រោគសញ្ញានៃអ្នកកើតជំងឺអុតស្វា។ រូបថត ក្រសួងសុខាភិបាល
ភ្នំពេញៈ គិតត្រឹមថ្ងៃទី ០៨ ខែកក្កដា កម្ពុជាមិនទាន់មានករណីជំងឺអុតស្វានៅឡើយទេ តែទោះជាយ៉ាងណា លោក ម៉ម ប៊ុនហេង រដ្ឋមន្រ្តីក្រសួងសុខាភិបាល នៅតែធ្វើការអំពាវនាវ និងក្រើនរំលឹកដល់ប្រជាពលរដ្ឋទាំងអស់ត្រូវមានការប្រុងប្រយ័ត្នជាប់ជានិច្ច ដោយត្រូវយកចិត្តទុកដាក់អនុវត្តវិធានការបង្ការការចម្លងជំងឺផ្ទាល់ខ្លួនទៅអ្នកដទៃ ដែលអាចកើតមានឡើងជាយថាហេតុ។
លោករដ្ឋមន្រ្តីបានលើកឡើងបែបនេះ តាមរយៈសេចក្តីណែនាំក្រើនរំលឹក ពីការបង្ការការចម្លងជំងឺអុតស្វា (Monkeypox) នាថ្ងៃទី ១១ ខែកក្កដា ដោយលោកបានបន្តថា ចាប់តាំងពីថ្ងៃទី ០១ ខែមករា ដល់ថ្ងៃទី ០៧ ខែកក្កដា ឆ្នាំ ២០២២ នេះ របាយការណ៍អង្គការសុខភាពពិភពលោក បានបញ្ជាក់ពីករណីអុតស្វាមានចំនួន ៧ ៨៩២ និងស្លាប់ ៣ នាក់។
ចំនួនឆ្លងនិងស្លាប់នេះ ត្រូវបានរាយការណ៍ពី ៦៣ ប្រទេស ក្នុងតំបន់ចំនួន ៥ របស់អង្គការសុខភាពពិភពលោក (តំបន់អាមេរិក អាហ្វ្រិក អឺរ៉ុប មេឌីទែរ៉ាណេខាងកើត និងអាស៊ីប៉ាស៊ីហ្វិកខាងលិច) ក្នុងនោះ ៩៨ ភាគរយនៃករណីអុតស្វា កើតមានពីថ្ងៃទី ១២ ខែ ឧសភា ឆ្នាំ ២០២២។
បើតាមការរាយការណ៍បង្ហាញថា ការរាតត្បាតនៃជំងឺអុតស្វាបន្តកើតមានជាចម្បងលើបុរសដែលរួមភេទជាមួយបុរសជាមួយដៃគូថ្មី ឬច្រើននាពេលថ្មីៗនេះ។
ខណៈពេលដែលការស៊ើបអង្កេតអេពីដេមីសាស្ត្រអំពីការរាតត្បាតកំពុងបន្ត ករណីជំងឺអុតស្វាដែលបានរាយការណ៍ភាគច្រើន គឺតាមរយៈការប្រើប្រាស់សេវាសុខភាពផ្លូវភេទ ឬសេវាសុខភាពផ្សេងទៀត នៅតាមគ្រឹះស្ថានថែទាំសុខភាពបឋម ឬមន្ទីរពេទ្យ។
ពាក់ព័ន្ធនឹងការការពារពីជំងឺអុតស្វានេះ លោក ម៉ម ប៊ុនហេង បានអំពាវនាវដល់មន្ត្រីប្រចាំការនៅច្រកចេញ-ចូលអន្តរជាតិត្រូវយកចិត្តទុកដាក់ពិនិត្យមើលឱ្យបានហ្មត់ចត់នូវអ្នកដំណើរចូលមកកម្ពុជា ប៉ុន្តែមិនទាន់មានការហាមឃាត់អ្នកដំណើរមកពីប្រទេសណាមួយ ចូលមកកម្ពុជានោះទេ គ្រាន់តែសូមឱ្យមានការប្រុងប្រយ័ត្ននិងតាមដានស្ថានភាពអ្នកដំណើរប៉ុណ្ណោះ។
លោកបានបន្តថា៖ «បុគ្គលដែលធ្វើដំណើរទៅកាន់ប្រទេសដែលមានករណីឆ្លងជំងឺ ត្រូវមានការប្រុងប្រយ័ត្នខ្ពស់ និងអនុវត្តវិធានការបង្ការដូចជា រក្សាអនាម័យផ្ទាល់ខ្លួនកម្រិតខ្ពស់, ត្រូវចៀសវាងប៉ះពាល់ផ្ទាល់ជាមួយនឹងដំបៅលើស្បែកមនុស្ស ក៏ដូចជាវត្ថុ ឬរបស់របរដែលអ្នកជំងឺប្រើប្រាស់, ចៀសវាងប៉ះពាល់សត្វស្លាប់ ឬរស់ ដែលអាចផ្ទុកវីរុសអុតស្វា ឬមេរោគផ្សេងៗទៀត និងត្រូវបរិភោគចំណីអាហារឆ្អិនល្អជាដើម»។
ចំពោះបុគ្គលិកសុខាភិបាល លោក ម៉ម ប៊ុនហេង ក៏បានធ្វើណែនាំដោយសូមឱ្យធ្វើការលើកកម្ពស់ការយល់ដឹង និងការអប់រំអ្នកកំដរអ្នកជំងឺ ត្រូវធ្វើជាចាំបាច់ដើម្បីទប់ស្កាត់ និងបញ្ឈប់ការចម្លងបានទាន់ពេលវេលា ដោយត្រូវតែអនុវត្តវិធានការការពារផ្ទាល់ខ្លួនយ៉ាងម៉ឺងម៉ាត់ និងមានការប្រុងប្រយ័ត្ន ដោយមានការគ្រប់គ្រង ការចម្លងរោគឆ្លងនៅក្នុងមន្ទីរពេទ្យឱ្យបានត្រឹមត្រូវ។
គួរបញ្ជាក់ផងដែរថា បុគ្គលដែលអាចសង្ស័យថា ខ្លួនកើតជំងឺអុតស្វា មានរោគសញ្ញាដូចជា ចេញកន្ទួលរមាស់បែបពងទឹកនៅលើផ្ទៃមុខ ដងខ្លួន បាតដៃ បាត ជើង ឬប្រដាប់ភេទ អមដោយរោគសញ្ញាក្តៅខ្លួនលើសពី ៣៨,៥ អង្សាសេ និងមានឈឺក្បាល ហើមកូនកណ្តុរ ឈឺ សាច់ដុំនិងខ្លួនប្រាណ ឈឺចង្កេះ អស់កម្លាំងខ្លាំង រួមជាមួយនឹងប្រវត្តិធ្វើដំណើរទៅកន្លែងដែលមានកើតជំងឺអុតស្វាផងដែរ៕
