នារីបម្រើភ្ញៀវនៅក្លិបកម្សាន្ត១នៅខេត្តព្រះសីហនុកាលពីឆ្នាំ២០២២។ ហេង ជីវ័ន
ភ្នំពេញៈ ដើម្បីចូលរួមអនុវត្តនូវអនុសាសន៍ណែនាំរបស់លោកនាយករដ្ឋមន្ត្រី ហ៊ុន សែន ដែលបានស្នើគ្រប់ក្រសួង-ស្ថាប័នពាក់ព័ន្ធ ត្រូវយកចិត្តទុកដាក់ចំពោះស្ត្រីដែលបម្រើការក្នុងវិស័យសេដ្ឋកិច្ចក្រៅប្រព័ន្ធ ក្រសួងទេសចរណ៍បានដាក់ចេញនូវវិធានការពង្រឹងការគ្រប់គ្រងអាជីវកម្ម និងបុគ្គលិកបម្រើការតាមអាជីវកម្មកម្សាន្តមនុស្សពេញវ័យ។
នាកិច្ចប្រជុំនាថ្ងៃទី ៣០ ខែមករា លោកស្រី ហ៊ុន ដានី រដ្ឋលេខាធិការក្រសួងទេសចរណ៍ បានដឹកនាំកិច្ចប្រជុំពាក់ព័ន្ធនឹងការគ្រប់គ្រងអាជីវកម្ម និងបុគ្គលិកបម្រើការផ្នែកសេដ្ឋកិច្ចក្រៅប្រព័ន្ធនៅតាមអាជីវកម្មក្លិបកម្សាន្ត ខារ៉ាអូខេ រង្គសាល-ឌីស្កូតែក បៀរហ្គាដិន និងម៉ាស្សា-ស្ប៉ា ដែលសុទ្ធតែជាកន្លែងកម្សាន្តមនុស្សពេញវ័យ។
គោលបំណងនៃកិច្ចប្រជុំនេះ គឺដើម្បីចូលរួមអនុវត្តនូវអនុសាសន៍ណែនាំរបស់លោកនាយករដ្ឋមន្ត្រីដែលបានស្នើគ្រប់ក្រសួង-ស្ថាប័នពាក់ព័ន្ធ ត្រូវយកចិត្តទុកដាក់ចំពោះស្ត្រីដែលបម្រើការក្នុងវិស័យទាំងនេះ។
លោកស្រី ហ៊ុន ដានី បានថ្លែងនាកិច្ចប្រជុំនោះថា ៖ «ផ្តើមពីតួនាទីដ៏មានសារៈសំខាន់របស់ស្រ្តី ក្រសួងទេសចរណ៍បានចាត់ទុកស្ត្រីគឺជាកម្លាំងចលករដ៏មានសក្តានុពលនិងជាភាគីពាក់ព័ន្ធមិនអាចខ្វះបាន ដែលបានចូលរួមចំណែកយ៉ាងសកម្មនៅក្នុងការលើកស្ទួយកម្រិតជីវភាពគ្រួសារ សហគមន៍ និងសង្គម-សេដ្ឋកិច្ច»។
លោកស្រីបានបន្តថា កិច្ចខិតខំប្រឹងប្រែងកន្លងមករបស់ក្រសួងទេសចរណ៍ក្នុងការអនុវត្តសកម្មភាពនានា ជាពិសេសជំរុញការលើកកម្ពស់សិទ្ធិ តួនាទី តម្លៃស្ត្រី និងបង្កើនភាពអង់អាចដល់ស្ត្រីដែលប្រកបមុខរបរក្នុងឧស្សាហកម្មទេសចរណ៍ ជាកត្តារួមចំណែកយ៉ាងសំខាន់ដល់ការអភិវឌ្ឍវិស័យទេសចរណ៍ប្រកបដោយចីរភាព និងបរិយាប័ន្ន។
ក្រសួងទេសចរណ៍ បានលើកឡើងថា ស្ត្រីដែលបម្រើការក្នុងវិស័យទេសចរណ៍ មានការគាំពារដោយច្បាប់ស្តីពីទេសចរណ៍ ដោយស្ត្រីទាំងនោះត្រូវបានយកចិត្តទុកដាក់ឱ្យទទួលបានការចូលរួមនិងទទួលបានអត្ថប្រយោជន៍ប្រកបដោយសមធម៌ពីការអភិវឌ្ឍវិស័យទេសចរណ៍។
ច្បាប់នេះដែរ មិនត្រឹមតែបង្កើតឡើងដើម្បីធានាការគ្រប់គ្រងនិងអភិវឌ្ឍវិស័យទេសចរណ៍ប្រកបដោយប្រសិទ្ធភាពប៉ុណ្ណោះទេ ថែមទាំងបានរួមចំណែកថែរក្សាការពារធនធានធម្មជាតិ វប្បធម៌ ទំនៀមទម្លាប់ ដើម្បីទាញយកផលប្រយោជន៍ និងបែងចែកផលប្រយោជន៍ពីទេសចរណ៍ប្រកបដោយសមធម៌ ជាពិសេសចូលរួមទប់ស្កាត់ផលប៉ះពាល់អវិជ្ជមានមកលើស្ត្រីនិងកុមារ ដោយធានាឱ្យស្ត្រី និងកុមារមានសុវត្ថិភាព សេចក្តីថ្លៃថ្នូរ ចៀសផុតពីការរើសអើង ការរំលោភបំពាន ការកេងប្រវ័ញ្ច ការជួញដូរជាដើម។
ដើម្បីពង្រឹងការគ្រប់គ្រងអាជីវកម្ម និងបុគ្គលិកបម្រើការនៅតាមសេវាកម្សាន្តទេសចរណ៍ លោកស្រី ហ៊ុន ដានី ក៏បានស្នើដល់អភិបាលរាជធានី-ខេត្ត ផ្តល់កិច្ចសហការជាមួយក្រសួងទេសចរណ៍ និងមន្ទីរទេសចរណ៍ក្នុងការគ្រប់គ្រងអាជីវកម្មសេវាកម្សាន្តឱ្យមានប្រសិទ្ធភាព រាប់ទាំងសកម្មភាព ការផ្តល់អាជ្ញាប័ណ្ណ ទាំងសម្បទា និងការរៀបចំ។
បើតាមក្រសួងទេសចរណ៍ អាជីវកម្មក្លិបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្កាដិនសរុបមានចំនួន៩២៨អាជីវកម្ម ក្នុងនោះអាជីវកម្មខារ៉ាអូខេមានចំនួន៧៥៩អាជីវកម្ម, រង្គសាល-ឌីស្កូតែកមានចំនួន៦៩អាជីវកម្ម, អាជីវកម្មបៀរហ្កាដិនមានចំនួន១០០អាជីវកម្ម។
ដោយឡែកអាជីវកម្មម៉ាស្សា-ស្ប៉ា សរុបមានចំនួន ៤១៩ អាជីវកម្ម ដែលស្មើនឹង ៣,២២២ គ្រែ។ ចំនួនបុគ្គលិកបម្រើការក្នុងអាជីវកម្មក្លឹបកម្សាន្ត ខារ៉ាអូខេ រង្គសាល-ឌីស្កូតែក និងបៀរហ្កាដិនសរុបមានចំនួន ២៤ ១២៥ នាក់ (ស្រី ១៤ ៦៤១ នាក់)។
ឆ្លៀតឱកាសនោះដែរ លោកស្រីរដ្ឋលេខាធិការ ក៏បានណែនាំដល់នាយកដ្ឋានសេវាកម្សាន្ត ត្រូវសហការជាមួយនាយកដ្ឋានបណ្តុះបណ្តាលវិជ្ជាជីវៈទេសចរណ៍ ផ្ដល់ការបណ្ដុះបណ្ដាលតាមគ្រប់រូបភាពដល់បុគ្គលិកដែលបម្រើការសេដ្ឋកិច្ចក្រៅប្រព័ន្ធផ្នែកសេវាកម្សាន្ត ម៉ាស្សា-ស្ប៉ា ដើម្បីឱ្យពួកគាត់មានជំនាញច្បាស់លាស់ ងាយស្រួលក្នុងការប្រកបមុខរបរ បង្កើនប្រាក់ចំណូល សំដៅលើកកម្ពស់កម្រិតជីវភាពរស់នៅឱ្យកាន់តែប្រសើរឡើង។
សូមរំឭកផងដែរថា លោកនាយករដ្ឋមន្ត្រី បានណែនាំដល់ «ក្រុមមេធាវីស្ម័គ្រចិត្តសម្តេចតេជោសែន» ការពារផ្លូវច្បាប់ចំពោះស្ត្រីបម្រើសេវាកម្សាន្តនៅទូទាំងប្រទេស ដើម្បីការពារសិទ្ធិស្រី្តដែលបម្រើការងារក្នុងវិស័យនេះ ខណៈដែលស្ត្រីមួយចំនួនតែងរងការបៀតបៀន។
ទាក់ទងនឹងករណីនេះដែរ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងក្នុងសន្និសីទសារព័ត៌មានរបស់ គណបក្សប្រជាជនកម្ពុជា ស្តីពីលទ្ធផល នៃមហាសន្និបាតវិសាមញ្ញតំណាងទូទាំងប្រទេស កាលពីថ្ងៃទី ២៩ ខែមករា ថា គណបក្សប្រជាជននឹងផ្តល់ការការពារ និងអាចផ្តល់នូវបណ្ណក្រីក្រ និងបណ្ណ ប.ស.ស ដើម្បីជួយសម្រួលដល់អ្នកដែលជួបការលំបាក និងទទួលរងនូវហានិភ័យនានា។
លោកបានឱ្យដឹងថា ៖ «រាជរដ្ឋាភិបាលមានគោលនយោបាយយកចិត្តទុកដាក់ចំពោះស្រ្តីដែលប្រកបរបរតាមកន្លែងកម្សាន្តនានា ដោយផ្តល់បណ្ណ ប.ស.ស និងក្រុមមេធាវីដើម្បីការពារសិទ្ធិសេរីភាពដល់បងប្អូននៅពេលមានការបំពារបំពានដោយប្រការណាមួយ»។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានគាំទ្រដល់គោលនយោបាយដែលជួយការពារដល់សិទ្ធិស្ត្រីបម្រើការងារនៅផ្នែកសេវាកម្សាន្ត ប៉ុន្តែលោកថា រដ្ឋគួរតែជំរុញឱ្យអនុវត្តច្បាប់តែម្ដង។
លោក វន់ ពៅ បញ្ជាក់ថា នោះគឺច្បាប់ស្ដីពីការងារដោយផ្តល់សិទ្ធិឱ្យគាត់មានឱកាសក្នុងការចូលរួមចងក្រងបង្កើតទៅជាសហជីព និងអាចបង្កើតជាឯកសារគតិយុត្តពិសេស ១ ដើម្បីគាំពារពួកគាត់ដែលនេះវាជាចំណុចល្អបន្ថែមទៅនឹងអ្វីដែលជាការលើកឡើងរបស់លោកនាយករដ្ឋមន្ត្រី៕
