សៀមរាបៈ វគ្គវិក្រឹតការពិសេសមគ្គុទេសក៍ទេសចរណ៍តំបន់សៀមរាប-អង្គរ ដែលត្រូវបានរៀបចំឡើងដោយអាជ្ញាធរជាតិអប្សរា សហការជាមួយក្រសួងទេសចរណ៍ជូនដល់មគ្គុទ្ទេសក៍ទេសចរណ៍ចំនួន ៤៩ នាក់ បានបិទបញ្ចប់ដោយជោគជ័យនៅសាលសន្និសីទអង្គរនៃអាជ្ញាធរជាតិអប្សរា កាលពីថ្ងៃទី ១៦ ខែមិថុនានេះ។
វគ្គវិក្រឹតការពិសេសមគ្គុទេសក៍ទេសចរណ៍តំបន់សៀមរាប-អង្គរនេះ មានរយៈពេល ១០ ថ្ងៃ ដែលបានចាប់ពីថ្ងៃទី ៧ ដល់ថ្ងៃទី ១៦ ខែ មិថុនា ឆ្នាំ ២០២២។ នេះបើយោងតាមអាជ្ញាធរជាតិអប្សរា។
លោក ប៉ាក់ សុខុម រដ្ឋលេខាធិការក្រសួងទេសចរណ៍ ដែលតំណាងឱ្យលោក ថោង ខុន រដ្ឋមន្ត្រីក្រសួងទេសចរណ៍បានសំណូមពរឱ្យមគ្គុទេសក៍ទេសចរណ៍ដែលបានសិក្សាវគ្គវិក្រឹតការពិសេសនេះ ជួយចែករំលែកបទពិសោធ ចំណេះដឹងល្អៗឱ្យគ្នាទៅវិញទៅមក ដោយអ្នកចេះច្រើនបង្ហាញអ្នកចេះតិច ដែលនេះជាកុសលល្អ ដែលអាចជំរុញវិស័យទេសចរណ៍កាន់តែរីកចម្រើនឡើង។
លោក ឡុង កុសល អគ្គនាយករងតំណាង លោក ហង់ ពៅ អគ្គនាយកអាជ្ញាធរជាតិអប្សរាបានរំពឹងថា មេរៀនដែលអ្នកជំនាញអាជ្ញាធរជាតិអប្សរា ក៏ដូចជាក្រសួងទេសចរណ៍ បានផ្តល់ជូនដល់សិក្ខាកាមទាំងអស់គ្នានោះ គឺជាចំណេះដឹងថ្មីៗ ជាពិសេសលទ្ធផលនៃការស្រាវជ្រាវផ្នែកបុរាណវិទ្យា និងជំនឿអរូបីនៅក្នុងតំបន់អង្គរ ដែលជាព័ត៌មានជាក់លាក់បែបវិទ្យាសាស្រ្ត ទុកជាទុនបន្ថែមសម្រាប់បង្ហាញដល់ភ្ញៀវទេសចរ។
លោកក៏បានសំណូមពរដល់សិក្ខាកាម និងភាគីពាក់ព័ន្ធមានការសហការល្អជាមួយគ្នា យកគ្នាធ្វើជាដៃគូពិភាក្សា ទោះបីបំពេញការងារខុសគ្នា ក៏ប៉ុន្តែអ្វីដែលសំខាន់ គឺមានគោលដៅ និងការចូលរួមចំណែកក្នុងការអភិវឌ្ឍវិស័យទេសចរណ៍ទាំងអស់គ្នា។
សិក្ខាកាម អ្នកស្រី អៃ ផារីណាន មគ្គុទេសក៍ទេសចរណ៍ភាសាបារាំង មកពីសមាគមខ្មែរអង្គរបានឱ្យដឹងថា ក្រោយពេលចូលសិក្សាវគ្គវិក្រិតការរយៈពេល ១០ ថ្ងៃមកនេះ គាត់ទទួលបានចំណេះច្រើន ហើយអ្វីដែលមិនធ្លាប់ដឹងពីមុន ឥឡូវបានទទួលមកបំពេញចន្លោះខ្វះខាតកន្លងមក និងយល់ដឹងពីទិន្នន័យការស្រាវជ្រាវថ្មីៗដែលអាជ្ញាធរជាតិអប្សរាបង្ហាញតាមការដ្ឋាននានាក្នុងតំបន់រមណីយដ្ឋានអង្គរ ពិសេសតួនាទីរបស់អាជ្ញាធរជាតិអប្សរា។ អ្នកស្រី អៃ ផារីណាន នឹងយកចំណេះនេះ ទៅបង្ហាញជូនដល់ភ្ញៀវទេសចរដែលអ្នកស្រីដឹកនាំទស្សនាក្នុងតំបន់អង្គរផង។
សិក្ខាកាមមួយរូបទៀត លោក សឿន សារុន ជាអនុប្រធានសហគមន៍មគ្គុទ្ទេសក៍ទេសចរណ៍អង្គរ បានបង្ហាញសេចក្តីរីករាយដែលបានចូលរួមក្នុងវគ្គវិក្រិតការពិសេសនេះ។ លោកឱ្យដឹងថា វគ្គវិក្រិតការនេះ ជួយសម្រួចនូវជំនាញមគ្គុទេសក៍ទេសចរណ៍ ដើម្បីយកទៅផ្សព្វផ្សាយដល់ភ្ញៀវទេសចរបរទេស ជាពិសេសចំណេះដឹងថ្មីៗពីការធ្វើកំណាយស្រាវជ្រាវនៅប្រាសាទលលៃ ប្រាសាទព្រហ្មកិល និងការបកស្រាយសិលាចារឹកមួយចំនួនទៀត ដែលចំណុចសំខាន់ៗទាំងនេះ បានបង្កើនចំណេះដឹងបន្ថែមទៀត។
លើសពីនោះ លោក សឿន សារុន យល់ថា វគ្គវិក្រិតការពិសេសនេះ ពិតជាសំខាន់សម្រាប់មគ្គុទេសក៍ក្នុងការបន្ថែមចំណេះដឹងកាន់តែប្រសើរឡើង។
សិក្ខាកាមក៏បានសំណូមពរឱ្យអាជ្ញាធរជាតិអប្សរា និងក្រសួងទេសចរណ៍ រៀបចំកម្មវិធីដ៏មានសារៈសំខាន់នេះឡើងនាពេលអនាគតជាបន្តបន្ទាប់ទៀត សម្រាប់ឱ្យមគ្គុទ្ទេសក៍ទេសចរណ៍មានឱកាសចូលរួមសិក្សាក្នុងវគ្គវិក្រិតការពិសេសនេះ ទទួលបានចំណេះដឹងថ្មីៗមានភាពច្បាស់លាស់ ដើម្បីផ្សព្វផ្សាយទៅកាន់ភ្ញៀវទេសចរកាន់តែទូលំទូលាយ៕
