ទារកដែលស្លាប់ដោយសារគ្រោះថ្នាក់ចរាចរណ៍ថ្មីៗនេះ។ រូបថត ហ្វេសប៊ុក
ភ្នំពេញៈ មេធាវីការពារក្តីជនរងគ្រោះករណីរថយន្តស៊េរីទំនើប ១ គ្រឿងបើកបុកម៉ូតូ Scoopy បណ្ដាលឱ្យរងគ្រោះមនុស្ស ៣ នាក់ក្នុងនោះទារកអាយុ ២ ខែបានស្លាប់ក្នុងមន្ទីរពេទ្យ បានដាក់ពាក្យបណ្តឹងទាមទារសំណងឡើងវិញ និងស្នើឱ្យតុលាការផ្តន្ទាទោសជនបង្កតាមច្បាប់ ខណៈតំណាងអយ្យការអះអាងថា កំពុងបន្តស៊ើបអង្កេតលើករណីនេះ។
កាលពីម៉ោង ២ រំលងអ្រធាត្រឈានចូលថ្ងៃទី ៥ ខែធ្នូ ឆ្នាំ ២០២២ មានហេតុការណ៍គ្រោះថ្នាក់ចរាចរណ៍មួយ បានកើតឡើងនៅចំណុចគល់ស្ពានជ្រោយចង្វារ ដោយក្នុងនោះមានយុវជន ១ រូបបានបើកបររថយន្តស៊េរីទំនើប ១ គ្រឿងម៉ាក Lexus ក្នុងល្បឿនលឿន និងស្ថិតក្នុងស្ថានភាពស្រវឹងបានជ្រុលទៅបុកម៉ូតូពីក្រោយក្នុងទិសដៅស្របគ្នាយ៉ាងពេញទំហឹង។
ក្នុងហេតុការណ៍នោះបានបណ្ដាលឱ្យអ្នកជិះម៉ូតូចំនួន ៣ នាក់ ជាអ្នកបើកបរ និងស្ត្រីជាម្តាយ និងទារកអាយុ ២ ខែ ផ្លោងមកជាមួយគ្នាប្រហែលជាង ១០០ ម៉ែត្ររងរបួសធ្ងន់ និងកំពុងស្ថិតក្នុងការជួយសង្គ្រោះនៅមន្ទីរពេទ្យផ្សេងៗគ្នា តែបច្ចុប្បន្ន ទារក ត្រូវបានអះអាងថាបានស្លាប់ក្នុងមន្ទីរពេទ្យ និងបានបញ្ជូនទៅធ្វើបុណ្យនៅវត្តទួលសង្កែ រាជធានីភ្នំពេញ។
មេធាវីការពារក្ដីជនរងគ្រោះម្នាក់ក្នុងចំណោមមេធាវីការពារក្តីរបស់លោកនាយករដ្ឋមន្ត្រីហ៊ុន សែនចំនួន ៤ រូប បានប្រាប់ភ្នំពេញប៉ុស្តិ៍នៅថ្ងៃទី ១២ ធ្នូ ក្នុងន័យមិនបញ្ចេញឈ្មោះថា បច្ចុប្បន្នសំណុំរឿងនេះកំពុងស្ថិតក្នុងដំណាក់កាលអយ្យការ។
លោកស្រីបានអះអាងថា តំណាងភាគីរងគ្រោះបានដាក់បណ្តឹងនៅតុលាការ ដើម្បីទាមទារសំណងការខូចខាតឡើងវិញ និងក្នុងនោះ ក៏បានស្នើឱ្យតុលាការផ្តន្ទាទោសជនបង្កតាមច្បាប់ជាធរមានផងដែរ។
លោកស្រីបានបញ្ជាក់ថា៖ «(ជនបង្កត្រូវបានឃុំខ្លួនឬអត់?) ចំពោះបញ្ហានេះខ្ញុំមិនអាចបញ្ជាក់ជូនបានទេ។ តែចំពោះមេធាវី បើកូនក្តីគាត់នៅតែរក្សាជំហរក្នុងការប្តឹងទាមទារសំណងយើងនៅតែជួយគាត់ឱ្យអស់ពីលទ្ធភាព ព្រោះជាក់ស្តែងយើងជាមេធាវីការពារក្តីឱ្យដើមបណ្តឹងរដ្ឋប្បវេណីប៉ុណ្ណោះ ហើយមួយវិញទៀត តុលាការក៏មិនទាន់បានកោះហៅភាគីរងគ្រោះទៅបំភ្លឺអ្វីដែរ អ៊ីចឹងហើយមានតែរង់ចាំចំណាត់ការរបស់តុលាការបន្តទៀត»។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានប្រាប់នៅថ្ងៃទី ១២ ធ្នូថា សំណុំរឿងបានបញ្ជូនមកដល់ស្ថាប័នអយ្យការនៃតុលាការដំបូងរាជធានីភ្នំពេញហើយ។ លោកបានបញ្ជាក់ថា ក្នុងពេលនេះតំណាងអយ្យការបាន និងកំពុងស៊ើបលើករណីនេះ ប៉ុន្តែលោកមិនបានបញ្ជាក់ទេថា នឹងមានការចោទប្រកាន់ឬយ៉ាងណា។
ការដាក់ពាក្យបណ្តឹងទាមទារសំណង់ជាថ្មីរបស់ជនរងគ្រោះ បានធ្វើឡើងបន្ទាប់មានហេតុការណ៍គ្រោះថ្នាក់ភ្លាមៗ មានសាច់ញាតិជនបង្កបានផ្តល់សំណងចំនួន ២ ៥០០ ដុល្លារទៅជនរងគ្រោះ ដើម្បីបញ្ចប់រឿង ហើយជនបង្ក ក៏ត្រូវបានអះអាងថា ត្រូវបានដោះលែងឱ្យនៅក្រៅឃុំផងដែរ។
ព័ត៌មាននេះ ក៏បង្កើតឱ្យមានមតិប្រតិកម្មពីមហាជននៅលើសង្គមថា ជារឿងអយុត្តិធម៌ ខណៈជនរងគ្រោះ បានប្រកាសបដិសេធចំពោះការទទួលសំណងនេះ ដោយបានអះអាងថា ខ្លួនស្មានតែឯកសារផ្ដិតមេដៃនេះ គឺជាពាក្យបណ្តឹង ដើម្បីប្ដឹងបន្តទៅតុលាការ ដែលមិនដឹងថា ជាឯកសារបញ្ចប់រឿងនោះទេ។
កាលពីថ្ងៃទី ៨ ធ្នូ ស្នងការដ្ឋាននគរបាលរាជធានីភ្នំពេញបានចេញសេចក្តីបំភ្លឺថា ករណីគ្រោះថ្នាក់នេះ ភាគីទាំងអស់បានឯកភាពគ្នាសុំបញ្ចប់សំណងរដ្ឋប្បវេណីចំនួន ២ ៥០០ ដុល្លារដោយមិនមានការបង្ខិតបង្ខំនៅការិយាល័យនគរបាលចរាចរណ៍ផ្លូវគោក កាលពីថ្ងៃទី៥ ខែធ្នូ ឆ្នាំ ២០២២ រួចរាល់ហើយ។
ស្នងការដ្ឋាននគរបាលរាជធានីភ្នំពេញ បានអះអាងថា ទោះបីជាមានការបញ្ចប់សំណងរដ្ឋប្បវេណីក្ដី ប៉ុន្តែករណីនៅជាប់បណ្តឹងអាជ្ញា ហើយកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីបន្ទាប់ពីមន្ត្រីជំនាញបានសន្និដ្ឋានថា មូលហេតុបណ្តាលឱ្យមានគ្រោះថ្នាក់គឺមកពីអ្នកបើកបររថយន្តបើកបរលឿនខ្វះការប្រុងប្រយ័ត្ន និងបើកបរក្នុងស្ថានភាពស្រវឹងមានអត្រាជាតិអាល់កុល ០.៥៣Mg/L។
រដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្មីៗនេះ ធ្លាប់បានព្រមានថា ការប្រព្រឹត្តបទល្មើសចរាចរណ៍បណ្តាលឱ្យមានគ្រោះថ្នាក់ធ្ងន់ធ្ងរដល់ជនរងគ្រោះឬឈានរហូតដល់បាត់បង់ជីវិតគឺជនបង្កត្រូវតែទទួលខុសត្រូវចំពោះមុខច្បាប់ហើយមន្ត្រីអ្នកអនុវត្តច្បាប់ត្រូវតែអនុវត្តទៅតាមច្បាប់ដោយមិនត្រូវលើកលែងចំពោះជនល្មើសនោះឡើយដោយត្រូវចាប់ខ្លួនយកមកផ្តន្ទាទោសចំពោះមុខច្បាប់ឱ្យខាងតែបាន៕
វីដេអូ៖
