លោកនាយករដ្ឋមន្ដ្រី ហ៊ុន សែន ថ្លែងនាពេលកន្លងទៅ។ រូបថត SPM
ភ្នំពេញៈ លោកនាយករដ្ឋមន្ដ្រី ហ៊ុន សែន បានបញ្ជាឱ្យលុបចោលរាល់ការផ្ដល់សេវាអ៊ីនធឺណិតផ្ដាច់មុខនៅតាមបុរីក្នុងរាជធានីភ្នំពេញ និងអនុញ្ញាតឱ្យប្រតិត្ដិករផ្សេងៗទៀតអាចផ្ដល់សេវានេះដោយសេរី ខណៈក្រសួងប្រៃសណីយ៍ និងទូរគមនាគមន៍កំពុងដោះស្រាយបញ្ហាសេវាទូរស័ព្ទខ្សោយនៅតាមបុរីផងដែរ។ នេះបើតាមលោក ជា វ៉ាន់ដេត រដ្ឋមន្ដ្រីក្រសួងប្រៃសណីយ៍ និងទូរគមនាគមន៍។
លោក ជា វ៉ាន់ដេត ថ្លែងក្នុងសន្និសីទសារព័ត៌មានពី «សមិទ្ធផលសម្រេចបានរយៈពេល ៥ ឆ្នាំកន្លងមករបស់ក្រសួងប្រៃសណីយ៍ និងទូរគមនាគមន៍» ពីថ្ងៃទី ៤ ខែសីហាថា ការដោះស្រាយបញ្ហាគុណភាពសេវាទូរស័ព្ទរចល័ត និងសេវាអ៊ីនធឺណិតនៅតាមបុរី លោកបានបង្កើតក្រុមការងារ ៨ ក្រុម ដើម្បីចុះពិនិត្យតាមបុរីជាង ១០០ នៅភ្នំពេញ ពេលនេះកំពុងធ្វើតាមបុរីជាង ៦០ សល់ពីនោះនឹងបន្តធ្វើនៅដំណាក់កាលទី ២។
លោកថ្លែងថា៖ «យើងបានដឹងជំងឺទាំងអស់ (បញ្ហាសេវាទូរស័ព្ទ អ៊ីនធឺណិតនៅក្នុងបុរី)។ ខ្ញុំបានយកបុរីប៉េងហួត ដើម្បីធ្វើជាគំរូទៅដល់បុរីផ្សេងៗទៀត។
អ៊ីចឹង ឆ្លៀតឱកាសនេះមុនខ្ញុំមកទីនេះ (ក្នុងសន្និសីទសម្ដេចតេជោ ហ៊ុន សែន ប្រមុខរាជរដ្ឋាភិបាលបានបញ្ជាខ្ញុំថា រាល់កន្លែងទាំងអស់ដែលមានសិទ្ធិផ្ដាច់មុខអ៊ីនធឺណិតនៅក្នុងបុរីលុបចោលទាំងអស់។ អាហ្នឹងគឺលុបចោលអត់មានឱ្យទៀតទេ»។
លោកបន្តថា៖ «អ៊ីចឹងសូមឱ្យប្រតិបត្តិករទាំងអស់យល់ដឹងអាហ្នឹង។ សូមឱ្យនិយតករទូរគមនាគមន៍អនុវត្តប្រសាសន៍ដឹកនាំរបស់សម្ដេចអត់មានផ្ដាច់មុខទៀតទេ។ ត្រូវចូលប៉ុន្មានក៏ចូលទៅ ៣-៤-៥-៦-១០ ឡើងទៅ ប៉ុន្ដែចូលទៅតាមលទ្ធភាពដែលមាន»។
លោកបានឱ្យដឹងថា ម្ចាស់បុរីប៉េងហួតបានសហការល្អហើយដឹងអំពីបញ្ហាខ្សោយសេវាអ៊ីនធឺណិត និងសេវាទូរស័ព្ទ ពីព្រោះសូម្បីម្ចាស់បុរីក៏អត់សេវាដែរ។
លោកបន្តថា៖ «អាហ្នឹងរឿងអីគាត់មិនសហការ ហើយគាត់ចង់ឱ្យយើងធ្វើឱ្យបានល្អ។ គាត់ក៏ត្រូវប្រជាជនជេរ ក្រសួងក៏ត្រូវប្រជាជនជេរ ប៉ុន្ដែប្រតិបត្តិករក៏ប្រជាជនជេរខ្លាំងដែរតែធ្វើមិនដឹង ធ្វើមិនឮ។ អ៊ីចឹងឥឡូវយើងធ្វើម៉េចបុរីប៉េងហួត ព្រោះ ១ ម៉ឺនគ្រួសារជាង (ប្រជាពលរដ្ឋរស់នៅក្នុងបុរីទាំងអស់)»។
លោក វ៉ាន់ដេត បានឱ្យដឹងថា ក្រុមការងាររបស់ក្រសួងបានចូលទៅធ្វើតេស្តស្ទង់សេវានៅបុរីប៉េងហួតទាំងអស់គឺបានឃើញសញ្ញាបង្ហាញពណ៌លឿង ទាំងអស់គឺបានន័យថា គ្មានសេវាទូរស័ព្ទទាំងអស់។ ក្នុងបុរីមានបង្គោលអង់តែនសេវាទូរស័ព្ទតិចតួចបំផុត ប៉ុន្ដែបុរីប៉េងហួតមានដីសម្រាប់សាងសង់បន្ថែម។ ប៉ុន្ដែបុរីខ្លះអត់ គឺមិនមានទុកទីតាំងដីសម្រាប់សាងសង់អង់តែនទូរស័ព្ទនោះទេ។
លោកបញ្ជាក់ថា៖ «អ៊ីចឹងឥឡូវយើងទៅបុរីប៉េងហួតយើងឈប់ឱ្យមានអង់តែនតែ ១ ប្រតិបត្ដិករតែ ១ ហើយ។ យើងសង់បង្គោលអង់តែន ១ ដូចដើមឈើគឺស្អាតៗណាស់ អត់មានច្រងេងច្រងាងទេ គឺមើលទៅស្អាត សម្រាប់ប្រតិបត្តិករ ៣ ឬ ៤ ទៅដាក់ឧបករណ៍ផ្ដល់សេវា»។
លោកបានឱ្យដឹងថា ៦ ខែឆ្នាំនេះក្រសួងបានសង់បង្គោលអង់តែនសេវាបន្ថែមតាមបុរីបាន ១៨ បង្គោល ដែលអាចស្មើនឹង ៦០ បង្គោលអង់តែនពីមុនហើយ ក្រោយការសាងសង់អង់តែននេះអាចឱ្យប្រតិបត្តិករបំពាក់ឧបករណ៍ទាំងអស់ និងអាចផ្ដល់សេវាគ្រប់ប្រតិបត្ដិករទូរស័ព្ទចល័ត។
ប៉ុន្ដែលោកបញ្ជាក់ថា បញ្ហាទីតាំងដែលសាងសង់អង់តែនថ្មីរួចហើយនៅតែគ្មានសេវា ប្រជាជនប្រើមិនបានគឺបណ្ដាលមកពីទី ១ ពលរដ្ឋបន្តប្រើប្រាស់ឧបករណ៍បង្កើនកម្លាំងសេវា ឬឧបករណ៍ពង្រីកសេវា និងទី ២ ប្រតិបត្ដិករជាអ្នកផ្ដល់សេវាបញ្ចេញសមត្ថភាពមិនអស់ ដើម្បីផ្ដល់សេវាដល់អ្នកប្រើ។
បើតាមរបាយការណ៍របស់ក្រសួងប្រៃសណីយ៍ បច្ចុប្បន្ននៅកម្ពុជាមានប្រតិបត្ដិករកំពុងប្រតិបត្ដិការក្នុងវិស័យទូរគមនាគមន៍ចំនួន ៦៩ ក្នុងនោះមានប្រតិបត្តិករទូរស័ព្ទចល័តចំនួន ៥។
ប្រតិបត្ដិករផ្ដល់សេវាអ៊ីនធឺណិត (ISP) មានចំនួន ៣៨។ ប្រតិបត្ដិករហេដ្ឋារចនាសម្ព័ន្ធខ្សែកាបអុបទិកលើគោក និងខ្សែកាបអុបទិកក្រោមបាតសមុទ្រមានចំនួន ៥។ រីឯស្ថានីយអង់តែនទូរស័ព្ទចល័តកំពុងប្រើប្រាស់ទូទាំងប្រទេសមាន ១១ ៤៨៩ និងបណ្ដាញខ្សែកាបអុបទិកឆ្អឹងខ្នង (Back Bone) មាន ១៩ ២៧៩ គីឡូម៉ែត្រ និងមានបណ្ដាញខ្សែកាបអុបទិកក្រោមបាតសមុទ្រក្នុងដែនសមុទ្រកម្ពុជា ៦៤០ គីឡូម៉ែត្រ។
បើតាមលោករដ្ឋមន្ដ្រីបច្ចុប្បន្នកម្ពុជាមានអ្នកប្រើប្រាស់សេវាទូរស័ព្ទចល័តទាំងអស់ចំនួន ១៩ លាន ៥០ ម៉ឺនលេខ ក្នុងចំណោមលេខទាំងនេះមានអ្នកប្រើប្រាស់ជាង ១៣ លាននាក់។ ចំណែកសេវាអ៊ីនធឺណិតចល័តមានចំនួនប្រហាក់ប្រហែល ១៧ លាននាក់។ រីឯអ្នកប្រើហ្វេសប៊ុកមាន ១៣,២ លាននាក់ ប្រើផ្ញើសារហ្វេសប៊ុក (Messenger) ជាចំនួន ១១,៩ លាននាក់ និងមានអ្នកប្រើ Instagram ចំនួន ២,៧ លាននាក់។
លោកបានថ្លែងថា លោកបានទាមទារឱ្យប្រតិបត្ដិករទូរស័ព្ទផ្ដល់ទិន្នន័យបង្គោលរបស់ខ្លួនថានៅទីតាំងណាខ្លះ? ក្រុមហ៊ុននីមួយៗមានប៉ុន្មានអង់តែន? ប៉ុន្ដែក្រុមហ៊ុនមិនបានឱ្យ។ ដូច្នេះលោកបានបង្កើតក្រុមការងារ ៥ ក្រុមចុះទៅតាមខេត្ត ហើយរកឃើញជាង ១ ម៉ឺនបង្គោលនៅទូទាំងប្រទេស។
លោកបញ្ជាក់ថា៖ «ឥឡូវខ្ញុំដឹងទាំងអស់ ចង់ចុចបង្គោលអង់តែនណានៅទីតាំងណាមានចម្ងាយពីគ្នាប៉ុន្មានម៉ែត្រ ដើម្បីយើងអាចគិតគូរដាក់បង្គោលអង់តែនបន្ថែម...»។
បើតាមលោក ជា វ៉ាន់ដេត មូលហេតុដែលប្រតិបត្ដិករមិនព្រមប្រាប់ទីតាំងបង្គោលអង់តែន ពីព្រោះបើប្រាប់ក្រសួងត្រូវឱ្យប្រតិបត្ដិករដាក់បង្គោលបន្ថែមដែលក្នុងបង្គោល ១ ត្រូវចំណាយជាង ១០ ម៉ឺនដុល្លារ។
លោកបញ្ជាក់ថា៖ «អ៊ីចឹងលទ្ធផលក្រុមហ៊ុនមួយយើងទទួលការសម្រេចពីប្រមុខរាជរដ្ឋាភិបាលសម្ដេចតេជោ ហ៊ុន សែន រួចហើយ គឺបង់ឱ្យយើង ៤០ លានដុល្លារទៀត ដោយសាររឿងលាក់បង្គោលហ្នឹង»។
លោក វ៉ាន់ដេត បានឱ្យដឹងថា បច្ចុប្បន្នការងារបន្តរបស់ក្រសួងនៅរាជធានីភ្នំពេញគឺឱ្យមន្ដ្រីទាំង ៥ ក្រុមដែលបានទិញឧបករណ៍វាស់ស្ទង់សេវាមកតម្លៃជាង ៣ លានដុល្លារបំពាក់លើរថយន្ត Driver Test ដើរធ្វើតេស្តវិសាលភាពគ្របដណ្ដប់ និងគុណភាពសេវាទូរស័ព្ទ។
លោកបញ្ជាក់ថា៖ «ដូច្នេះទើបក្រសួងស្នើសុំឱ្យពលរដ្ឋបញ្ឈប់ការប្រើប្រាស់ឧបករណ៍បង្កើនកម្លាំងសេវា ឬឧបករណ៍ពង្រីកសេវាដែលបង្កផលប៉ះពាល់យ៉ាងខ្លាំងដល់សេវាទូរស័ព្ទចល័ត បើមានឧបករណ៍ទាំងនេះយើងមិនអាចស្ទង់ដឹងថាតំបន់ណាគ្មានសេវា ដើម្បីដោះស្រាយបានទេ»៕
