មន្ត្រីជាន់ខ្ពស់នៃរាជរដ្ឋាភិបាលកម្ពុជាថា ឆ្នាំ ២០២៥ គ្មានគ្រាប់មីនរបស់កម្ពុជា គឺជាការងារដែលអាចសម្រេចបាន ប្រសិនបើពលរដ្ឋទាំងអស់គ្នាបន្តចូលរួម និងគាំទ្រដល់រាជរដ្ឋាភិបាលកម្ពុជា ក្នុងដោះស្រាយបញ្ហាគ្រាប់មីននៅកម្ពុជា។
នេះជាការលើកឡើងរបស់លោក លី ធុជ ទេសរដ្ឋមន្ត្រី និងជាអនុប្រធានទី ១ អាជ្ញាធរមីនកម្ពុជាថ្លែងឱ្យដឹងនារសៀលថ្ងៃទី ១២ ខែសីហានេះ ក្នុងពេលលោកទទួលវិភាគទាននូវថវិកាចំនួន ១០ ០០០ ដុល្លារអាមេរិកពីក្រុមហ៊ុន SOMA Group ដើម្បីដោះស្រាយបញ្ហាគ្រាប់មីននៅកម្ពុជាក្នុងគម្រោងសម្តេចតេជោ សម្រាប់សកម្មភាពមីន «ផ្តល់ដីសុវត្ថិភាព បង្កើតស្នាមញញឹម»។
លោកមានប្រសាសន៍ថា៖ «គោលដៅនៅឆ្នាំ ២០២៥ កម្ពុជាគ្មានគ្រាប់មីន គឺជាការងារដែលអាចសម្រេចបាន ប្រសិនបើយើងទាំងអស់បន្តចូលរួម និងគាំទ្រដល់រាជរដ្ឋាភិបាលកម្ពុជាក្នុងដោះស្រាយបញ្ហាគ្រាប់នៅកម្ពុជា»។
នាឱកាសនោះ លោកទេសរដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន SOMA Group ដែលបានចូលរួមដល់ការងារមនុស្សធម៌ក្នុងការជួយសង្គ្រោះប្រជាពលរដ្ឋឱ្យរួចផុតពីគ្រោះថ្នាក់ ដោយសារគ្រាប់មីន តាមរយៈកម្មវិធីសំខាន់ចំនួន ៣ ដើម្បីរួមចំណែកក្នុងគោលដៅអភិវឌ្ឍន៍ប្រកបដោយចីរភាព ការអប់រំ បរិស្ថាន និងសុខភាពអនាម័យ ព្រមទាំងបានចាត់ទុកទឹកចិត្តនេះ គឺគ្មានទំហំ និងគ្មានចំនួនទេ។
លោកស្រី ចម ក្រស្នា អគ្គនាយិកា ក្រុមហ៊ុន SOMA Group បានលើកឡើងឱ្យដឹងដែរថា ៖ «ការរួមចំណែកនេះ គឺឆ្លើយតបនឹងការអំពាវនាវរបស់សម្តេចតេជោ ក្នុងការដោះស្រាយបញ្ហាគ្រាប់មីននៅកម្ពុជា និងធ្វើឱ្យប្រទេសកម្ពុជាគ្មានមីនឆ្នាំ ២០២៥ ខាងមុខនេះ»។
លោកស្រីអគ្គនាយិកាមានសង្ឃឹមយ៉ាងមុតមាំថា កម្ពុជានឹងអាចសម្រេចបានតាមគោលដៅកំណត់ ក្នុងពេលឆាប់ៗខាងមុខនេះផងដែរ៕
