សួនប៉ោយប៉ែតតេជោ ឈ្នះ ឈ្នះ ស្ថិតក្នុងខេត្តបន្ទាយមានជ័យ ត្រូវបានប្រារព្ធពិធីបើកការដ្ឋានសាងសង់ កាលពីថ្ងៃទី ១៩ ខែឧសភា ដោយគ្រោងប្រើប្រាស់ថវិកាជិត ១០ ម៉ឺនដុល្លារ ដែលទទួលបានពីសប្បុរសជនចូលរួមជាមួយអាជ្ញាធរក្រុងមានលោក យ៉ាង គីមហ៊ុយ ជាអាជីវករ និងសប្បុរសជនមួយចំនួនទៀត ដើម្បីចំណាយក្នុងការស្ថាបនាគម្រោងសួនថ្មីមួយនេះ។
យោងតាម លោក គាត ហ៊ុល អភិបាលក្រុងប៉ោយប៉ែត បានសរសេរលើបណ្តាញសង្គមហ្វេសប៊ុក របស់លោកថា សួនប៉ោយប៉ែតតេជោ ឈ្នះ ឈ្នះ នេះប្របតាមបណ្តោយផ្លូវជាតិលេខ ៥ ប្រវែងជាង ២៥០ ម៉ែត្រ ស្ថិតនៅភូមិគីឡូលេខ ៤ សង្កាត់ផ្សារកណ្ដាល ក្នុងទីប្រជុំជនក្រុងប៉ោយប៉ែត ដែលជាសមិទ្ធផលថ្មីសន្លាងមួយក្នុងចំណោមសទ្ធិផលនានា នៅក្នុងទីក្រុងប៉ោយប៉ែតនេះ។
លោកបានលើកឡើងថា៖ «សួនប៉ោយប៉ែតតេជោ ឈ្នះ ឈ្នះ គ្រោងប្រើប្រាស់ថវិកាជិត ១០ ម៉ឺនដុល្លារ ដែលទទួលបានពីសប្បុរសជនចូលរួមជាមួយអាជ្ញាធរក្រុង ដើម្បីចំណាយក្នុងការស្ថាបនាគម្រោងសួនថ្មីមួយនេះ»។
សូមបញ្ជាក់ថា សួនប៉ោយប៉ែតតេជោ ឈ្នះ ឈ្នះ ត្រូវបានលិចជារូបរាងឡើងបន្ទាប់មានការសម្របសម្រួលរវាងអាជ្ញាធរក្រុង និងប្រជាពលរដ្ឋដែលបានតាំងលំនៅលើចំណីផ្លូវសាធារណៈក្នុងរយៈពេលកន្លងមកដោយពួកគាត់យល់ព្រមរុះរើដោយស្ម័គ្រចិត្តចេញពីទីតាំងនេះ ដើម្បីឱ្យអាជ្ញាធរធ្វើការអភិវឌ្ឍតំបន់នេះទៅជាប្រយោជន៍សាធារណៈរួម៕
