្ចីពេក មិនអាចធន់ទ្រាំនឹងការលិចទឹកបានយូរ ដូចដើមស្រូវធំៗដែលមានអាយុជាង ១ ខែឡើងទៅនោះទេ។
លោកបានបន្តថា តាមរយៈទិន្នន័យនៃការលិចលង់ស្រូវខាងលើនេះបានបង្ហាញថា ប្រជាកសិករបានសម្រុកបង្កបង្កើនផលស្រូវ ដោយគិតត្រឹមថ្ងៃទី ១៧ ខែឧសភា ឆ្នាំ ២០២២ នេះ ការដាំដុះស្រូវដើមរដូវវស្សាសម្រេចបាន ៣៥ ភាគរយនៃផែនការដាំដុះលើផ្ទៃដី ២៥២ ៣០០ ហិកតា។ នេះបើតាមទិន្នន័យដែលទទួលបានពីមន្ទីរកសិកម្ម រុក្ខាប្រមាញ់ និងនេសាទ។
លោកបានបន្តថា ប៉ុន្មានថ្ងៃមកនេះ ក្រុមការងាររបស់លោកបានសហការជាមួយក្រុមការងារនៃមន្ទីរធនធានទឹកបានចល័តគ្រឿងចក្រចុះកាយប្រឡាយមួយចំនួន ដើម្បីរំដោះទឹកពីដីស្រែរបស់កសិករក្នុងឃុំទាំង ៣។ បច្ចុប្បន្ន ស្ថានភាពទឹកក្នុងដីស្រែទាំងនោះបានចាប់ផ្ដើមស្រកបន្តិចហើយ។
ថ្វីបើយ៉ាងដូច្នេះក្ដី លោក វណ្ណាសេដ្ឋ បានអំពាវនាវដល់កសិករ ដែលមានដីស្រែរងការជន់លិចទាំងអស់ បង្កើនការយកចិត្តទុកដាក់ចុះថែទាំដំណាំស្រូវរបស់ខ្លួន ដោយត្រូវបោចសម្អាតស្មៅពីក្នុងស្រែ កាយភ្លឺស្រែ ឬប្រើម៉ាស៊ីនបូមទឹក រំដោះទឹកចេញពីស្រែណាដែលលិចដោយជំនន់ទឹកភ្លៀង។ ចំពោះស្រែដែលនៅទីទួលខ្ពស់ងាយប្រឈមខ្វះទឹកនៅពេលមានកូនរដូវប្រាំងកើតឡើងត្រូវរៀបចំលើកភ្លឺស្រែទប់ទឹករក្សាទុកក្នុងស្រែឱ្យបានល្អ។
ជុំវិញករណីនេះ ប្រជាកសិករនៅឃុំចំណោមស្រុកមង្គលបុរី លោក អ៊ូ ម៉ៅ អាយុ ៥៣ ឆ្នាំបានប្រាប់ភ្នំពេញប៉ុស្តិ៍ថា នៅពេលនេះគាត់កំពុងបារម្ភពីស្រូវពង្រោះរបស់គាត់ចំនួន ២,៥ ហិកតា ដែលកំពុងប៉ះពាល់ពីជំនន់ទឹកភ្លៀងលិចអស់ពេល ៣ ថ្ងៃមកហើយ គិតត្រឹមថ្ងៃទី ១៧ ខែឧសភា ។
លោកថា៖ «ពេលនេះទឹកបានចាប់ផ្ដើមស្រក ហើយស្រូវពង្រោះរបស់ខ្ញុំ ដែលដាំបានជាង ២០ ថ្ងៃមកនោះ វាបានលិចចុងផុតពីទឹកហើយ ប៉ុន្តែខ្ញុំនៅតែបារម្ភ ព្រោះដើមវានៅតូចនៅឡើយ ហើយភ្លៀងនៅតែបន្តធ្លាក់ក្នុងកម្រិតមធ្យម»។
បើតាមលោក អ៊ូ ម៉ៅ ស្រូវដែលគាត់បានដាំសម្រាប់ដើមរដូវវស្សានេះ មិនមែនជាស្រូវឡើងទឹកនោះទេ តែជាប្រភេទស្រូវសែនក្រអូប ដែលមិនប្រកាន់រដូវ ដែលអាចប្រមូលផលបានចន្លោះពី ៩៥ ថ្ងៃទៅ ១០៥ ថ្ងៃ ហើយលោកបានសាបព្រោះដាំដុះវាតាំងពីចុងខែមេសាមកម្ល៉េះ និងរំពឹងថា អាចច្រូតកាត់នៅចុងខែកក្កដាខាងមុខ ប្រសិនបើគ្មានគ្រោះធម្មជាតិទេនោះ។
ចំណែកលោកអ្នកស្រី គង់ សុភាព មេឃុំរហាត់ទឹកបានប្រាប់ភ្នំពេញប៉ុស្តិ៍ថា គ្រួសារអ្នកស្រីក៏បានសាបព្រោះ ដាំដុះស្រូវប្រភេទនេះលើផ្ទៃដីជាង ២ ហិកតាផងដែរ ហើយវាក៏បានរងផលប៉ះពាល់ពីជំនន់ទឹកភ្លៀងនេះដែរ ប៉ុន្តែមិនលិចផុតចុងទេ ដោយសារនៅលើទីទួលខ្ពស់ជាងគេបន្តិច។
អ្នកស្រីបានថ្លែងថា៖ «នៅក្នុងឃុំរបស់ខ្ញុំ ស្រូវដែលកំពុងរងផលប៉ះពាល់ដោយជំនន់ទឹកភ្លៀងនេះគឺមានរហូតដល់ ៩៦៥ ហិកតា ក្នុងនោះមានខ្លះលិចផុតចុង និងខ្លះទៀតមិនលិចផុតចុងនោះទេ។ ប៉ុន្តែពួកយើងទាំងអស់គ្នាគឺមានក្ដីព្រួយកង្វល់ដូចគ្នា ព្រោះស្រូវពួកវាមិនស្ទុះងើបឡើងតាមទឹក ដូចប្រភេទស្រូវធ្ងន់ [ស្រូវឡើងទឹក ឬស្រូវប្រកាន់រដូវ] នោះទេ»។
ជុំវិញក្ដីព្រួយកង្វល់នេះ លោក ឡាយ ពុទ្ធី អនុប្រធានមន្ទីរធនធានទឹកខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា នៅពេលនេះស្ថានភាពទឹកក្នុងដីស្រែប្រជាកសិករនៅក្នុងឃុំទាំង ៣ ខាងលើនេះបានស្រកជាបណ្ដើរៗហើយ បន្ទាប់ពីក្រុមការងាររបស់លោកបានប្រើគ្រឿងចក្រជីកកាយផ្ដាច់ប្រឡាយមេធំៗចំនួន ៣ កន្លែង រួមមាន ប្រឡាយចារ ប្រឡាយពោធិ៍ ២ ដើម និងប្រឡាយក្រម៉ល ព្រមទាំងប្រព័ន្ធអូរមួយចំនួន ដើម្បីរំដោះទឹកចេញពីដីស្រែប្រជាកសិករក្នុងតំបន់នោះកាលពីថ្ងៃទី ១៥ ឧសភា។
លោកបានបញ្ជាក់ថា៖ «ថ្វីបើនៅពេលនេះមេឃនៅបន្តភ្លៀង ប៉ុន្តែទឹកនៅក្នុងដីស្រែប្រជាកសិករក្នុងឃុំចំណោម ឃុំរហាត់ទឹក និងឃុំអូរប្រាសាទ បានចាប់ផ្ដើមស្រកជាបន្តបន្ទាប់ហើយ បន្ទាប់ពីក្រុមការងារយើងខ្ញុំបានប្រើគ្រឿងចក្រកាយបើកមុខទឹកជាច្រើនកន្លែងឱ្យហូរស្រុងចាក់ទៅស្ទឹងសិរីសោភ័ណ និងបន្តឱ្យចាក់ទៅបឹងទន្លេសាបតាមប្រព័ន្ធព្រែកនានារួចមក។ វានឹងស្រកត្រឡប់ទៅរកសភាពដើមវិញ ប្រសិនបើ ២-៣ ថ្ងៃខាងមុខនេះមេឃរាំងភ្លៀង»។
យោងតាមការព្យាកររបស់ក្រសួងធនធានទឹក និងឧតុនិយម ដែលភ្នំពេញប៉ុស្តិ៍ទទួលបាននៅព្រឹកថ្ងៃទី ១៧ ខែឧសភាបានបង្ហាញថា ភ្លៀងនឹងបន្តធ្លាក់ដល់ថ្ងៃទី ២៤ ខែឧសភាខាងមុខនេះ ក្នុងកម្រិតពីបង្គួរទៅច្រើន ក៏ប៉ុន្តែមិនគ្របដណ្ដប់លើផ្ទៃប្រទេសនោះទេ គឺមានធ្លាក់ច្រើនដោយកន្លែង ពិសេសនៅតំបន់ភ្នំនិងខ្ពង់រាបភាគពាយព្យ៕
វីដេអូ៖
