សកម្មភាពសម្អាតសំរាមនៅតាមដងទន្លេសាបកាលពីខែកក្កដា ឆ្នាំ ២០២២។ ហេង ជីវ័ន
ភ្នំពេញ: ប្រជាពលរដ្ឋក្នុងរាជធានីភ្នំពេញមានការកត់សម្គាល់ថាអំឡុងពេលកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះនិងត្រូវបានរៀបចំនៅសណ្ឋាគារសុខាទាំងចរាចរណ៍ផ្លូវទឹកជាពិសេសសំរាមទាំងនៅលើច្រាំង និងផ្ទៃទន្លេហាក់ដូចជាស្អាត ស្ទើរតែគ្មានឃើញ ១សរសៃឱ្យទើសភ្នែក។
ប្រាកដណាស់បើគ្មានការសម្អាតសំរាមនៅលើផ្ទៃទឹកនិងច្រាំងទន្លេមិនរសាត់បាត់ដោយឯកឯងនោះទេ។ទាំងនេះជាកិច្ចការរបស់ក្រុមអង្គការសម្អាតទន្លេសមុទ្រ (ROC) (River Ocean Cleanup) ដែលបានចំណាយពេល១ខែក្នុងការសម្អាតបរិស្ថានមុនពេលកិច្ចប្រជុំមកដល់។
យ៉ាងណាមិញ នេះមិនមែនជាការងារតែ១មុខ ដែលអង្គការនេះត្រូវធ្វើនោះទេ។អង្គការ ដែលចាប់កំណើតកាលពីខែកក្កដាឆ្នាំ២០២០ អំឡុងពេលវិបត្ដិកូវីដកំពុងតែរីករាលខ្លាំងមួយនេះ បានចាប់ផ្ដើមបេសកកម្មជាផ្លូវការរបស់ខ្លួននៅខែមីនាឆ្នាំ២០២២កន្លងទៅថ្មីៗនេះ ដោយប្រមូលសំរាមនៅតាមផ្ទៃទឹកនិងច្រាំងទន្លេប្រមាណជិត២០០តោនមកហើយ។
.jpg)
លោកនូ សុវណ្ណ នាយកប្រតិបត្តិអង្គការសម្អាតទន្លេសមុទ្របានឱ្យដឹងថា៖ «បេសកកម្មសម្អាតបរិស្ថានត្រូវបានរអាក់រអួលដោយសារកូវីដ១៩រហូតដល់ខែមីនាឆ្នាំ២០២២បេសកកម្មសម្អាតទន្លេជាប្រវត្ដិសាស្ដ្រដែលសហការជាមួយ «everwave» របស់អាល្លឺម៉ង់បានចាប់ផ្ដើមដំណើរការ»។
អង្គការ «everwave» ជាសហគ្រាសសង្គមដែលការពារទន្លេនិងសមុទ្រពីកាកសំណល់ប្លាស្ទិក និងលើកកម្ពស់ការរស់នៅប្រកបដោយចីរភាព ដើម្បីសម្អាតបរិស្ថានផ្ទៃទឹកសម្រាប់ជាជម្រកមច្ឆាប្រភពអាហារនិងតំបន់សេដ្ឋកិច្ចបានផ្ដល់ទូកបំពាក់បច្ចេកវិទ្យាទំនើបបំផុតមកពីប្រទេសអាល្លឺម៉ង់ដែលមានសមត្ថភាពទាក់យកទិន្នន័យសំរាមត្រូវបានប្រមូលចេញពីទន្លេហើយនៅមានកាមេរ៉ាដ្រូនចាប់យកចំណុចសំរាមនៅតាមដងទន្លេទៀតផង។
សណ្ឋានស្រដៀងទូកដដែលមានរបារទម្លាក់ចុះសម្រាប់ឱ្យយានយន្ដបរឡើងលើទូកទូកប្រមូលសំរាមឈ្មោះ Moringa by Landmarken ទម្លាក់របារសម្រាប់ទាញយកសំរាមដោយការប្រើប្រព័ន្ធបញ្ជាឱ្យដែកសំណាញ់រមូរឡើង នាំទាំងសំរាមចូលទូក។
សំរាមប្រមាណជាង១៥០តោន ក្នុងចំណោម២០០តោន ត្រូវបានបញ្ជូនទៅកាន់មជ្ឈមណ្ឌលគ្មានសំណល់ដែលអង្គការទើបកសាងរួចចំនួន៤ទីតាំង កំពុងដំណើរការបាន៧ខែហើយ។
ពួកវាត្រូវបានយកទៅញែកតាមប្រភេទ ដោយបែងចែកប្រភេទសំរាមកែច្នៃដែលអាចប្រើប្រាស់ឡើងវិញជាមួយកិច្ចសហការក្រុមហ៊ុនឯកជនក្នុងប្រទេស និងកំពុងរៀបចំសាកល្បងនាំចេញទៅកាន់ប្រទេសនៅអឺរ៉ុបដើម្បីសាកល្បងកែច្នៃទៅជាវត្ថុអនុស្សាវរីយ៍ផ្សេងៗ។នេះបើយោងតាមលោកសុវណ្ណ។
ផ្ដើមពីចំណុចទន្លេចតុមុខ អង្គការសម្អាតទន្លេសមុទ្រមានមហិច្ឆតាសម្អាតទន្លេមេគង្គមានប្រវែង៤៨០គីឡូម៉ែត្រទន្លេសាបជាង២០០គីឡូម៉ែត្រនិងទន្លេបាសាក់ ប្រវែងជិត១០០គីឡូម៉ែត្រ ដែលទាមទារឱ្យមានទូកប្រមូលសំរាមទំនើបបន្ថែមទៀត។
លោក សុវណ្ណ បានប្រាប់ភ្នំពេញប៉ុស្ដិ៍ថា៖ «គោលបំណងសម្រាប់បេសកកម្មធំបំផុតគឺធ្វើយ៉ាងណាដើម្បីចូលរួមជាមួយរាជរដ្ឋាភិបាលក្នុងការធ្វើឱ្យទន្លេយើងគ្មានសំរាមក្នុងរយៈពេល ៥ឆ្នាំ»។
មហិច្ឆតាសម្អាតបរិស្ថានតាមដងទន្លេ និងសមុទ្រដ៏មហិមានេះបានធ្វើឱ្យអង្គការសហគ្រាសសង្គម «everwave» សម្រេចសហការតាមរយៈផ្ដល់ទូកប្រមូលសំរាមនិងក្រុមបច្ចេកទេស។
បើយោងតាម Jacqueline Plaster ប្រធានគម្រោងនៃក្រុមហ៊ុនចាប់ផ្តើមអាជីវកម្មអាល្លឺម៉ង់ everwave និងជាអនុប្រធានសមាគមអាល្លឺម៉ង់ Everwave Community e.V. បានឱ្យដឹងថា ROC គឺជាអង្គការក្រៅរដ្ឋាភិបាលក្នុងស្រុកដែលមានគោលដៅច្បាស់លាស់ បំណងដោះស្រាយបញ្ហាកាកសំណល់នៅក្នុងទន្លេនិងសមុទ្រ។
អ្នកស្រី Jacqueline បាននិយាយថា លោក សុវណ្ណ បានទាក់ទងជាមួយ everwave នៅខែសីហា ឆ្នាំ២០២១ថា តើសហគ្រិនសង្គមនេះអាចជួយផ្នែកបច្ចេកវិទ្យាសម្អាតទន្លេនៅកម្ពុជាបានទេ?
អ្នកស្រីបានឱ្យដឹងថា៖«យើងបានចាប់ផ្តើមជាមួយនឹងការវិភាគនៅនឹងកន្លែងក្នុងខែវិច្ឆិកាឆ្នាំ២០២១ជាកន្លែងដែលយើងបានវិភាគអំពីទន្លេទីតាំងប្រតិបត្តិការ កាកសំណល់និងអ្វីៗផ្សេងទៀត។ យើងមានចក្ខុវិស័យដូចគ្នាសម្អាតទន្លេនៃប្រទេសកម្ពុជារក្សាប្រទេសកម្ពុជាឱ្យស្រស់ស្អាត!»។
everwave ជួយផ្នែកបច្ចេកវិទ្យាទូកប្រមូលសំរាម Moringa by Landmarken ការកសាងសមត្ថភាពសម្រាប់ប្រតិបត្តិការទូកសំរាមការគ្រប់គ្រងទិន្នន័យរួមទាំងកាមេរ៉ាដ្រូន បញ្ញាសិប្បនិម្មិតនិង NIR-spectrometer ដើម្បីស្គាល់ទិន្នន័យប្រភេទប្លាស្ទិក។
អ្នកស្រីបន្ដថា មានក្រុមបំពេញការងារនៅកម្ពុជានិងក្រុមធ្វើការពីចម្ងាយនៅប្រទេសអាល្លឺម៉ង់ក៏ដូចជាជំនួយហិរញ្ញវត្ថុដល់គម្រោងនេះដែរ។
អ្នកស្រី Jacqueline លើកឡើងថា៖ «រហូតមកទល់ពេលនេះគម្រោងនេះត្រូវបានផ្តល់ហិរញ្ញប្បទានជាចម្បងតាមរយៈ everwave ដែលគាំទ្រដោយLandmarken និង Kühne+Nagel Germany។ប៉ុន្តែដើម្បីឱ្យមាននិរន្តរភាពក្នុងរយៈពេលវែងយើងត្រូវការការគាំទ្រក្នុងស្រុក។បច្ចុប្បន្ននេះវាជាការផ្តោតសំខាន់របស់យើង»។
នាយកប្រតិបត្តិអង្គការសម្អាតទន្លេសមុទ្របានឱ្យដឹងថា សំរាមមិនមែនមានតែនៅលើផ្ទៃទឹកឬនៅលើច្រាំងទន្លេប៉ុណ្ណោះទេ ប៉ុន្ដែសំរាមមានលិចមានអណ្ដែតវិលវល់គ្រប់ទីកន្លែងនៃផ្ទៃទន្លេ ដែលទាមទារបច្ចេកទេសក្នុងការទាញយកសំរាមទាំងនោះចេញមកដើម្បីការពារទន្លេពីការបំពុលដោយសំរាមគ្រប់ប្រភេទ។
ថ្មីៗនេះមុនពេលប្រជុំប្រជុំកំពូលអាស៊ាន អង្គការបានបញ្ចេញទូកធ្វើយុទ្ធនាការសម្អាតនៅម្ដុំសណ្ឋាគារសុខា រយៈពេល១ខែដោយបានប្រមែប្រមូលសំរាមទាំងនៅតាមច្រាំង លើច្រាំងនិងលើផ្ទៃទឹកទន្លេបានចំនួនជិត៤០តោននៅតំបន់ជ្រោយចង្វារ។
លោកសុវណ្ណបានឱ្យដឹងថា វាជាគោលបំណងធំរបស់អង្គការនិងក៏ជាកិច្ចសហការជាមួយសាលារាជធានីភ្នំពេញ គណៈកម្មការជាតិវាយតម្លៃទីក្រុងស្អាតនិងក្រសួងបរិស្ថានផងដែរក្នុងការសម្អាតទន្លេនៅមុនកិច្ចប្រជុំកំពូលអាស៊ានដែលកម្ពុជាធ្វើជាម្ចាស់នេះ។
លោកបានបន្ដថា៖«តាមពិតយើងមានបេសកកម្មសម្អាតរៀងរាល់ថ្ងៃទៅហើយតែចំពោះកិច្ចប្រជុំអាស៊ាន ស្មារតីអង្គការចង់ឃើញទីក្រុងស្អាតឱ្យបានឆាប់។ដូច្នេះយើងបានធ្វើសកម្មភាពនេះរៀងរាល់ថ្ងៃជាពិសេសតំបន់អាទិភាព»។
អង្គការមិនត្រឹមតែជួយដល់បរិស្ថានទន្លេប៉ុណ្ណោះទេ ប៉ុន្ដែក៏បានជួយលើកមុខមាត់ប្រទេសនិងជួយដល់ប្រជាពលរដ្ឋ១៦លាននាក់ក្នុងការទទួលទានទឹកទន្លេផងដែរ។ដូច្នេះការសម្អាតទន្លេនេះ មានផលប្រយោជន៍ខ្លាំងសម្រាប់ប្រជាពលរដ្ឋសម្រាប់ទឹកសូម្បីតែសត្វនៅក្នុងទឹកទាំងអស់ក៏ដោយ។
ជាមួយសមត្ថភាព និងការប្ដេជ្ញាចិត្ដដ៏មុតមាំរបស់ក្រុមការងារម្ចាស់ជំនួយទូកប្រមូលសំរាមប្រើបច្ចេកទេសទំនើបក៏មានក្ដីរំភើបចំពោះលទ្ធផលដែលទទួលបាននេះដែរ។
អ្នកស្រី Jacqueline ដែលបានមកទស្សនាប្រទេសកម្ពុជាកាលពីឆ្នាំ២០១៦និងមានអារម្មណ៍ស្រឡាញ់ប្រទេសនេះបានប្រាប់ភ្នំពេញប៉ុស្ដិ៍ថា៖ «ខ្ញុំមានមោទនភាពដែលឃើញសមិទ្ធផលសម្រេចបានច្រើនជាមួយគ្នា។ជាមួយនឹងបច្ចេកវិទ្យារបស់យើងក្រុមការងារROCនិងសហការជាមួយគណៈកម្មការវាយតម្លៃទីក្រុងស្អាតនៃក្រសួងទេសចរណ៍ ក្រសួងបរិស្ថាន សាលារាជធានី និងភាគីពាក់ព័ន្ធទាំងអស់»។
អ្នកស្រីនិយាយថា រហូតមកទល់ពេលនេះក្រុមយើងប្រមូលសំរាមបានជាង១៥០តោនពីទន្លេនិងច្រាំងទន្លេក្នុងរាជធានីភ្នំពេញក្នុងរយៈពេលមិនដល់១ឆ្នាំផង។ពួកគេបានសាងសង់កន្លែងបែងចែកសំរាមនិងបង្កើតការងារជាង៧០នាក់ នៅក្នុងវិស័យផ្លូវការនិងក្រៅផ្លូវការ។តើអ្នកអាចស្រមៃមើលថា តើទូកនិងឧបករណ៍បែងចែកសំរាមអាចធ្វើអ្វីបានខ្លះ?
ក្នុងនាមជាអ្នកគ្រប់គ្រងគម្រោង និងមានទីតាំងនៅក្នុងប្រទេសកម្ពុជាសម្រាប់បេសកកម្មនេះអ្នកស្រី Jacqueline និយាយថា អ្នកស្រីកំពុងធ្វើការយ៉ាងជិតស្និទ្ធជាមួយក្រុម ROC ទាំងមូល ជាពិសេសនាយកប្រតិបត្តិលោកនូ សុវណ្ណនិងលោកហួតរិទ្ធីអគ្គនាយករងនៃគណៈកម្មការវាយតម្លៃទីក្រុងស្អាតនៃក្រសួងទេសចរណ៍(NCCA-MoT) និងជាមួយក្រុមការងារនៅប្រទេសអាល្លឺម៉ង់ពីចម្ងាយ។
អ្នកស្រីបន្ដថា៖ «បន្ទាប់ពីបានធ្វើការជាមួយគ្នាអស់រយៈពេល១ឆ្នាំមកយើងមានទំនាក់ទំនងភាពជាដៃគូដ៏រឹងមាំហើយបានរីកចម្រើនជាមួយគ្នាជាក្រុមដ៏ធំ១មកពីអង្គការចំនួន២ប្រទេសទាំង២ដោយសហការយ៉ាងជិតស្និទ្ធជាមួយរដ្ឋាភិបាលក្រុមហ៊ុនគ្រប់គ្រងកាកសំណល់និងក្នុងកិច្ចសហប្រតិបត្តិការ ក៏ដូចជាផ្លាស់ប្តូរជាមួយភាគីពាក់ព័ន្ធជាច្រើនទៀត»។
ស្ថាបនិកអង្គការសម្អាតទន្លេសមុទ្រលោកសុវណ្ណបានឱ្យដឹងថា ឥឡូវនេះរយៈពេល៨ខែ ក្រុមការងារបានសម្អាតទន្លេក្នុងបរិវេណរាជធានីភ្នំពេញបាន៦០ភាគរយ។ប៉ុន្ដែគួរចាំថាសំរាមនៅវិលវល់ទៅតាមខ្សែទឹក ដោយសំរាមខ្លះដែលលិចចុះក្រោមអណ្ដែតឡើងមកវិញ ហើយសំរាមអណ្ដែតខ្លះក៏លិចចុះទៅក្រោមវិញ ដែលទាមទារបន្ដបេសកកម្មដដែលៗ។
លោកបានប្រាប់ថា៖ «យើងមិនហ៊ានធានាថាយើងធ្វើបានប៉ុន្មានភាគរយនោះទេតែបើគិតពីរយៈពេលរយៈចម្ងាយនិងចំណុចសំរាម យើងអាចសម្រេចបាន៦០ភាគរយនៅក្នុងរាជធានីភ្នំពេញ»។
ថ្លែងប្រាប់អ្នកសារព័ត៌មាននាឱកាសសន្និបាតបូកសរុបលទ្ធផលការងារបរិស្ថានឆ្នាំ២០២២និងលើកទិសដៅការងារឆ្នាំ២០២៣ កាលពីថ្ងៃទី៣១ខែតុលា រដ្ឋលេខាធិការក្រសួងបរិស្ថានលោក នេត្រ ភក្ត្រា បានឱ្យដឹងថា នៅឆ្នាំ២០២២សំរាមនៅក្នុងប្រទេសកម្ពុជាបានកើនឡើងជាង៤លានតោននៅក្នុង ១ឆ្នាំៗ។
លោកបានឱ្យដឹងថា ក្នុង១ថ្ងៃ សំរាមមានជាង១ម៉ឺនតោន ហើយកម្រិតនៃការកើនឡើងសំណល់រឹងសំរាមនៅប្រទេសកម្ពុជា គឺមានចន្លោះពី១០ទៅ១៥ ភាគរយនៅក្នុង១ឆ្នាំ។
លោកថ្លែងថា៖ «ក្នុងចំណោមសំរាម ១០០ភាគរយ គឺមានតែសំរាម៦៤ភាគរយប៉ុណ្ណោះ ដែលត្រូវបានយកទៅចាក់នៅលើលាន ក្រៅពីនោះសំរាម ៣៦ភាគរយទៀតគឺរាយប៉ាយនៅតាមទីតាំងផ្សេង ឬនៅប្រភពទឹក ឬនៅតាមទីសាធារណៈដែលនេះជាកិច្ចការងារបន្ត»។
មន្ដ្រីជាន់ខ្ពស់ក្រសួងបរិស្ថានរូបនេះ បានសាទរចំពោះសកម្មភាព និងការប្ដេជ្ញាចិត្ដចូលរួមសម្អាតបរិស្ថានទាំងនៅតាមដងទន្លេ និងទីឋានផ្សេងៗក្នុងការចូលរួមចំណែកលើកស្ទួយបរិស្ថានបៃតង។
លោកនេត្រ ភក្ដ្រា ដែលជាអ្នកនាំពាក្យក្រសួងបរិស្ថានផងនោះបានថ្លែងប្រាប់ភ្នំពេញប៉ុស្ដិ៍ថា៖ «ក្រសួងបរិស្ថានស្វាគមន៍និងកោតសរសើរចំពោះការចូលរួមរបស់ប្រជាពលរដ្ឋនិងសមាគមនិងអង្គការក្រៅរដ្ឋាភិបាលក្នុងការសម្អាតអនាម័យបរិស្ថាន»។
លោកបានបន្ដថា៖ «នេះគឺជាការចូលរួមជាមួយអាជ្ញាធរនិងប្រជាសហគមន៍ក្នុងការសម្អាតអនាម័យបរិស្ថានជាពិសេសសំណល់រឹងសំរាមដើម្បីឱ្យទីក្រុងកាន់តែមានសោភណភាពស្អាតបៃតងនិងមានភាពប្រកួតប្រជែងនិងជាកន្លែងសម្រាប់ការរស់នៅប្រកបដោយគុណភាព និងសុវត្ថិភាព»។
ដោយមានការគាំទ្រស្មារតីពីរាជរដ្ឋាភិបាល លោកសុវណ្ណ ក៏បានសុំឱ្យមានការចូលរួមពីសំណាក់ប្រជាពលរដ្ឋក្រុមហ៊ុនឯកជនក្នុងការចូលរួមឬផ្ដល់ជាថវិកាចំពោះមូលនិធិសម្អាតទន្លេដើម្បីទិញទូកសម្អាតទន្លេជាបន្ដទៀត ដោយសារលទ្ធភាពនៃការសម្អាតរបស់ទូក១គ្រឿងនៅមិនទាន់គ្រប់គ្រាន់។អង្គការកំពុងធ្វើបេសកកម្មក្នុងរាជធានីភ្នំពេញនិងបន្ដទៅទូទាំងប្រទេសនាឆ្នាំក្រោយ។
អង្គការសម្អាតទន្លេសមុទ្របានស្នើសុំសាលារាជធានីនូវមធ្យោបាយដឹកជញ្ជូនសំរាមចេញពីទន្លេ ដូចជា រថយន្ដឬម៉ូតូកង់៣ជាដើម ដោយសារអង្គការកំពុងខ្វះខាតមធ្យោបាយសម្រាប់ដឹកជញ្ជូនសំរាមចេញពីទន្លេឱ្យបានឆាប់។
នាយកប្រតិបត្ដិលោកសុវណ្ណបានឱ្យដឹងថា បច្ចុប្បន្ននេះអង្គការជួលម៉ូតូកង់៣សម្រាប់ដឹកសំរាមចេញទៅកន្លែងកែច្នៃដែលចំណាយធនធានរបស់អង្គការ១៥០ដុល្លារក្នុង១ខែ។
ក្រៅពីការស្នើសុំមធ្យោបាយដឹកជញ្ជូនអង្គការក៏បានដាក់លិខិតទៅកាន់រដ្ឋាករទឹកដែលធ្វើការបូមទឹកពីទន្លេខណៈអង្គការមានភារកិច្ចសម្អាតទឹក ដោយការស្នើសុំវិភាគទានពីរដ្ឋាករទឹក។
លោកបាននិយាយថា៖ «ជាក់ស្ដែងប្រសិនបើយើងសម្អាតទឹកកាន់តែស្អាតខាងរដ្ឋាករទឹកក៏អាចបន្ថយសារធាតុសម្លាប់មេរោគ។ខ្ញុំកំពុងមើលលទ្ធភាពស្ថាប័នពាក់ព័ន្ធណាដែលចូលរួមជាថវិកាភ័ស្ដុភារទៅតាមលទ្ធភាព»។
ទម្លាប់បោះចោលសំរាមទៅក្នុងទឹកពីសំណាក់ពលរដ្ឋគឺជាបញ្ហាក្ដៅគគុកសម្រាប់ខាងអង្គការបន្ដដោះស្រាយ។ លោក សុវណ្ណ បានបន្ដសំណូមពរទាំងប្រជាពលរដ្ឋ និងអាជ្ញាធរមូលដ្ឋានជួយផ្សព្វផ្សាយនិងមានវិធានការ។
លោកបានបន្ថែមថា សំរាមភាគច្រើននៅកុះកុញក្នុងភូមិសាស្ដ្រភូមិនេសាទដែលពួកគេរស់នៅលើផ្ទៃទឹកទាំងការចោលសំរាមនិងការកកស្ទះសំរាមដែលហូរពីលើខ្សែទឹកមកថែមទៀត។
លោកនិយាយទាំងមោទនភាពថា៖ «យើងមើលឃើញថាសំរាមមានការថយចុះច្រើននៅតាមច្រាំងនិងទឹកទន្លេនៅក្នុងរាជធានីភ្នំពេញ ដោយសារបងប្អូនចូលរួមផងនិងការសម្អាតជាបន្ដបន្ទាប់ផង»។
ទន្ទឹមនឹងការសម្អាតសំរាមនៅតាមដងទន្លេនេះ លោកសុវណ្ណ ក៏បានសង្កេតឃើញទុយោបង្ហូរទឹកសម្អុយចូលទន្លេជាច្រើន។លោកថា រាជរដ្ឋាភិបាលបានរៀបចំប្រព័ន្ធលូធំរួចហើយតែក៏នៅមានបំពង់បង្ហូរប៉ុនតាមផ្ទះច្រើនដែរ។ប៉ុន្ដែវាហួសដែនសមត្ថកិច្ចរបស់អង្គការដែលមានភារកិច្ចត្រឹមសម្អាតសំរាមរឹង។
ពេលសំណង់មិនរៀបរយនៅបរិវេណមាត់ទន្លេនៃភូមិសាស្ដ្រសង្កាត់ឫស្សីកែវត្រូវបានរុះរើលោកសុវណ្ណបានឱ្យដឹងថាសំរាមនៅជួរតាមមាត់ទន្លេនោះមិនតិចជាង១០០តោននោះទេដែលទាមទារឱ្យសម្អាតចេញ។
លោកបានអះអាងថា៖ «ជាការពិតណាស់! ការរុះរើសំណង់មិនរៀបរយនេះពិតជាបានជួយកាត់បន្ថយសំរាមពីច្រាំងនិងទឹកទន្លេបានយ៉ាងច្រើនបំផុត ដោយសារកន្លងមកពួកគាត់ចោលសំរាមចូលទឹក។គួរឱ្យកត់សម្គាល់ថាលូបង្ហូរទឹកសម្អុយចូលទន្លេនៅម្ដុំព្រែកព្នៅនោះក៏ផ្ទុកទៅដោយសំរាមច្រើនដែរហើយបងប្អូនរស់នៅអនាធិបតេយ្យបោះចោលសំរាមទៅក្នុងទន្លេហើយភូមិសាស្ដ្រនោះពិបាកដល់ក្រុមការងារប្រមូលសំរាមយ៉ាងខ្លាំងរួមទាំងក្លិនអសោចផង»។
អង្គការផ្ដោតនៅភូមិសាស្ដ្រទន្លេក្នុងរាជធានីភ្នំពេញជាមុនសិននិងបានចុះអនុស្សរណៈជាមួយគណៈកម្មការជាតិវាយតម្លៃទីក្រុងស្អាត មុនពេលបន្ដបេសកកម្មទៅសម្អាតសមុទ្រនៅពេលដែលអង្គការមានធនធានគ្រប់គ្រាន់។
លោកបានឱ្យដឹងថា នៅពេលឃើញទីកន្លែង១ស្អាតប្រជាជននឹងលែងបោះចោលសំរាមនៅទីនោះទៀតហើយឬក៏បោះតិចជាងមុនដែរដោយសារកន្លងមកមិនមានអ្នកសម្អាត។ការអប់រំគឺមាននៅតាមរយៈសកម្មភាពធ្វើជាក់ស្ដែងនេះឯង។
លោក សុវណ្ណ បន្ដថា៖ «ដំណាក់កាលនេះយើងបានបង្ហាញពីសមត្ថភាពនិងចំណេះដឹងក៏ដូចជាធនធានមនុស្ស ដែលយើងអាចសម្រេចមហិច្ឆតាសម្អាតទន្លេឱ្យអស់សំរាមក្នុងរយៈពេល៥ឆ្នាំ។ប៉ុន្ដែអ្វីដែលនៅខ្វះនោះគឺសម្ភារជាពិសេសទូកបច្ចេកវិទ្យាទំនើប។កិច្ចការសម្អាតបរិស្ថាននេះមិនមានអង្គការធំៗឬអង្គការសហប្រជាជាតិណាអាចមកជួយយើងបាននោះទេមានតែខ្មែរគ្នាយើង ដែលរួមដៃជួយគ្នា»។
អ្នកស្រី Jacqueline និយាយថា ការចុះអនុស្សរណៈយោគយល់រវាងក្រសួងទេសចរណ៍និងអង្គការសម្អាតទន្លេសមុទ្របេសកកម្មនឹងពង្រីកនៅទូទាំងប្រទេសរហូតដល់ឆ្នាំ២០២៧ដើម្បីដោះស្រាយបញ្ហាបំពុលប្លាស្ទិកក្នុងទឹកកម្ពុជា។
អ្នកស្រីបន្ដថា អ្នកស្រីមានអារម្មណ៍ស្រឡាញ់ប្រទេសនេះជាពិសេសក្រុមការងារលើកទឹកចិត្ត។ជាមួយនឹងថវិកាកាន់តែច្រើនពួកគេអាចនាំយកទូកកាន់តែច្រើនរៀបចំគ្រឿងបរិក្ខារបន្ថែមនិងបង្កើតការងារកាន់តែច្រើន។
អ្នកស្រីបន្ថែមថា៖ «យើងនឹងស្នាក់នៅដរាបណាត្រូវការដោះស្រាយបញ្ហាទាំងនេះ។កិច្ចការដ៏ធំបំផុតរបស់យើងនៅពេលនេះគឺការប្រមូលមូលនិធិបន្ថែមទៀត។យើងបានបង្ហាញថាឆ្នាំនេះតើយើងអាចសម្រេចបានប៉ុន្មានជាមួយនឹងទូក១និងក្រុមតូច១ ក្នុងរយៈពេលដ៏ខ្លី។យើងអាចគាំទ្ររដ្ឋាភិបាលជាមួយនឹងហេដ្ឋារចនាសម្ព័ន្ធនៅតាមមាត់ទន្លេ ក៏ដូចជាអប់រំសិស្សានុសិស្សនិងប្រជាពលរដ្ឋនៅទូទាំងប្រទេស»។
យោងតាមប្រធានគម្រោងនៃក្រុមហ៊ុនចាប់ផ្តើមអាជីវកម្មអាល្លឺម៉ង់ everwave បានឱ្យដឹងថាបច្ចុប្បន្ននេះក្រុមហ៊ុនមួយចំនួនបានចាប់ផ្តើមឧបត្ថម្ភបេសកកម្មដូចជា MAERSK ក្រុមហ៊ុនព្រូដិនសលនិង CAMBREW ហើយសមាជិកក្រុមពិតជាសប្បាយរីករាយណាស់ដែលក្រុមហ៊ុននិងប្រជាពលរដ្ឋកាន់តែច្រើនឡើងៗបានចូលរួមចំណែកក្នុងបេសកកម្មសម្អាតទន្លេនេះ។
លោកសុវណ្ណ បានបញ្ជាក់ថា អង្គការនៅត្រូវការឧបករណ៍លើកដាក់សំរាមនៅមជ្ឈមណ្ឌលគ្មានសំណល់ទូកប្រមូលសំរាមប៉ុន្មានគ្រឿងទៀតនិងបើកមជ្ឈមណ្ឌលកែច្នៃសំរាមយ៉ាងហោច៥កន្លែងទៀតដើម្បីទ្រទ្រង់បេសកកម្មនេះនៅទូទាំងប្រទេស៕
