ភ្នំពេញៈ ស្ថានទូតអូស្រា្តលី ជួយគាំទ្រដល់មហោស្រពភាពយន្តអន្តរជាតិកម្ពុជា លើកទី ១១ (The 11th CIFF) ខណៈកម្មវិធីឆ្នាំ ២០២២ នេះ គឺជាឆ្នាំដ៏សំខាន់ សម្រាប់ខួប ៧០ ឆ្នាំ នៃទំនាក់ទំនងការទូត រវាងប្រទេសអូស្រ្តាលី និងកម្ពុជា។
បើតាមសេចក្តីប្រកាសព័ត៌មាន របស់ស្ថានទូតអស្រ្តាលីប្រចាំកម្ពុជា បានឱ្យដឹងថា៖ «យើងជាដៃគូដ៏សំខាន់ របស់មហោស្រពភាពយន្តអន្តរជាតិកម្ពុជា Cambodia International Film Festival ក្នុងឆ្នាំនេះ។ វាជាឆ្នាំដ៏សំខាន់មួយ សម្រាប់យើង ខណៈដែលយើងកំពុងប្រារព្ធខួបទី ៧០ ឆ្នាំ នៃទំនាក់ទំនងការទូតរវាងប្រទេសអូស្ត្រាលី និងកម្ពុជា។ យើងរង់ចាំមើលទាំងអស់គ្នានូវភាពយន្តអូស្ត្រាលីផ្សេងៗគ្នា ពីគ្រប់សម័យកាលនៃទំនាក់ទំនងនេះ បញ្ចាំងក្នុងរោងភាពយន្ត»។
ស្ថានទូតអូស្រ្តាលីប្រចាំនៅកម្ពុជា រង់ចាំស្វាគមន៍ ផលិតករភាពយន្តជនជាតិ ខ្មែរ-អូស្ត្រាលី អ្នកនាង Allison Chhorn ផលិតករភាពយន្តជនជាតិអូស្ត្រាលី លោក James Gerrand និងអ្នកវាយតម្លៃ និងថែរក្សាភាពយន្ត Richard Kuipers មកកាន់មហោស្រពភាពយន្តនេះ។
កម្មវិធីមហោស្រពភាពយន្តអន្តរជាតិកម្ពុជាលើកទី ១១ នឹងសម្ពោធ នៅថ្ងៃអង្គារ ទី ២៨ ខែមិថុនា វេលាម៉ោង ៥ និង ៣០ នាទីល្ងាច នៅសាលសន្និសីទចតុមុខ រាជធានីភ្នំពេញ។
លោក ជា សុភាព នាយកប្រតិបត្តិ បុប្ផាណា មានប្រសាសន៍ថា៖ «ដោយសារតែចំពេលនៃការប្រារព្ធធ្វើពិធីខួប ៧០ ឆ្នាំ នៃទំនាក់ទំនងការទូតរវាងប្រទេសអូស្ត្រាលី និងកម្ពុជា ទើបស្ថានទូតអូស្រ្តាលីប្រចាំកម្ពុជា បានគាំទ្រកម្មវិធីមហោស្រពភាពយន្តអន្តរជាតិកម្ពុជាលើកទី ១១ នេះ ដើម្បីរឹតបន្តឹងចំណងមិត្តភាពកម្ពុជា-អូស្ត្រាលី ថែមមួយកម្រិតទៀត ទៅលើវិស័យសិល្បៈវប្បធម៌ ជាពិសេសវិស័យឧស្សាហកម្មភាពយន្ត តួយ៉ាងផលិតករជាតិអូស្រ្តាលី លោក James Gerrand ដែលបានថតកុនខ្មែរក្នុងទសវត្សរ៍ទី ៧០ និងមានកញ្ញា Allison Chhorn គឺជាផលិតករ ភាពយន្តជនជាតិខ្មែរ-អូស្ត្រាលី និងជាសិល្បករពហុជំនាញ ដែលនឹងចូលរួមជាមួយយើងលើកដំបូងនៅឆ្នាំនេះ»។
លោក ជា សុភាព បានបន្ថែមថា តាមរយៈកម្មវិធីមួយឈ្មោះថា Panorama of Australian Cinema features Cambodia-Australian គឺជាកិច្ចសហការផ្នែកផលិតកម្មភាពយន្ត ដូចជាករណីភាពយន្តរឿង «Buoyancy» គឺជាភាពយន្តអូស្ត្រាលី ឆ្នាំ ២០១៩ ដែលដឹកនាំដោយផលិតករភាពយន្ត ជនជាតិអូស្ត្រាលី លោក Rodd Rathjen ជាដើម។
លោកបន្តថា៖ «តែយើងក៏នៅមានខ្សែភាពយន្ត ដែលមានគុណភាពល្អ និងផលិតនៅអំឡុងពេល ៧០ ឆ្នាំ នៃទំនាក់ទំនងការទូតរវាងប្រទេសអូស្ត្រាលី និងកម្ពុជា ចំនួនប្រមាណ ១៦ រឿងទៀតដែរ។ កម្មវិធីនេះ វានឹងក្លាយវេទិកាវិស័យភាពយន្តដ៏ធំមួយនៅតំបន់អាស៊ីអាគ្នេយ៍ និងជាឱកាសសម្រាប់ទស្សនិកជនកម្ពុជាអាចឃើញ និងយល់ដឹងពី អូស្រ្តាលីបានច្រើនដូចជា វប្បធម៌ មនុស្ស និងទេសភាពនានា»។
លោក Andreas Zurburgg ជាភារធារីស្ថានទូតអូស្រ្តាលី មានប្រសាសន៍ថា៖ «មិនខុសពីផ្នែកផ្សេងៗនៅក្នុងឧស្សាហកម្មច្នៃប្រឌិតទេ មហោស្រពភាពយន្ត ត្រូវបានរងការប៉ះពាល់ ដោយសារតែជំងឺកូវីដ ១៩ ក្នុងរយៈពេល២ឆ្នាំកន្លងមកនេះ។ យើងរីករាយ ដែលកម្មវិធីមហោស្រពភាពយន្តអន្តរជាតិកម្ពុជា បានវិលត្រឡប់មកវិញនៅក្នុងឆ្នាំនេះ សម្រាប់ការប្រារព្ធលើកទី ១១»។
លោកបន្តថា ដើម្បីអបអរសាទរខួប ៧០ ឆ្នាំ នៃទំនាក់ទំនងការទូតរវាងប្រទេសអូស្ត្រាលី និងកម្ពុជា ស្ថានទូតអូស្ត្រាលី នឹងមានចាក់បញ្ចាំងភាពយន្តអូស្រ្តាលីប្រហែល ២០ រឿង ដែលបានផលិតនៅអំឡុងឆ្នាំ ១៩៥២ ដល់ឆ្នាំ ២០២២។
ខ្សែភាពយន្តទាំងនេះ រួមមានភាពយន្តទាក់ទងនឹងសហគមន៍ និងភាពយន្តអប់រំ ដែលបង្ហាញពីបញ្ហានានាស្តីពីបរិស្ថាន និងការការគ្រប់គ្រងទឹកទន្លេមេគង្គ កសិកម្ម ក្រុមជនជាតិដើមភាគតិច និងសមភាពយេនឌ័រ។
ជាមួយគ្នានេះ ឯកអគ្គរាជទូត Pablo Kang បានថ្លែងថា លោកមានកិត្តិយ ដែលបានប្រគល់ពានរង្វាន់ទេពកោសល្យ CIFF ឆ្នាំ ២០២២ ជូនយុវជន សំ ហេង (Sarm Heng ) ជាតារាសម្តែងខ្មែរវ័យក្មេងក្នុងភាពយន្តអូស្ត្រាលី រឿង«Buoyancy» ក្នុងកម្មវិធីសន្និសីទសារព័ត៌មាន មហោស្រពភាពយន្តអន្តរជាតិកម្ពុជា កាលពីថ្ងៃទី ១៥ ខែមិថុនា ឆ្នាំ ២០២២ នៅសាលសន្និសីទនៃសណ្ឋាគាររ៉ូសវូដភ្នំពេញ។
លើសពីនេះ ក៏មានកញ្ញា Allison Chhorn គឺជាផលិតករភាពយន្តជនជាតិ ខ្មែរ-អូស្ត្រាលី និងជាសិល្បករពហុជំនាញ ដែលការងារនាង គឺស្វែងយល់ពីប្រធានបទទាក់ទងនឹង ជនភៀសខ្លួន ការផ្លាស់លំនៅ និងការប៉ះទង្គិចផ្លូវចិត្ត។
កញ្ញា Allison Chhorn ជាកូនស្រី ដែលមានឪពុកម្តាយជាជនចំណាកស្រុក ចេញពីប្រទេសកម្ពុជា ដើម្បីភៀសខ្លួនពីរបបខ្មែរក្រហម នាពាក់កណ្តាលទសវត្សរ៍ទី ៨០ ហើយបានធំធាត់នៅភាគខាងត្បូង នៃប្រទេសអូស្ត្រាលី និងបានបញ្ចប់ការសិក្សាពីកម្មវិធី Visual Arts នៅសាកលវិទ្យាល័យ South Australia ក្នុងឆ្នាំ ២០១៤។
កញ្ញា Allison Chhorn នឹងមកចូលរួមកម្មវិធីមហោស្រពភាពយន្ត អន្តរជាតិកម្ពុជា (CIFF)ក្នុងឆ្នាំនេះ ហើយនឹងចូលរួមក្នុងកិច្ចសន្ទនា ស្តីពីស្ត្រីក្នុងវិស័យភាពយន្ត រួមជាមួយនឹងផលិតករភាពយន្តស្ត្រី ជាច្រើនរូបទៀតមកពីអាស៊ីអាគ្នេយ៍៕