លោក សុន ឆ័យ អនុប្រធានគណបក្សភ្លើងទៀន។ រូបថត សហការី
ភ្នំពេញៈ សាលាដំបូងរាជធានីភ្នំពេញបានកោះហៅ លោក សុន ឆ័យ អនុប្រធានគណបក្សភ្លើងទៀនឱ្យចូលបំភ្លឺនៅថ្ងៃទី ១២ និងទី ១៥ ខែកក្កដា ពាក់ព័ន្ធនឹងបណ្តឹងរបស់គណៈកម្មាធិការជាតិរៀបចំការបោះឆ្នោត (គជប) និងបណ្តឹងរបស់គណបក្សប្រជាជនកម្ពុជា (CPP) ជុំវិញការលើកឡើងពីភាពមិនប្រក្រតីនៃការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី ៥ កាលពីថ្ងៃទី ៥ ខែមិថុនា។
លោក សុន ឆ័យ ដែលទើបវិលត្រឡប់មកពីបរទេសបានថ្លែងថា លោកនឹងចូលទៅបំភ្លឺទៅតាមការកោះហៅរបស់តុលាការ។
លោក ប្លង់ សុផល អ្នកនាំពាក្យ អយ្យការអមសាលាដំបូងរាជធានីភ្នំពេញប្រាប់ភ្នំពេញប៉ុស្តិ៍នៅថ្ងៃទី ៤ កក្កដា ថា តំណាងអយ្យការបានកោះហៅលោក សុន ឆ័យ ព្រមទាំងមេធាវីការពារសិទ្ធិ ដើម្បីចូលមកឆ្លើយបំភ្លឺ ចំពោះមុខដើម្បីស្តាប់ចម្លើយនៅថ្ងៃទី ១៥ ខែកក្កដាវេលាម៉ោង ៩ ព្រឹកតាមបណ្តឹងរបស់គណបក្សប្រជាជនកម្ពុជា និងនៅ ថ្ងៃទី ១២ កក្កដា លើបណ្តឹងរបស់ គជប។
.jpg)
លោក ជូង ជូងី មេធាវីការពារក្តីឱ្យលោក សុន ឆ័យ ប្រាប់ភ្នំពេញ-ប៉ុស្តិ៍នៅថ្ងៃទី ៤ ខែកក្កដា ថា លោកទទួលបានដីកាកោះហៅលោក សុន ឆ័យ ទាំង ២ បណ្តឹងនេះ រួចហើយ ខណៈកូនក្តីរបស់លោកក៏បានវិលត្រឡប់ពីប្រទេសអូស្ត្រាលីមកដល់កម្ពុជាវិញហើយ ដើម្បីត្រៀមចូលទៅបំភ្លឺនៅតុលាការតាមកាលបរិច្ឆេទ ដោយមិនគេចវេះនោះទេ។ លោកក៏បានត្រៀមខ្លួនជាមួយនឹងឯកសារភ័ស្តុតាងមួយចំនួនទៀត ដើម្បីចូលទៅតតាំង និងការពារលោក សុន ឆ័យ ទៅតាមផ្លូវច្បាប់ និងតាមអ្វីដែលអាចជួយបានឱ្យអស់ពីលទ្ធភាពពាក់ព័ន្ធនឹងការចោទប្រកាន់ពីដើមបណ្តឹង ជុំវិញរឿងកូនក្តីរបស់លោក និយាយក្នុងកម្មវិធី IDEA TALK របស់សារព័ត៌មាន Cambodia Daily ពាក់ព័ន្ធទៅនឹងភាពមិនប្រក្រតីនៃការបោះឆ្នោតជ្រើសរើសក្រុមប្រឹក្សាឃុំ សង្កាត់កាលពីពេលថ្មីៗ ដែលវាជារឿងនយោបាយ។
លោកបញ្ជាក់ថា៖ «អ្វីដែលគាត់និយាយពាក់ព័ន្ធនឹងការបោះឆ្នោត វាជារឿងនយោបាយ ហើយសម្តេច សាយ ឈុំ ជាអនុប្រធានគណបក្សប្រជាជនកម្ពុជាមានតួនាទីខ្ពង់ខ្ពស់ និងជាប្រធានព្រឹទ្ធសភាដែរ ប៉ុន្តែគាត់ចាប់ថ្នាក់ លោក សុន ឆ័យ ដែលជាអ្នកនយោបាយនៅក្នុងបក្សប្រឆាំងដែលអត់មានអំណាច។ ខ្ញុំយល់ថា មិនមែនជាភាពសមប្រកបសម្រាប់ការអនុវត្តច្បាប់ក៏ដូចជាការអនុវត្តប្រជាធិបតេយ្យ និងសិទ្ធិមនុស្សនៅកម្ពុជាទេ។ លោក សុន ឆ័យ ជាអ្នកនយោបាយ គួរតែដោះស្រាយតាមបែបនយោបាយ»។
លោកបញ្ជាក់ទៀតថា គជប ក៏មិនគួរប្តឹង កូនក្តីរបស់លោកដែរពីព្រោះ គជប ជាស្ថាប័នកំពូលរបស់ជាតិ ហើយមន្ត្រីដែលទៅបំពេញតួនាទីនៅទីនេះជាមន្ត្រីសាធារណៈដែលចៀសមិនផុតពីការរិះគន់ទេ ពីព្រោះបើមិនចង់ឱ្យមានការរិះគន់ លុះត្រាតែកុំទៅបំពេញការងារនៅក្នុងស្ថាប័ននេះ។
លោក សុន ឆ័យ ប្រាប់ភ្នំពេញប៉ុស្តិ៍នៅថ្ងៃទី ៤ កក្កដាថា លោកបានវិលត្រឡប់មកដល់កម្ពុជាវិញនៅថ្ងៃទី ៣ កក្កដាដើម្បីត្រៀមចូលខ្លួនទៅឆ្លើយបំភ្លឺតាមការកោះហៅរបស់តុលាការ។ លោកថ្លែងថា៖ «តុលាការ នៅពេលដែលមានបណ្តឹង គេកោះហៅយើង ព្រោះវាជាការងារបស់គេ ប៉ុន្តែយើងសួរថា អ្នកដែលបានដាក់ពាក្យបណ្តឹងទៅហ្នឹង វាសមហេតុផលដែរឬទេ? អានេះវាជាបញ្ហា»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាប្រាប់ភ្នំពេញ-ប៉ុស្តិ៍នៅថ្ងៃទី ៤ ខែកក្កដាថា គណបក្សប្រជាជនមិនមានអ្វីដែលត្រូវចរចាជាមួយនឹងបុគ្គលណាមួយ ដែលបានចោទប្រកាន់មកលើគណបក្សប្រជាជនថា បានឃុបឃិតជាមួយ គជប ដើម្បីលួចបន្លំសន្លឹកឆ្នោតដូចលួចគោ និងលួចក្របី ដែលជាការចោទប្រកាន់មិនត្រឹមត្រូវនោះទេ។ ជាពិសេស ការចោទប្រកាន់របស់លោក សុន ឆ័យ មិនមែនជាការបញ្ចេញមតិនោះទេ។ លោកថ្លែងថា៖ «អត់មានភ័ស្តុតាងអី ចេះតែចោទ បើបណ្តែតបណ្តោយ វានឹងនាំឱ្យមានអំពើអនាធិបតេយ្យខាងនយោបាយ។ យើងត្រូវតែធ្វើតាមផ្លូវច្បាប់ ដើម្បីរកយុត្តិធម៌ឱ្យប្រជាជនមើលឃើញច្បាស់ថា គណបក្សប្រជាជនកម្ពុជាប្រកួតប្រជែងដោយស្មោះត្រង់ អត់មានទៅឃុបឃិតអ្នកណា ដើម្បីកេងបន្លំយកសន្លឹកឆ្នោតទេ»។
លោក សោម សូរីដា អ្នកនាំពាក្យ និងក៏ជាអ្នកតំណាងដើមបណ្តឹងរបស់ គជប ប្រាប់ភ្នំពេញប៉ុស្តិ៍នៅថ្ងៃទី ៤ ខែកក្កដា ថា លោកក៏ទទួលបានដីកាកោះហៅពីសាលាដំបូងរាជធានីភ្នំពេញដែរ ហើយលោក និងលោក ឌឹម សុវណ្ណារុំ សមាជិក គជប និងជាតំណាង គជប និងមេធាវីនឹងចូលទៅឆ្លើយបំភ្លឺនៅថ្ងៃទី ១១ ខែកក្កដា ពាក់ព័ន្ធនឹងការប្តឹងលើឈ្មោះ សុន ឆ័យ ពីបទបរិហារកេរ្តិ៍ជាសាធារណៈដែលបានប្រព្រឹត្តកាលពីថ្ងៃទី ៧ ខែមិថុនា ក្នុងកម្មវិធីកិច្ចសម្ភាសជាមួយសារព័ត៌មាន The Cambodia Daily។
ឆ្លើយតបទៅនឹងលោក ជូង ជូងី និង លោក សុន ឆ័យ លោក សោម សូរីដា បញ្ជាក់ថា ការប្តឹងលោក សុន ឆ័យ នេះ ព្រោះបុគ្គលនេះបានដើរហួសបន្ទាត់ក្រហម។ បើលោក សុន ឆ័យ មើលឃើញពីភាពមិនប្រក្រតីណាមួយអាចដាក់ពាក្យបណ្តឹងតាមយន្តការរបស់ គជប ដើម្បីធ្វើការដោះស្រាយ ប៉ុន្តែលោក សុន ឆ័យ មិនបានប្រើប្រាស់យន្តការនេះនោះទេ ដោយគាត់បានប្រើប្រាស់វោហារសាស្ត្របរិហារកេរ្តិ៍ និងចោទប្រកាន់ គជប ទៅវិញ។ លោកថ្លែងថា៖ «ការចោទប្រកាន់ស្ថាប័ន គជប ជាចោរ មិនមែនស្ថិតនៅក្នុងច្បាប់បោះឆ្នោតទេ ពីព្រោះស្ថាប័ននេះ គឺជាស្ថាប័នជាតិ និងត្រូវបានជ្រើសតាំងដោយរដ្ឋសភា ហើយរដ្ឋសភាក៏ជ្រើសរើសតាំងដោយឆន្ទៈពលរដ្ឋ។ អ៊ីចឹង មើលងាយស្ថាប័ន គជប គឺស្មើនឹងប្រមាថឆន្ទៈរាស្ត្រ»។
គណបក្សប្រជាជនកម្ពុជាកាលពីថ្ងៃទី ១៤ មិថុនា បានដាក់ពាក្យប្តឹងលោក សុន ឆ័យ ដោយចោទប្រកាន់ថា បំភ្លៃការពិត ចំពោះដំណើរការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ដោយស្នើសុំឱ្យតុលាការផ្តន្ទាទោសលោក សុន ឆ័យ ទៅតាមច្បាប់ និងទាមទារសំណងជំងឺចិត្ត ៤ ពាន់លានរៀល ឬស្មើនឹង ១ លានដុល្លារ។
បន្ទាប់មក នៅថ្ងៃទី ១៧ មិថុនា គជប ក៏បានដាក់ពាក្យប្តឹងលោក សុន ឆ័យ ទៅតុលាការផងដែរដោយស្នើឱ្យតុលាការដាក់ទោសលោក សុន ឆ័យ ពីបទបរិហារកេរ្តិ៍ជាសាធារណៈតាមមាត្រា ៣០៥ នៃក្រមព្រហ្មទណ្ឌ។ បន្ថែមពីនេះ គជប ស្នើដល់តុលាការត្រូវឱ្យលោក សុន ឆ័យ សុំទោស គជប ជាលាយលក្ខណ៍អក្សរ និងជាសាធារណៈ៕
