គ្រូសូត្រឆ្វេងក្នុងវត្តដែលត្រូវឃាត់ខ្លួន (រូបបិទមុខ)។ រូបថត FB
ភ្នំពេញៈ គ្រូសូត្រឆ្វេងដែលយកចានថ្មវាយព្រះកេសនេន១អង្គបែកឈាមស្រោចព្រះកាយ កាលពីវេលាថ្ងៃត្រង់ថ្ងៃទី ២៥ ខែមករា ប្រព្រឹត្តនៅវត្តទ្រព្យគរ ស្ថិតក្នុងឃុំត្រពាំងសាប ស្រុកបាទី ខេត្តតាកែវនោះ ត្រូវបាននគរបាលស្រុកបាទីឃាត់ខ្លួនហើយនៅថ្ងៃទី ២៦ ខែមករា បន្ទាប់ពីព្រះអនុគណស្រុកបាទីចាប់ផ្សឹកក្រោយពីបានប្រព្រឹត្តហិង្សាបានប៉ុន្មានម៉ោង។
លោកឆាយ កែវមុន្នី អធិការនគរបាលស្រុកបាទី បានប្រាប់ភ្នំពេញប៉ុស្តិ៍ថា ឈ្មោះ នួន ឆានី អាយុ ៣២ឆ្នាំ ជាអតីតគ្រូសូត្រឆ្វេងដែលជាបុគ្គលប្រព្រឹត្តអំពើហិង្សាម្នាក់នោះត្រូវបានកម្លាំងសមត្ថកិច្ចរបស់លោកចាប់ខ្លួននៅព្រឹកថ្ងៃទី២៦ ខែមករា ឆ្នាំ ២០២៣។ ការចាប់ខ្លួននេះប្រសិនបើភាគីជនរងគ្រោះមិនប្ដឹង ក៏សមត្ថកិច្ចរបស់លោកត្រូវតែអនុវត្តដែរ ព្រោះក្នុងតួនាទីជានគរបាលយុត្តិធម៌។
លោកថ្លែងថា៖«ដោយសារពេលមុនគាត់នៅជាព្រះសង្ឃឥឡូវគាត់ត្រូវបានផ្សឹកហើយពីថ្ងៃម្សិលមិញ(ថ្ងៃទី២៥មករា)។បុគ្គលម្នាក់នោះយើងបានចាត់វិធានការតាមផ្លូវច្បាប់ហើយ»។
ជុំវិញការប្រើអំពើហិង្សានេះត្រូវបាន សង្ឃ១អង្គគង់នៅវត្តទ្រព្យគរ ព្រះនាម ប៊ុត ចាន់ថាច មានថេរដីកាថា កាលពីវេលាម៉ោងជាង១១ព្រឹកថ្ងៃទី២៥មករាឆ្នាំ២០២៣ សាមណេរឈ្មោះពេជ្រ សាវុធ បាននិមន្តមកពីបិណ្ឌបាតជាមួយនឹងសាមណេរជាច្រើនអង្គទៀត។បន្ទាប់ពេលនោះសាមណេរអង្គនោះបានរៀបចំចង្ហាន់ដែលចង្ហាន់នោះមានវង់ជាន់លើសម្រាប់ព្រះចៅអធិការ និងគ្រូសូត្រស្តាំគ្រូសូត្រឆ្វេងនិងវង់ក្រោមសម្រាប់លោកជាសាមណេរឆាន់រួមគ្នា។
ព្រះអង្គបន្តថា ពេលកំពុងរៀបចំចាត់ចែងបង្ហាន់ទៅតាមលំដាប់លំដោយជាទម្លាប់ដែលពេលនោះសាមណេរពេជ្រ សាវុធ ឃើញថា ចង្ហាន់នៅវង់លើមានច្រើនពេកក៏យក២ទៅ៣ស្រាក់មករំលែកដាក់នៅក្នុងវង់ក្រោមវិញសម្រាប់សង្ឃឆាន់រួមគ្នា។ស្របពេលនោះឯងក៏មានគ្រូសូត្រឆ្វេង ព្រះនាម នួន ឆានី និមន្តមកទាន់ឃើញសកម្មភាពចាត់ចែងចង្ហាន់បែបនេះក៏យកចានគប់សាមណេររងគ្រោះហើយវាយទៅលើលោកពីរបីដៃ។ អំពើវាយនេះមិនអស់ចិត្តថែមទាំងយកចានថ្មវាយព្រះកេសលោកឱ្យរបួសចេញឈាមស្រោចព្រះទៀតផង។
ព្រះអង្គ ប៊ុត ចាន់ថាច មានថេរដីកា ថា៖«ពេលដែលមានបញ្ហានោះនេនៗជាច្រើនអង្គដែលកំពុងអង្គុយចាន់ក៏ផ្អើលឈុលឡើងហើយនាំគ្នាចុះពីសាលាឆាន់អស់។ម្នាក់ៗនាំគ្នាជូតឈាមសាមណេររងគ្រោះហើយដឹកយកទៅគ្លីនិកឯកជនដេរអស់៧ថ្នេរ»។
បើតាមថេរដីកា របស់ព្រះអង្គ ចាន់ថាច នៅថ្ងៃដដែលនោះដែរបន្ទាប់ពីមានអំពើហិង្សានេះកើតឡើងមកក៏មានព្រះគ្រូអនុគណស្រុកបាទីព្រះនាមភួង ម៉ិញ រួមទាំងអាជ្ញាធរពាក់ព័ន្ធចុះមកដល់វត្តទ្រព្យគរ ហើយក៏ប្រជុំបន្ទាន់ និងសម្រេចចាប់ផ្សឹកភិក្ខុបង្កហេតុអង្គនោះភ្លាមៗដែរ។ចំពោះសាមណេររងគ្រោះបន្ទាប់ពីគ្រូពេទ្យដេររបួសមកត្រូវបានក្រុមគ្រួសារយកទៅសឹងនៅផ្ទះជាបណ្តោះអាសន្នសិនដើម្បីព្យាបាលរបួស។
បើតាម អធិការស្រុកបាទី លោក ឆាយ កែវមុន្នី ជនសង្ស័យឈ្មោះនួន ឆានី នឹងត្រូវចាប់បញ្ជូនទៅស្នងការដ្ឋាននគរបាល ខេត្តតាកែវ បន្តទៀតក្រោយពីកម្លាំងសមត្ថកិច្ចជំនាញរបស់លោកបញ្ចប់ការសាកសួរ៕
