បុរសបើករថយន្តត្រូវបាននគរបាលវាស់កម្រិតអាល់កុលឃើញបើកបរស្ថិតក្នុងស្ថានភាពស្រវឹង ដែលបង្កឱ្យមានគ្រោះថ្នាក់ចរាចរណ៍ ស្លាប់ទារកម្នាក់ និងរបួសមនុស្ស២នាក់ កាលពីចុងឆ្នាំ២០២២
ភ្នំពេញៈ តំណាងអយ្យការអមសាលាដំបូងរាជធានីភ្នំពេញ សម្រេចចោទប្រកាន់ជនបង្កគ្រោះថ្នាក់ចរាចរណ៍ឈ្មោះ សោម ណូរីទីឃា ដែលបើកបរក្នុងស្ថានភាពស្រវឹងបណ្តាលឱ្យទារកអាយុ ២ ខែបាត់បង់ជីវិត និងមនុស្ស ២ នាក់ទៀតរងរបួសធ្ងន់ ពីបទបើកបរបណ្តាលឱ្យអ្នកដទៃស្លាប់ និងរបួសដោយអចេតនា ក្រោយតំណាងអយ្យការ បិទបញ្ចប់ការស៊ើបសួរ។
បើទោះជាបែបណា គិតមកត្រឹមថ្ងៃទី ១៩ ខែមករា ជនជាប់ចោទមិនទាន់ត្រូវបានឃាត់ខ្លួននៅឡើយទេ ក្រោយពីមានដីកានាំខ្លួនពីតុលាការ បន្ទាប់ពីសមត្ថកិច្ច បានសម្រេចដោះលែងឱ្យនៅក្រៅឃុំបណ្តោះអាសន្ន កាលពីថ្ងៃទី ៥ ខែធ្នូ ឆ្នាំ ២០២២ ដោយមានលោក ធូ វិរៈ ជាមន្ត្រីនគរបាលអាវុធជាតិផ្ទុះ ជាអ្នកធានា។
របាយការណ៍របស់ស្នងការដ្ឋាននគរបាលរាជធានីភ្នំពេញបានឱ្យដឹងថា ជនបង្កគ្រោះថ្នាក់ចរាចរណ៍នេះ មានឈ្មោះ សោម ណូរីទីឃា ភេទប្រុសអាយុ ១៩ ឆ្នាំ មានលំនៅផ្ទះលេខ ៥៣ ផ្លូវកែវចិន្តា ភូមិ ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ ភ្នំពេញ ប៉ុស្តិ៍ កាលពីថ្ងៃទី ១៨ មករាថា សំណុំរឿងនេះ ត្រូវបានតំណាងអយ្យការអមសាលាដំបូងរាជធានីភ្នំពេញ បើកការស៊ើបសួររួចហើយ។ ជនជាប់ចោទ ត្រូវបានចោទប្រកាន់ពីបទបើកបរបណ្តាលឱ្យអ្នកដទៃស្លាប់ និងរបួសដោយអចេតនា តាមមាត្រា៨៣ និងមាត្រា៨៥ នៃច្បាប់ស្តីពីចរាចរណ៍ផ្លូវគោក។
កាលពីម៉ោង ២ រំលងអធ្រាត្រឈានចូលថ្ងៃទី ៥ ខែធ្នូ ឆ្នាំ ២០២២ ហេតុការណ៍គ្រោះថ្នាក់ចរាចរណ៍មួយ បានកើតឡើងនៅចំណុចគល់ស្ពានជ្រោយចង្វារ។ ក្នុងនោះមានយុវជន ១ រូប បានបើកបររថយន្តស៊េរីទំនើប ១ គ្រឿង ម៉ាក Lexus ក្នុងល្បឿនលឿន និងស្ថិតក្នុងស្ថានភាពស្រវឹងបានជ្រុលទៅបុកម៉ូតូពីក្រោយក្នុងទិសដៅស្របគ្នាយ៉ាងពេញទំហឹង។
ក្នុងហេតុការណ៍នោះ បានបណ្ដាលឱ្យអ្នកជិះម៉ូតូចំនួន ៣ នាក់ បុរសជាអ្នកបើកបរ និងស្ត្រីជាម្តាយ និងទារកអាយុ ២ ខែ ផ្លោងមកជាមួយគ្នាប្រហែលជាង ១០០ ម៉ែត្ររងរបួសធ្ងន់ និងកំពុងស្ថិតក្នុងការជួយសង្គ្រោះនៅមន្ទីរពេទ្យផ្សេងៗគ្នា។ ប៉ុន្តែក្រោយមក ទារក ត្រូវបានស្លាប់ក្នុងមន្ទីរពេទ្យ និងបានបញ្ជូនទៅធ្វើបុណ្យនៅវត្តទួលសង្កែ រាជធានីភ្នំពេញ។
ក្រោយកើតហេតុនេះភ្លាម សាធារណជនមួយចំនួន បានបង្ហាញប្រតិកម្ម និងទាមទាររកយុត្តិធម៌ជំនួសជនរងគ្រោះ ក្រោយពីមានសាច់ញាតិជនបង្ក បានផ្តល់សំណងចំនួន ២ ៥០០ ដុល្លារទៅជនរងគ្រោះ ដើម្បីបញ្ចប់រឿង និងជាថ្នូរឱ្យបាននៅក្រៅឃុំ។ ប៉ុន្តែសំណងនោះ ត្រូវបានជនរងគ្រោះ ប្រកាសបដិសេធ ដោយអះអាងថា ខ្លួនស្មានតែឯកសារផ្ដិតមេដៃនេះ គឺជាពាក្យបណ្តឹង ដើម្បីប្ដឹងបន្តទៅតុលាការ ដោយមិនដឹងថា ជាឯកសារបញ្ចប់រឿងនោះទេ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ ប្រាប់ភ្នំពេញនៅថ្ងៃទី ១៩ មករាថា៖«ទាក់ទងនឹងបញ្ហានេះ យើងបានទទួលដីកា របស់តុលាការហើយ និងបានអនុវត្តតាម ដើម្បីចាប់ខ្លួនជនបង្ក។ ប៉ុន្តែរហូតមកដល់ពេលនេះ សមត្ថកិច្ចជំនាញយើងបានធ្វើការសហការគ្នាយ៉ាងដុតដៃដុតជើងកំពុងធ្វើការស្រាវជ្រាវ ដោយមិនទាន់បានជាលទ្ធផលក្នុងការនាំខ្លួនជនសង្ស័យយកមកទេ»។
ទោះយ៉ាងណា លោក សាន សុខសីហា ក៏មិនទាន់ហ៊ានធ្វើការសន្និដ្ឋានបាននៅឡើយទេថា ជនបង្ក ឬជនត្រូវចោទ បានគេចខ្លួនទៅក្រៅប្រទេស ឬក៏កំពុងស្ថិតក្នុងប្រទេសនៅឡើយ ដោយគ្រាន់តែអះអាងថា សមត្ថកិច្ច នឹងនៅតែបន្តខិតខំស្វែងរក ដើម្បីយកជននេះ មកអនុវត្តតាមច្បាប់ឱ្យខាងតែបាន។
មេធាវីការពារក្ដីជនរងគ្រោះម្នាក់ ក្នុងចំណោមមេធាវីការពារក្តីរបស់លោកនាយករដ្ឋមន្ត្រី ហ៊ុន សែន ចំនួន ៤ រូប ដែលបានចូលខ្លួនមកការពារជូនជនរងគ្រោះទាំង ៣ នាក់ បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ មករា ក្នុងលក្ខខណ្ឌមិនបញ្ចេញឈ្មោះថា សហមេធាវី កំពុងរៀបចំឯកសារភ័ស្តុតាងដាក់ជូនតុលាការបន្ថែម។
ជាមួយគ្នានេះ លោកស្រីមេធាវីបានអះអាងដែរថា តំណាងភាគីរងគ្រោះ បានដាក់បណ្តឹងនៅតុលាការ ដើម្បីទាមទារសំណងការខូចខាតឡើងវិញ និងស្នើឱ្យតុលាការផ្តន្ទាទោសជនបង្កតាមច្បាប់ជាធរមាន។
លោកស្រីបានបញ្ជាក់ថា៖ «[សហមេធាវី] នឹងរង់ចាំចំណាត់ការបន្តរបស់អយ្យការ ក្នុងការបញ្ជូនរឿងទៅស៊ើបសួរ ឬជម្រះភ្លាម [ជម្រើសក្នុងការចោទប្រកាន់របស់អយ្យការ]»។
តាមរបាយការណ៍របស់ស្នងការដ្ឋាននគរបាលរាជធានីភ្នំពេញ ផ្អែកតាមច្បាប់ស្តីពីចរាចរណ៍ផ្លូវគោក ការវាស់វែងពិនិត្យកន្លែងកើតហេតុ និងស្លាកស្នាមយាន មន្ត្រីជំនាញសន្និដ្ឋានបានថា មូលហេតុបណ្តាលឱ្យមានគ្រោះថ្នាក់ គឺអ្នកបើកបររថយន្ត បើកបរលឿនខ្វះការប្រុងប្រយ័ត្ន និងបើកបរស្ថិតក្នុងស្ថានភាពស្រវឹងមានអត្រាជាតិអាល់កុល ០.៥៣ Mg/L ។
មាត្រា ៨៥ នៃច្បាប់ស្តីពីចរាចរណ៍ផ្លូវគោកចែងថា ជនណាដែលបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវ បណ្ដាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី ១ ឆ្នាំ ទៅ ៣ ឆ្នាំ ពិន័យជាប្រាក់ពី ៤ ០០០ ០០០ (បួនលាន)រៀល ទៅ ១៥ ០០០ ០០០ (ដប់ប្រាំលាន)រៀល និងអាចត្រូវផ្តន្ទាទោស ដោយទោសបន្ថែម ១ ឬច្រើន ដូចមានចែងក្នុងមាត្រា ៥៣ (ប្រភេទទោសបន្ថែម) នៃក្រមព្រហ្មទណ្ឌ។
មាត្រាដដែលនៃច្បាប់នេះ ក៏បានចែងដែរថា អំពើល្មើសខាងលើនេះត្រូវផ្តន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាប់ពី ១០ លានទៅ ២៥ លានរៀល កាលបើអ្នកបើកបរស្ថិតក្នុងស្ថានភាពស្រវឹង ឬបណ្តាលឱ្យមានអ្នកស្លាប់ច្រើននាក់ ឬក៏រត់គេចខ្លួនពីកន្លែងកើតហេតុក្នុងគោលបំណងគេចវេះពីការទទួលខុសត្រូវជាដើម៕
វីដេអូ៖
