លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Kang ក្នុងពិធីប្រគល់-ទទួលវ៉ាក់សាំង។ SPM
ភ្នំពេញៈ ប្រទេសអូស្ត្រាលី បានប្រគល់វ៉ាក់សាំងបង្ការជំងឺកូវីដ ១៩ ប្រភេទ Pfizer សម្រាប់កុមារចំនួនជិត ២០ ម៉ឺនដូស នៃចំនួនដែលបានសន្យាប្រគល់សរុប ជាង ៤៨ ម៉ឺនដូសដល់កម្ពុជា។
វ៉ាក់សាំងនេះ បានដឹកមកដល់ប្រទេសកម្ពុជា នៅថ្ងៃនេះ ព្រមទាំងបានប្រគល់ជូនកម្ពុជារួចរាល់ហើយ នៅក្នុងពិធីប្រគល់-ទទួល ដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Pablo Kang។
ហ្វេសប៊ុកលោកនាយករដ្ឋមន្ត្រី ហ៊ុន សែន បញ្ជាក់នាថ្ងៃនេះថា៖ «ប្រទេសអូស្ត្រាលី បានប្រគល់វ៉ាក់សាំងបង្ការជំងឺកូវីដ ១៩ ប្រភេទ Pfizer សម្រាប់កុមារ ចំនួន ១៩៦ ៨០០ ដូស នៃចំនួនដែលនឹងប្រគល់សរុប ៤៨២ ៤០០ ដូស ដល់រាជរដ្ឋាភិបាលកម្ពុជា ដើម្បីចូលរួមទប់ស្កាត់ការរាតត្បាតជំងឺកូវីដ ១៩»។
ហ្វេសប៊ុកដដែលបញ្ជាក់ថា មកដល់ពេលនេះទាំងជំនួយ និងការបញ្ជាទិញ កម្ពុជារកបានវ៉ាក់សាំងបង្ការជំងឺកូវីដ ១៩ សរុបជិត ៥៣ លានដូស។
ក្នុងនោះនៅសល់ក្នុងឃ្លាំងប្រមាណ ៨ លានដូស។ កម្ពុជាក៏នៅមានវ៉ាក់សាំងសរុបប្រមាណ ២០ លានដូសទៀត ដែលជាជំនួយ និងជាការបញ្ជាទិញ មិនទាន់បានដឹកមកប្រទេសកម្ពុជាផងដែរ៕
