ភ្នំពេញៈ ចាប់ពីថ្ងៃទី ២៥ ដល់ទី ២៨ ខែវិច្ឆិកា ឆ្នាំ ២០២២ នឹងមានការបើកសម្ពោធកម្មវិធីមហោស្រពភាពយន្តខ្លីចតុមុខលើកទី១១ (2022 CSFF) ដែលបានរៀបចំនៅប្រទេសកម្ពុជា និងមានការចូលរួមពីសំណាក់សមិទ្ធករវ័យក្មេង និងអ្នកស្រឡាញ់វិស័យភាពយន្តទាំងក្នុង និងក្រៅស្រុក។
លោក ស៊ុំ ស៊ីថែន ប្រធានមហោស្រពភាពយន្តខ្លីចតុមុខលើកទី១១ បានថ្លែងក្នុងសន្និសីទសារព័ត៌មាន កាលពីថ្ងៃទី ២១ ខែវិច្ឆិកា ឆ្នាំ ២០២២ ឱ្យដឹងថា ការព្យាយាមបន្តប្រារព្ធកម្មវិធីមហោស្រពភាពយន្តខ្លីចតុមុខ ក្នុងរយៈពេល ២ ឆ្នាំចុងក្រោយនេះ បង្ហាញឱ្យឃើញថា ទោះបីជាក្នុងបរិបទកូវីដ ១៩ ក្តី ក៏ក្រុមការងារនៅតែព្យាយាមស្វះស្វែងក្នុងការរួមចំណែកផ្សារភ្ជាប់ការផ្សព្វផ្សាយ ពីវិស័យភាពយន្តខ្លីទៅកាន់ទស្សនិកជន ទាំងក្នុងប្រទេស និងក្រៅប្រទេស ឱ្យមានភាពប្រកៀកគ្នា។
លោក ស៊ីថែន បញ្ជាក់ថា សម្រាប់កម្មវិធីមហោស្រពភាពយន្តខ្លីចតុមុខលើកទី១១ ឆ្នាំ ២០២២ នេះ នឹងវិលមករៀបចំ ធ្វើនៅតាមរោងកុននានាវិញ ហើយមានខ្សែភាពយន្តខ្លីក្នុងស្រុក ដែលបានជ្រើសរើស សម្រាប់ការប្រកួតចំនួន ៦ រឿង និងខ្សែភាពយន្តអន្តរជាតិ សម្រាប់ការប្រកួតចំនួន ៨ រឿង និងមានខ្សែភាពយន្តខ្លីសម្រាប់ការចាក់បង្ហាញផ្សេងៗទៀតផងដែរ។
ប្រធានមហោស្រពភាពយន្តខ្លីចតុមុខលើកទី១១ រូបនេះបានប្រាប់ថា៖ «កម្មវិធីមហោស្រពភាពយន្តខ្លីចតុមុខ (CSFF) គឺជាកម្មវិធីប្រកួតភាពយន្តខ្នាតខ្លីដំបូង នៅប្រទេសកម្ពុជា បង្កើតនៅក្នុងឆ្នាំ ២០១២ ដែលឱ្យតម្លៃដល់ស្នាដៃថ្មីរបស់យុវសមិទ្ធករកម្ពុជា និងសមិទ្ធករពីបរទេស។ សមិទ្ធផលក្នុងស្រុក និងក្រៅស្រុក ត្រូវបានជ្រើសរើស សម្រាប់ប្រកួតផ្តាច់ព្រ័ត នឹងត្រូវបានទទួលការវាយតម្លៃពីសំណាក់គណៈមេប្រយោគរបស់មហោស្រព ដែលមានជំនាញក្នុងវិស័យភាពយន្ត»។
លោកបន្តថា៖ «ខ្សែភាពយន្តខ្លីក្នុងស្រុក (កម្ពុជា) ដែលបានជ្រើសរើសសម្រាប់ការប្រកួតចំនួន ៦ រឿងនោះរួមមានរឿង «សំឡេងរាត្រី» របស់សមិទ្ធករ សុខ ច័ន្ទរ៉ាដូ និងវ៉ាន់ គង់ហា រឿង«ពុកចង់បានអ្វី?» របស់សមិទ្ធករ ព្រំ ស្រីលក្ខណ៍ រឿង «ពលី» របស់សមិទ្ធករ ថោង សារ៉េត រឿង «ក្រចកហ្គីតា» របស់សមិទ្ធករ មឿន សូសុខហេង រឿង «ថ្ងៃរះក្នុងចិត្ត» របស់សមិទ្ធករ សាន ដានិច និងរឿង «កញ្ញាអតិថិជន» របស់សមិទ្ធករ ទី ទេពនិមល។
ចំណែកខ្សែភាពយន្តអន្តរជាតិ សម្រាប់ការប្រកួតចំនួន ៨ រឿង មានដូចជា រឿង «Bye Bye» របស់សមិទ្ធករ Amelie Bonnin រឿង «Sudden Uncertainty» របស់សមិទ្ធករ Firdaus Balam រឿង «Domar» របស់សមិទ្ធករ Alcibiade Cohen រឿង «Summer Friends» របស់សមិទ្ធករ Maxime Hermet រឿង «Motorcyclist’s Happiness Won’t Fit Into His Suit» របស់សមិទ្ធករ Gabriel Herrera រឿង «Hot Rod» របស់សមិទ្ធករJuliette Gillot រឿង «Lili Alone» របស់សមិទ្ធករ Zou Jing និងរឿង «Curupira and the Machine of Destiny» របស់សមិទ្ធករ Janaina Wangner»។
ឯប្រភេទខ្សែភាពយន្តដែលត្រូវបានគេទទួលយកសម្រាប់ដាក់ចូលរួម ក្នុងកម្មវិធីមហោស្រពភាពយន្តខ្លីចតុមុខឆ្នាំ ២០២២ រួមមានខ្សែភាពយន្តឯកសារខ្មែរខ្នាតខ្លី វីដេអូចម្រៀងខ្មែរ និងខ្សែភាពយន្តអន្តរជាតិខ្លីប្រឌិត និងឯកសារ។
លោក គាំ វុត្ថា ជាអ្នកជ្រើសរើសរឿងក្នុងស្រុក បានរំឭកឱ្យដឹងពីលក្ខខណ្ឌ សម្រាប់ការដាក់ស្នាដៃចូលរួមក្នុងកម្មវិធីមហោស្រពភាពយន្តខ្លីចតុមុខថា៖ «លក្ខខណ្ឌ ដែលយើងបានជ្រើសរើសរឿងក្នុងស្រុក សម្រាប់បង្ហាញ និងយកមកប្រកួតប្រជែងក្នុងកម្មវិធីមហោស្រពភាពយន្តខ្លីចតុមុខ ឆ្នាំ ២០២២ នេះគឺ ទី១ ត្រូវតែជារឿងមានរយៈពេលក្រោម ៣០ នាទី(The films are under 30 minutes)។ ទី២ ត្រូវជារឿង ដែលថតផលិតនៅឆ្នាំ ២០២១ (The films made in 2021) និងទី៣ យើងទទួលយកគ្រប់ប្រភេទរឿងទាំងអស់ (All genres of films) ដូចជាខ្សែរឿងខ្លី ខ្សែភាពយន្តឯកសារ និងវីដេអូចម្រៀង»។
ចំណែកលោក រដ្ឋ សានសិទ្ធិនី ជាអ្នកជ្រើសរើសរឿងអន្តរជាតិ ក៏បានបង្ហើបពីចំណុចសំខាន់ជាលក្ខខណ្ឌ ២ យ៉ាង ក្នុងការជ្រើសរើសខ្សែភាពយន្តខ្លីអន្តរជាតិ មានចំនួន ៥៥ រឿង មកពី ១០ ប្រទេស ដែលបានដាក់ក្នុងកម្មវិធីមហោស្រពភាពយន្តខ្លីចតុមុខឆ្នាំ ២០២២ នេះដែរ។
លោក រដ្ឋ សានសិទ្ធិនី ឱ្យដឹងថា៖ «សម្រាប់ខ្សែភាពយន្តខ្លីអន្តរជាតិ ដែលអាចត្រូវបានជ្រើសរើសនោះទី១ ត្រូវជាខ្សែភាពយន្ត ដែលមាននិយាយពីធម្មជាតិពិតនៃមនុស្ស និងទី២ ត្រូវតែជាខ្សែភាពយន្តដែលបានលើកយកពីបញ្ហាសង្គមពិតនានាមកឆ្លុះបញ្ចាំង»។
សម្រាប់ទីតាំងចាក់បញ្ចាំងកុនខ្លីវិញ គឺមាននៅតាមរោងភាពយន្ត ដែលជាដៃគូសហការរបស់កម្មវិធីមហោស្រពភាពយន្តខ្លីចតុមុខ ដូចជា សាលសន្និសីទចតុមុខ រោងភាពយន្ត Legend និង រោងភាពយន្ត Major Cineplex ចាប់ពីថ្ងៃទី ២៥ ដល់ទី ២៨ ខែវិច្ឆិកា ឆ្នាំ ២០២២។
ចំពោះការប្រកួតក្នុងកម្មវិធីមហោស្រពភាពយន្តខ្លីចតុមុខលើកទី១១ នេះ ខ្សែភាពយន្តខ្លី ដែលបានជាប់ជម្រើស នឹងបានទទួលប្រាក់រង្វាន់ច្រើនរួមមានដូចជា ជយលាភីភាពយន្តខ្លីលេខ ១ ក្នុងស្រុក បានប្រាក់រង្វាន់ ១ ០០០ ដុល្លារ ជយលាភីភាពយន្តខ្លីលេខ ២ ក្នុងស្រុកទទួលបានរង្វាន់ ៥០០ ដុល្លារ។
រង្វាន់ជម្រើសទស្សនិកជន សម្រាប់រឿងខ្លីក្នុងស្រុកបានប្រាក់រង្វាន់ចំនួន ៣០០ ដុល្លារ ដែលបោះឆ្នោតដោយទស្សនិកជន សម្រាប់រឿងខ្លីអន្តរជាតិ បានប្រាក់រង្វាន់ចំនួន ៣០០ ដុល្លារ ដែលបោះឆ្នោតដោយទស្សនិកជន។
ក្រៅពីការចាក់បញ្ចាំងខ្សែភាពខ្លីទាំងក្នុងស្រុក (រឿង ៦) និងអន្តរជាតិ (រឿង ៨) សម្រាប់ការប្រកួតដែលមានចំនួនសរុប ១៤ រឿងនោះ កម្មវិធីមហោស្រពភាពយន្តខ្លីចតុមុខលើកទី១១ ឆ្នាំ ២០២២ នេះ ក៏មានការចាក់បញ្ចាំងប្រភេទខ្សែភាពយន្តផ្សេងទៀតដែរ ដូចជា ភាពយន្តខ្លី «តោះថតឯកសារនៅកម្ពុជា ២០២១» មានចំនួន ៨ រឿង ដែលបានថតមកពីភូមិភាគឦសានប្រទេសកម្ពុជា។
ខ្សែភាពយន្តខ្លីរបស់កម្ពុជា សម្រាប់ចាក់បង្ហាញ មានចំនួន ១៤ រឿង ខ្សែភាពយន្តខ្លីដែលដឹកនាំដោយ «ក្រុមភាពយន្តឈូករត្ន័» ក្នុងឆ្នាំថ្មី ២០២២ នេះ និងផលិតដោយ «អង្គការភាពយន្តឈូករ័ត្ន» សហការជាមួយការិយាល័យទំនាក់ទំនងភ្នំពេញនៃមូលនិធិជប៉ុន កាលពីចុងឆ្នាំ ២០២១ សម្រាប់ការចាក់បង្ហាញមានចំនួន ៦រឿង ភាពយន្តឯកសារខ្លីរបស់កម្ពុជា ដែលនឹងត្រូវចាក់បង្ហាញផ្លូវការមានចំនួន ៧រឿង។ និងភាពយន្តខ្នាតខ្លីអន្តរជាតិទាំង ៤ ដែលបានជ្រើសរើសជាផ្លូវការសម្រាប់ការចាក់បញ្ចាំងមានចំនួន ៤ រឿង៕