សកម្មភាពស្វែងរកអ្នកនេសាទបាត់ខ្លួនក្នុងលម្ហសមុទ្រ។ រូបថត BTV
កំពតៈ បុរសនេសាទម្នាក់បានបាត់ខ្លួនទៅក្នុងលម្ហសមុទ្រតាំងពីយប់ថ្ងៃទី ២៦ នៅក្បែរកោះទន្សាយ ខេត្តកែប ក្រោយពីទូកនេសាទលិចដោយសារផ្ទុកលើសទម្ងន់។
លោក សឹម ហ៊ឹម ប្រធានសហគមន៍នេសាទត្រពាំងសង្កែ ឃុំត្រពាំងសង្កែ ស្រុក ទឹកឈូ ខេត្តកំពត ហើយដែលទូកសមាជិករបស់ខ្លួនជួបគ្រោះថ្នាក់លិចទូកនេះបាននិយាយថា បុរសនេសាទម្នាក់ដែលបានបាត់ខ្លួននៅក្នុងលំហសមុទ្រកាលពីយប់ថ្ងៃទី២៦ ហើយរហូតមកដល់ថ្ងៃទី២៧ ធ្នូ នៅមិនទាន់រកឃើញនៅឡើយទេ។
លោកបន្តថា បើតាមសម្តីរបស់ជនរងគ្រោះដែលបានរួចផុតជីវិតបាននិយាយថា ពួកគេមានគ្នាចំនួន៥នាក់ដោយជិះទូកមងកេវចេញទៅនេសាទត្រី។ នៅពេលនោះវេលាម៉ោង១១យប់ថ្ងៃទី២៦ ធ្នូ នោះមិនមានខ្យល់ខ្លាំងទេ ហើយពួកគេក៏រកត្រីបានច្រើនដែរ។ បន្ទាប់ពីរកត្រីបានច្រើនហើយក៏នាំគ្នាត្រឡប់មកឃុំត្រពាំងសង្កែ ស្រុកឈូក វិញតែជាអកុសលក៏ លិចទូកតែម្តងទៅ។គ្រានោះបុរសម្នាក់បានហែលទឹកសមុទ្រសំដៅទៅដីគោកនៅកោះទន្សាយរីឯជនរងគ្រោះ៣នាក់ទៀតត្រូវនគរបាលនិងយោធាជើងទឹកជួយសង្គ្រោះរួចជីវិត នៅឡើយតែបុរសរងគ្រោះឈ្មោះបាន អាយុ ៥៤ឆ្នាំបានលិចក្នុងទឹកបាត់រកមិនឃើញដោយសាតែគាត់មិនចេះហែលទឹក។
លោកប្រាប់ថា៖«បើតាមជនរងគ្រោះនិយាយប្រាប់ខ្ញុំ គាត់ថា ទូកលិចដោយសារលើសចំណុះព្រោះរកត្រីបានច្រើន។ពួកគាត់ដឹងថា ទម្ងន់លើសចំណុះទូកដែរ តែបើពួកគាត់លែងត្រីចូលទឹកវិញស្តាយ»។
លោកបន្ថែមថា ជនរងគ្រោះទាំង៥នាក់នោះមិនមែនជាសមាជិកនៅក្នុងសហគមន៍នេសាទរបស់លោកទេ តែម្ចាស់ទូកជាសមាជិកក្នុងសហគមន៍របស់លោក ហើយគាត់បានឱ្យជនរងគ្រោះដែលជាកម្មកររបស់គាត់ចេញទៅនេសាទ។ចំពោះចំណុចដែលទូកលិចមកដីគោកកោះទន្សាយមានចម្ងាយប្រហែល២០០ម៉ែត្រ។ក្នុងប្រតិបត្តិការតាមរកសាកសពគឺសមត្ថកិច្ចប្រើអូប័រខាងជើងទឹកចំនួន៣គ្រឿង ទូកនេសាទ២គ្រឿង និងទូកសម្រាប់ដឹកភ្ញៀវទេសចរ២គ្រឿង៕
