ថ្នាក់ដឹកនាំខេត្តបន្ទាយមានជ័យពេលចុះសួរនាំកសិករដែលកំពុងប្រមូលផលស្រូវកាលពីថ្ងៃទី ១៦ វិច្ឆិកា។ រូបថត រដ្ឋបាលខេត្តបន្ទាយមានជ័យ
បន្ទាយមានជ័យៈ លោក អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យបានធ្វើការអំពាវនាវដល់អាជីវករ ឈ្មួញទិញស្រូវ និងម្ចាស់រោងម៉ាស៊ីនកិនស្រូវទាំងអស់ សូមជួយសម្របសម្រួលក្នុងការទិញស្រូវប្រជាកសិករក្នុងតម្លៃសមរម្យ ចៀសវាងការទិញទម្លាក់ថ្លៃ។
លោក អ៊ុ រាត្រី បានធ្វើការអំពាវនាវបែបនេះ កាលពីថ្ងៃទី ១៦ ខែវិច្ឆិកា ក្នុងពេលដែលលោកបានដឹកនាំប្រធានមន្ទីរកសិកម្ម រុក្ខាប្រមាញ់ និងនេសាទ ប្រធានមន្ទីរពាណិជ្ជកម្ម និងអាជ្ញាធរមូលដ្ឋាន ចុះពិនិត្យមើលការប្រមូលផលស្រូវដើមរដូវ និងជួបជាមួយប្រជាកសិករ និងឈ្មួញទិញស្រូវ នៅក្នុងស្រុកស្វាយចេក និងស្រុកថ្មពួក ខេត្តបន្ទាយមានជ័យ។
លោកបន្ដថា អាជ្ញាធរមូលដ្ឋាន និងអ្នកពាក់ព័ន្ធសូមចូលរួមជួយពិនិត្យ និងសម្របសម្រួលជាមួយឈ្មួញ និងប្រជាកសិករក្នុងដែនសមត្ថកិច្ចរបស់ខ្លួនដោយរកវិធីផ្សេងៗ ដើម្បីបង្កភាពងាយស្រួលក្នុងការទិញ ប្រមូលផ្តុំទិញ និងការដឹកជញ្ជូនស្រូវជាដើម។
បើតាមរដ្ឋបាលខេត្តបន្ទាយមានជ័យ ការចុះទៅពិនិត្យមើលការប្រមូលផលស្រូវរបស់កសិករដោយផ្ទាល់ពីសំណាក់លោកអភិបាលខេត្តនោះ គឺដើម្បីរកដំណោះស្រាយបញ្ហាផ្សេងៗ ជូនប្រជាកសិករ ដូចជា ពិនិត្យមើលស្ថានភាពជាក់ស្តែងការប្រមូលផលស្រូវប្រជាពលរដ្ឋ ស្រូវដើមរដូវនេះ និងពិនិត្យមើលតម្លៃស្រូវមានការធ្លាក់ចុះក្នុងរយៈពេលប៉ុន្មានសប្តាហ៍នេះ ដើម្បីធ្វើការសម្របសម្រួលជាមួយឈ្មួញ និងម្ចាស់រោងម៉ាស៊ីនកិនស្រូវ ដើម្បីឱ្យមានការទិញលក់ស្រូវក្នុងតម្លៃសមរម្យ៕
