អាយ ស៊ីស៊ី-អង្គរ និងសំបូរ ព្រៃគុក បើកកិច្ចប្រជុំពេញអង្គពិភាក្សាទៅលើការបន្តអភិរក្ស និងការជួសជុលប្រាសាទ។ រូបថត អាជ្ញាធរជាតិអប្សរា
សៀមរាបៈ គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរ (អាយស៊ីស៊ី-អង្គរ) និងសំបូរព្រៃគុកនៅព្រឹកថ្ងៃទី១៦ ធ្នូ ឆ្នាំ២០២២ បានបើកកិច្ចប្រជុំពេញអង្គ លើកទី២៩ ដើម្បីធ្វើការពិភាក្សាទៅលើការបន្តអភិរក្ស និងការជួសជុលប្រាសាទក្នុងតំបន់រមណីយដ្ឋានប្រវត្តិសាស្ត្រ ព្រមទាំងការបណ្តុះបណ្តាលធនធានមនុស្ស។
កិច្ចប្រជុំពេញអង្គនៅខេត្តសៀមរាបនេះ បានធ្វើឡើង ក្រោមអធិបតីភាពលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ព្រមទាំងសហប្រធាននៃកិច្ចប្រជុំ លោក MIKAMI Masahiro ឯកអគ្គរាជទូតជប៉ុន និង លោក Jacques PELLET ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជា។
កិច្ចប្រជុំពេញអង្គលើកទី២៩ នាពេលនេះនឹងពិនិត្យ ពិភាក្សាទៅលើរបាយការណ៍សកម្មភាពនានារបស់អាជ្ញាធរជាតិអប្សរា និងអាជ្ញាធរជាតិសំបូរព្រៃគុក ការអភិរក្សជួសជុល ការស្រាវជ្រាវ បុរាណវិទ្យា ការបណ្ដុះបណ្ដាលធនធានមនុស្ស និងការងារសង្គ្រោះបន្ទាន់ទៅលើប្រាសាទ និងបុរាណដ្ឋាននានាជាដើម។
ក្នុងនោះដែរ ក៏មានការចុះហត្ថលេខាលើអនុស្សរណៈ យោគយល់គ្នាចំនួន២៖ ទី១-អាជ្ញាធរជាតិអប្សរា និងសហជីពអង្គរ សង្កាត់គ្រប់គ្រងទឹកនៃជ្រលងប៊ីយ៉ែវ្រ SIAVB (បារាំង) ទី២-អាជ្ញាធរជាតិអប្សរា និង ស្ថាប័ន JASA ជប៉ុន។
បន្ថែមពីលើនេះ នៅរសៀលថ្ងៃទី១៦ ខែធ្នូ នេះ លោកស្រី ម៉ែន សំអន ឧបនាយករដ្ឋមន្រ្តី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច នឹង អញ្ជើញចូលរួមជាអធិបតីក្នុងការបំពាក់គ្រឿងឥស្សរិយយស ជូនដល់អ្នកជំនាញជាតិនិងអន្តរជាតិដែលបានចូលរួមចំណែកក្នុងកិច្ចអភិរក្ស និងអភិវឌ្ឍន៍ប្រកបដោយចីរភាពសម្រាប់រមណីយដ្ឋានអង្គររយៈពេល ៣០ឆ្នាំ មកនេះ៕
