ក្រុមអ្នកនិពន្ធនៃសមាគមអ្នកនិពន្ធខ្មែរ ចុះកិច្ចព្រមព្រៀងជាមួយគណៈប្រតិភូនៃសាកលវិទ្យាល័យរបស់ថៃ លើកិច្ចសហប្រតិបត្តិការផ្នែកអក្សសាស្ត្រ និងអក្សរសិល្ប៍ នាថ្ងៃទី ២៩ សីហា។ រូបថត សហការី
ភ្នំពេញៈ សមាគមអ្នកនិពន្ធខ្មែរ នឹងក្លាយជាសមាគមអន្តរជាតិទី១ ដែលនឹងចុះអនុស្សរណៈយោគយល់លើកិច្ចសហប្រតិបត្តិការ ជាមួយសាកលវិទ្យាល័យនរេសួន នៅប្រទេសថៃ នាចុងឆ្នាំ ២០២២ ទៅលើគោលដៅរួមសំខាន់ចំនួន៣ចំណុច ពាក់ព័ន្ធកិច្ចសហប្រតិបត្តិការ លើផ្នែកអក្សរសាស្រ្ត និងអក្សរសិល្ប៍។ នេះបើតាមលោកព្រឿង ប្រណីត ជាប្រធានសមាគមអ្នកនិពន្ធខ្មែរ។
លោកប្រធានសមាគម អះអាងបែបនេះ ក្រោយពីបានទទួលស្វាគមន៍គណៈប្រតិភូមកពីថៃ ដឹកនាំដោយលោក Phaitoon Thanya ដែលជាព្រឹទ្ធបុរសនៃមហាវិទ្យាល័យសង្គមសាស្រ្ដ និងមនុស្សសាស្ត្រ នៃសាកលវិទ្យាល័យនរេសួន (Naresuan University) នៅប្រទេសថៃ កាលពីថ្ងៃទី ២៩ ខែ សីហា ឆ្នាំ ២០២២ នៅទីស្នាក់ការក្នុងវត្តបទុមវតី។
លោក ព្រឿង ប្រណីត ប្រាប់ ភ្នំពេញ ប៉ុស្តិ៍ថា៖ «ទាំង ២ ភាគីបានពិភាក្សាគ្នាពីកិច្ចសហប្រតិបត្តិការ លើការស្រាវជ្រាវវណ្ណកម្មខ្មែរ-ថៃ ការបណ្ដុះបណ្ដាលភាសាខ្មែរ ការបង្រៀន និងរៀនអក្សរសិល្ប៍ និងការសិក្សាស្រាវជ្រាវ បកប្រែវណ្ណកម្មតាមយុគសម័យនីមួយៗ»។
លោកបញ្ជាក់ថា៖ «កិច្ចសំណេះសំណាលពាក់កណ្ដាលផ្លូវការ រវាងសមាគមអ្នកនិពន្ធខ្មែរ និងសាកលវិទ្យាល័យនរេសួន ប្រទេសថៃ ជាការពិគ្រោះយោបល់ ដើម្បីឈានទៅគោលដៅកិច្ចសហប្រតិបត្តិការនៅថ្ងៃអនាគត (ចុងឆ្នាំ២០២២)»។
លោក ប្រណីត បន្តថា កិច្ចពិភាក្សានេះ បានផ្តោតលើគោលដៅរួមសំខាន់ចំនួន ៣ ចំណុច។ ទី១ ការចុះអនុស្សរណៈយោគយល់កិច្ចសហប្រតិបត្តិការ។ ទី២ ការបកប្រែវណ្ណកម្មខ្មែរទៅភាសាថៃ ឬភាសាអង់គ្លេស អាចជាភាសាផ្សេងៗ។ ទី៣ ការរៀបចំកិច្ចប្រជុំសិក្ខាសាលាស្ដីពីការសរសេររឿងខ្លីរួមគ្នា និងការស្រាវជ្រាវពីវណ្ណកម្មខ្មែរមុនសង្រ្គាម។
ការជួបសំណេះសំណាលជាមួយអ្នកនិពន្ធថៃ ដែលបានមកទស្សនកិច្ចសិក្សា នៅសមាគមអ្នកនិពន្ធខ្មែរនោះ ក៏គ្រោងពិភាក្សាចុះអនុស្សរណៈលើចំណុចមួយចំនួនទៀតផងដែរ ដូចជាការស្រាវជ្រាវអក្សរសិល្ប៍ គម្រោងបង្កើតកម្មវិធីសិក្សាតែងនិពន្ធ ការបញ្ជូនអ្នកនិពន្ធទៅរៀនវគ្គខ្លីនៅសាកលវិទ្យាល័យនរេសួន ការទំនុកបម្រុងអ្នកនិពន្ធជំនាន់ថ្មី និងការងារបកប្រែស្នាដៃអក្សរសិល្ប៍។
លោក ព្រឿង ប្រណីត បង្ហាញចំណាប់អារម្មណ៍ចំពោះជំនួបនេះថា៖ «ខ្ញុំរីករាយចំពោះគោលបំណងនៃជំនួបនេះ ព្រោះជាការប្រឹក្សា ដើម្បីព្រាងអនុស្សរណៈលើការងារស្រាវជ្រាវ ការបកប្រែវណ្ណកម្មរបស់អ្នកនិពន្ធ។ នេះជាការជួបគ្នាបង្ហាញឱ្យឃើញពីចំណងមិត្តភាពការទូតលើការសិក្សារៀនសូត្រពីគ្នាទៅវិញទៅមក និងយកចិត្តទុកដាក់លើការបណ្តុះបណ្តាលចែករំលែកចំណេះដឹង ការប្តូរនូវបទពិសោធដល់អ្នកនិពន្ធជំនាន់ថ្មី»។
លោកបន្ថែមថា៖ «ជាងនេះទៅទៀត សម្រាប់ប្រទេសទាំង ២ នឹងមានការផ្លាស់ប្ដូរវគ្គបណ្ដុះបណ្ដាលរួមគ្នា រវាងសមាគមអ្នកនិពន្ធ និងមហាវិទ្យាល័យសង្គមសាស្ត្រ និងមនុស្សសាស្ត្រនៃសាកលវិទ្យាល័យនរេសួនទៀតផង»។
លោក Phaitoon Thanya ជាព្រឹទ្ធបុរសនៃមហាវិទ្យាល័យសង្គមសាស្រ្ដ និងមនុស្សសាស្រ្តនៅសាកលវិទ្យាល័យនរេសួន ក៏បង្ហាញពីចំណាប់អារម្មណ៍ផ្ទាល់ខ្លួនផងដែរ ចំពោះការជួបសំណេះសំណាលជាមួយសមាគមអ្នកនិពន្ធខ្មែរ។
លោកថ្លែងថា៖ «តួនាទីរបស់អ្នកនិពន្ធ និងស្នាដៃ ជាជំនួយស្មារតីបុគ្គលទូទៅ យល់ពីសង្គមដែលខ្លួនរស់នៅឱ្យបានស៊ីជម្រៅ។ ដូច្នេះកិច្ចសហប្រតិបត្តិការ បណ្ដុះបណ្ដាលអ្នកនិពន្ធ និងសិក្សាស្រាវជ្រាវវណ្ណកម្មតាមយុគសម័យនីមួយៗជាអ្វីដែលភាគីទាំង ២ នឹងធ្វើរួមគ្នានាពេលអនាគត»៕
