កំពង់ស្ពឺៈ មជ្ឈមណ្ឌលសកម្មភាពកំចាត់មីនកម្ពុជាបានរៀបចំពិធីអបអរសាទរខួបលើកទី៣០ របស់ខ្លួន (មិថុនា ១៩៩២- មិថុនា ២០២២) និងពិធីបំពាក់ឋានន្ដរស័ក្ដិកងយោធពលខេមរភូមិន្ទជូនមន្ត្រីCMAC ចូលនិវត្តន៍កាលពីថ្ងៃទី ៤ ខែសីហា នៅវិទ្យាស្ថានបច្ចេកទេសសកម្មភាពមីន ខេត្តកំពង់ឆ្នាំង។
លោក ហ៊ុន ម៉ាណែត អគ្គមេបញ្ជារងកងយោធពលខេមរភូមិន្ទ និងជាមេបញ្ជាការកងទ័ពជើងគោកបានធ្វើជាអធិបតីក្នុងពិធីនោះ។
លោកបានកោតសរសើរចំពោះវីរភាពអង្គអាចក្លាហានរបស់មន្ត្រីអង្គភាព CMAC ដែលបានលះបង់ពេលវេលា សេចក្តីសុខផ្ទាល់ខ្លួន ក្នុងការចូលរួមបោសសម្អាតសំណល់យុទ្ធភណ្ឌមិនទាន់ផ្ទុះ ដែលបានបន្សល់ទុកក្នុងសង្គ្រាមនៅកម្ពុជា។
លោកបានលើកឡើងថា៖ «គ្រាប់មីនកប់ក្នុងដីដ៏ច្រើន ស្លាកស្នាមនៃពិការភាព ការបាត់បង់អាយុជីវិត និងទុក្ខសោករបស់កុមារកំព្រារាប់ពាន់នាក់ ដែលកម្ពុជាបានហែលឆ្លងកាត់នាពេលកន្លងមក គឺជាតឹកតាង និងមេរៀនដ៏ឈឺចាប់ ដែលយើងទាំងអស់គ្នាត្រូវចងចាំជានិច្ច និងមិនត្រូវបំភ្លេចឡើយ»។
លោកមេបញ្ជាការកងទ័ពជើងគោក ក៏បានចូលរួមរំលែកនូវការសោកស្តាយចំពោះអ្នកដោះមីន ដែលបានទទួលរងរបួសនិងពលី ក្នុងអំឡុងពេលប្រតិបត្តិការបោសសម្អាតមីនរបស់ពួកគេ និងសូមផ្តាំផ្ញើសួរសុខទុក្ខដល់ក្រុមគ្រួសាររបស់អស់លោក លោកស្រីទាំងអស់នោះផងដែរ។
យោងតាម CMAC បានឱ្យដឹងថា ក្រោយកិច្ចព្រមព្រៀងសន្ដិភាពទីក្រុងប៉ារីសកាលពីថ្ងៃទី ២៣ ខែ តុលា ឆ្នាំ ១៩៩១ កម្លាំងនាំមុខរបស់អង្គការសហប្រជាជាតិនៅកម្ពុជា (UNAMIC) បានមកដល់កម្ពុជានៅថ្ងៃទី ៩ ខែ វិច្ឆិកា ឆ្នាំ ១៩៩១។ អ្វីដែលសំខាន់របស់បេសកកម្ម UNAMIC គឺត្រូវសម្របសម្រួលជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ដើម្បីធ្វើការសម្របសម្រួលការធ្វើមាតុភូមិនិវត្តន៍ និងរៀបចំទីលំនៅថ្មីសម្រាប់ជនភៀសខ្លួនកម្ពុជាពីជំរំជនភៀសខ្លួនតាមព្រំដែនកម្ពុជា-ថៃជាដើម។
ពេលនោះ UNAMIC ក៏បានបង្កើតកងអនុសេនាតូចដោះមីនចំនួន៣កងមានកម្លាំងចំនួន ១០០ នាក់ ដើម្បីបង្កើតអង្គភាពអប់រំពីគ្រោះថ្នាក់ដោយសារមីន និងធ្វើការបោសសម្អាតមីន។ ការបោសសម្អាតមីនពេលនោះសំដៅគ្រាន់តែបើកផ្លូវសុវត្ថិភាពបន្ទាន់ៗបំផុតតែប៉ុណ្ណោះ ដើម្បីធានាសុវត្ថិភាពការវិលត្រលប់របស់ជនភៀសខ្លួន។
ក្រោមការគ្រប់គ្រងរបស់ UNTAC និងដោយមានការគាំទ្រពីឧត្តមក្រុមប្រឹក្សាជាន់ខ្ពស់ (SNC) កងអនុសេនាតូចដោះមីនទាំងបីកងរបស់UNAMIC បានក្លាយជាអង្គភាពហ្វឹកហ្វឺនបោសសម្អាតមីន (MCTU) នៅខែមេសា ឆ្នាំ១៩៩២ ដែលមានមូលដ្ឋាននៅខេត្តសៀមរាប ព្រមទាំងបានពង្រីកកម្លាំងដោះមីនរហូតដល់ ៤៦ កងអនុសេនាតូច មានអ្នកដោះមីនសរុបប្រមាណ ១ ៥០០ នាក់។
រហូតមកដល់ថ្ងៃទី ១០ ខែ មិថុនា ឆ្នាំ ១៩៩២ ក្រុមប្រឹក្សាជាតិជាន់ខ្ពស់ក៏បានអនុម័តសំណើសុំបង្កើតមជ្ឈមណ្ឌលសកម្មភាពកំចាត់មីនកម្ពុជា ក្នុងគោលដៅអនុវត្តកិច្ចប្រតិបត្តិការបោសសម្អាតមីន និងការអប់រំពីមីន។
កិច្ចប្រជុំលើកដំបូងរបស់ក្រុមប្រឹក្សាភិបាល CMAC ត្រូវបានធ្វើឡើងនៅក្នុងខែវិច្ឆិកា ឆ្នាំ ១៩៩២។ ក្រុមប្រឹក្សាភិបាលអង្គភាព CMAC នាពេលនោះដឹកនាំដោយព្រះករុណាព្រះបាទសម្ដេច ព្រះនរោត្តម សីហនុ ព្រះបរមរតនកោដ្ឋ ដែលមានសមាសភាពតំណាងមកពីក្រុមប្រឹក្សាជាតិជាន់ខ្ពស់ និងការិយាល័យតំណាងពិសេស នៃអគ្គលេខាធិការអង្គការសហប្រជាតិផងដែរ។ ក្រោយមកនៅខែសីហា ឆ្នាំ ១៩៩៣ UNTAC បានបញ្ចប់បេសកកម្មរបស់ខ្លួននៅកម្ពុជា អ្នកដោះមីនរបស់ MCTU ត្រូវបានធ្វើសមាហរណកម្មមកក្នុងអង្គភាព CMAC ដែលធ្វើឱ្យអង្គភាពCMACមានបុគ្គលិកសរុបចំនួនប្រមាណ ២ ០០០ នាក់។
មន្ត្រីបុគ្គលិកនៃអង្គភាព CMAC បានថ្លែងអំណរអរគុណចំពោះលោកនាយករដ្ឋមន្ត្រីហ៊ុន សែន លោក ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកហ៊ុន ម៉ាណែត ដែលបានអនុញ្ញាតឱ្យកម្លាំងស៊ីម៉ាក់បានចូលក្របខ៏ណ្ឌកងយោធពលខេមរភូមិន្ទ ប្រយោជន៍ដើម្បីទទួលបានរបបសោធន។
នៅក្នុងឱកាសនោះផងដែរ កម្លាំងស៊ីម៉ាក់ចំនួន ២៥០ នាក់ ដែលបានបញ្ចូលក្របខ័ណ្ឌកងយោធពលខេមរភូមិន្ទរួចរាល់ហើយនោះទទួលបានកិត្តិយសការបំពាក់ឋានន្ដរស័ក្ដិពីសំណាក់លោកហ៊ុន ម៉ាណែតផងដែរ៕
