លោករដ្ឋមន្ត្រីកសិកម្ម ឌិត ទីណា (បង់កក្រមាពណ៌ក្រហម) ពេលចុះទៅខេត្តកំពង់ឆ្នាំង។ រូប ហ្វេសប៊ុក យ៉ង សាំងកុមារ
កំពង់ឆ្នាំងៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ចង់ឱ្យមានកិច្ចសហការល្អ រវាងសហគមន៍អ្នកផលិតពូជ អ្នកដាំដំណាំស្រូវ និងរោងម៉ាស៊ីនកិនស្រូវ ដែលស្ថិតនៅសហគមន៍កសិកម្មកំពង់អុសពន្លឺច័ន្ទ នៅឃុំកំពង់អុស ស្រុកជលគិរី ខេត្តកំពង់ឆ្នាំង សំដៅកែទម្រង់កសិកម្ម ដោយកាត់បន្ថយថ្លៃដើម និងពង្រឹងភាពធន់របស់កសិករ តាមរយៈការចងក្រងជារចនាសម្ព័ន្ធប្រកបដោយប្រសិទ្ធភាព។ នេះបើតាមមន្ត្រីជាន់ខ្ពស់ក្រសួងកសិកម្ម។
លោកយ៉ង សាំងកុមារ រដ្ឋលខាធិការក្រសួងកសិកម្ម រុក្ខាប្រមាញ់ និងនេសាទប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែធ្នូ ថា រូបលោក និងលោក ឌិត ទីណា រដ្ឋមន្ត្រីក្រសួងកសិកម្ម បានចុះបេសកកម្មទៅកាន់ សហគមន៍កសិករអ្នកផលិតស្រូវនៅឃុំកំពង់អុស ខេត្តកំពង់ឆ្នាំងកាលពីថ្ងៃទី ២០ ខែធ្នូ។ ការចុះទៅនេះ គឺដើម្បីពិនិត្យមើលការផ្តួចផ្តើមគំនិតសហការ រវាងសហគមន៍អ្នកផលិតពូជ កសិករអ្នកដាំស្រូវ និងរោងម៉ាស៊ីនប្រមូលទិញស្រូវ។
លោកបញ្ជាក់ថា អ្វីដែលសំខាន់ ក្នុងនោះ គឺទី ១ ក្រសួងកសិកម្ម សម្របសម្រួលធ្វើយ៉ាងណា ចង់ឱ្យក្រុមអ្នកផលិតពូជស្រូវ បានទទួលពូជ ដែលបានចុះបញ្ជិកាហើយ ដែលក្រសួងត្រួតពិនិត្យទទួលស្គាល់ថា ជាពូជល្អ ហើយកសិករដែលផលិតពូជ តាមស្រូវពូជនោះទទួលបានកិច្ចសន្យាទីផ្សារស្រូវ ក្នុងតម្លៃ ១ ដែលសមរម្យ។
លោកថ្លែងថា៖ «ជារួម ការងារដែលយើងចាប់ផ្តើមធ្វើនេះ គឺយើងមានកសិករអ្នកផលិតស្រូវចំណី មានអ្នកផលិតស្រូវពូជ មានអ្នកទិញស្រូវចំណីពីកសិករទៅកែច្នៃជាអង្ករ ហើយលក់ទីផ្សារក្នុងស្រុក និងនាំចេញ និងធ្វើយ៉ាងណាឱ្យតួអង្គទាំង៣ហ្នឹងធ្វើការរួមគ្នា» ។
លោកបន្តថា ការចុះទៅខេត្តកំពង់ឆ្នាំងនេះ ក្រសួងកសិកម្ម គាំទ្រដល់សហគមន៍កសិករ ដើម្បីទទួលបានពូជល្អ បច្ចេកទេស និងរបៀបកាត់បន្ថយថ្លៃដើមផលិត ព្រមទាំងទទួលបានកិច្ចសន្យាទីផ្សារជាមួយរោងម៉ាស៊ីនចំនួន ៣ នៅទីនោះទៀតផង។ លោកឱ្យដឹងថា ចេញពីខេត្តកំពង់ឆ្នាំង រដ្ឋមន្ត្រីក្រសួងកសិកម្ម លោកឌិត ទីណា បានបន្តបេសកកម្មទៅកាន់ខេត្តកំពង់ធំទៀតនៅថ្ងៃទី ២១ ខែធ្នូ ដែលនេះជាការចាប់ផ្តើម ដើម្បីឈានទៅសម្រេចផែនការធំ សម្រាប់កសិករ និងសង្គមជាតិទាំងមូល។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ឱ្យដឹងថា បេសកកម្មនេះមានគោលដៅចុះទៅពិនិត្យមើលទីតាំងបង្កាត់ពូជស្រូវ ដែលមានគុណភាព និងផ្ដល់ទិន្នផលខ្ពស់ សម្រាប់ប្រជាកសិករ នារដូវធ្វើស្រែខាងមុខ។ ក្នុងឱកាសចុះទៅខេត្តកំពង់ឆ្នាំង លោករដ្ឋមន្ត្រីបានលើកឡើងពីបេសកកម្មកែទម្រង់កសិកម្មកម្ពុជា ឱ្យក្លាយទៅជាកសិកម្មទំនើប ដោយជំរុញការប្រើប្រាស់គ្រឿងយន្តកសិកម្ម។
ប្រើប្រាស់ពូជស្រូវដែលមានគុណភាព ដើម្បីឈានទៅកាត់បន្ថយការចំណាយរបស់ប្រជាកសិករ និងពង្រឹងភាពធន់របស់ប្រជាកសិករ តាមរយៈការរៀបចំចងក្រងពួកគាត់ឱ្យមានរចនាសម្ព័ន្ធសមស្រប ដែល អាចធ្វើការបានប្រកបដោយប្រសិទ្ធភាព។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បញ្ជាក់នៅថ្ងៃទី ២១ ខែធ្នូ ថា ក្នុងឱកាសចុះមកខេត្តកំពង់ឆ្នាំងលោក ឌិត ទីណា បានចុះទៅសួរសុខទុក្ខសហគមន៍ផលិតពូជស្រូវ សម្រាប់ផ្គត់ផ្គង់នៅលើទីផ្សារ និងប្រាប់ឱ្យសហគមន៍ចូលរួមធ្វើការប្រមូលផ្តុំគ្នា ដើម្បីចុះកិច្ចសន្យាប្រមូលទិញ ក្នុងតម្លៃណាមួយដែលសមស្រប។
លោកថា ការងារផលិតនេះជាជំហានដំបូង សហគមន៍ និងរោងម៉ាស៊ីន បានយល់ព្រមចុះកុងត្រាជាមួយគ្នាលើផ្ទៃដី ១០០ ហិកតា ក្នុងសហគមន៍កសិកម្មកំពង់អុសពន្លឺច័ន្ទ ដែលមាន ៣ រោងម៉ាស៊ីន។ តាមការបញ្ជាក់ពីសហគមន៍ ទិន្នផលក្នុង ១ ហិកតាជាមធ្យម ប្រមាណ ៥ តោនក្នុង ១ រដូវ ធ្វើបាន ២ ដង។
លោកថ្លែងថា៖ «ឯកឧត្តមរដ្ឋមន្ត្រី [ឌិត ទីណា] លោកផ្តោតសំខាន់ឱ្យអ្នកផលិត ជាមួយនឹងអ្នកប្រមូលទិញ មានភាពស្មោះត្រង់នឹងគ្នា ហើយជជែកគ្នាឱ្យបានល្អប្រសើរ។ សំខាន់អ្នកផលិត និងអ្នកទិញ គឺនិយាយគ្នា ចៀសវាងការផលិតហើយ មិនមានអ្នកប្រមូលទិញ»។
លោក ងិន ហ៊ុន ឱ្យដឹងថា ក្នុងឆ្នាំ ២០២២ ខេត្តកំពង់ឆ្នាំងបានប្រមូលផលស្រូវវស្សា លើផ្ទៃដីប្រមាណ ៩ ម៉ឺនហិកតាហើយ ក្នុងផែនការ ១២ ម៉ឺនហិកតាជាង។ តាមរយៈការចុះទៅពិនិត្យជាក់ស្តែងនៅថ្ងៃទី ២០ ធ្នូ ស្រូវប្រាំងឆ្នាំ ២០២២ នេះនៅមិនទាន់បានប្រមូលផលនៅឡើយទេ ខណៈអ្នកខ្លះនៅមិនទាន់បានដាំដុះផងដែរ ដោយសារទឹកទើបតែស្រក។ លោកថា ជារួម ផែនការស្រូវប្រាំងមាន ៣៧ ០០០ ហិកតា ប៉ុន្តែពេលនេះ ទើបតែធ្វើបានប្រមាណ ២០% ប៉ុណ្ណោះ៕
វីដេអូ៖
