ក្រសួងសុខាភិបាលប្រកាសហាមឃាត់ការផ្សព្វផ្សាយលក់ផលិតផល NSP OXYMETAZOLINE NASAL SPRAY ដែលគ្មានលេខបញ្ចិកា និងគ្មានការទទួលស្គាល់ពីក្រសួងសុខាភិបាល។ វេជ្ជបណ្ឌិត ឱ វណ្ណឌីន
ភ្នំពេញៈ ក្រសួងសុខាភិបាលប្រកាសហាមឃាត់ការផ្សព្វផ្សាយលក់ផលិតផល NSP OXYMETAZOLINE NASAL SPRAY ដែលគ្មានលេខបញ្ចិកា និងគ្មានការទទួលស្គាល់ពីក្រសួងសុខាភិបាល។
ក្រសួងសុខាភិបាលបញ្ជាក់ក្នុងសេចក្តីជូនដំណឹងនាថ្ងៃទី ១៦ ខែកញ្ញា ថា គណនីហ្វេសប៊ុកឈ្មោះ NSP Italy កំពុងផ្សព្វផ្សាយលក់ផលិតផលប្រភេទនេះដោយគ្មានលេខបញ្ជិកាពីក្រសួងសុខាភិបាល ហើយក្រសួងសុខាភិបាលតម្រូវឱ្យម្ចាស់គណនីហ្វេសប៊ុកនេះ រួមទាំងបុគ្គលពាក់ព័ន្ធទាំងអស់ត្រូវបញ្ឈប់ការលក់ផលិតផលនេះជាបន្ទាន់។
ក្រសួងសុខាភិបាលអំពាវនាវដល់ប្រជាពលរដ្ឋទាំងអស់មិនត្រូវទិញ និងប្រើប្រាស់ឱសថគ្រប់ប្រភេទដែលលក់តាមប្រព័ន្ធអនឡាញឡើយ ព្រោះផលិតផលទាំងនេះភាគច្រើនជាផលិតផលខុសច្បាប់ ហើយអាចជាផលិតផលក្លែងក្លាយទៀតផង។
.jpg)
ការអំពាវនាវរបស់ក្រសួងសុខាភិបាលនេះធ្វើឡើង ដើម្បីបង្ការកុំឱ្យកើតមានគ្រោះថ្នាក់បណ្តាលពីការប្រើប្រាស់ផលិតផលនេះ ក៏ដូចជាការពន្យារពេលវេលាក្នុងការព្យាបាលត្រឹមត្រូវ និងខាតបង់ប្រាក់កាសរបស់ប្រជាពលរដ្ឋ។
ក្រសួងសុខាភិបាលបញ្ជាក់ថា៖ «សូមអំពាវនាវដល់បងប្អូនប្រជាពលរដ្ឋ ដែលបានស្គាល់ម្ចាស់គណនី បណ្តាញសង្គមហ្វេសប៊ុកខាងលើ ឬជនពាក់ព័ន្ធ ឬបានស្គាល់ទីតាំងដែលកំពុងចែកចាយ ឬលក់ ផលិតផល NSP OXYMETAZOLINE NASAL SPRAY គ្មានលេខបញ្ឆិកា និងគ្មានការទទួលស្គាល់ពីក្រសួងសុខាភិបាល សូមសហការផ្តល់ព័ត៌មានមកនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង»៕
