អ្នកនាំពាក្យរដ្ឋាភិបាលកម្ពុជាលោកផៃ ស៊ីផាន។ ហេង ជីវ័ន
ភ្នំពេញៈ អ្នកនាំពាក្យរាជរដ្ឋាភិបាល និងអ្នកនាំពាក្យអង្គភាពប្រឆាំងអំពើពុករលួយ បានថ្លែងច្រានចោលរបាយការណ៍អង្គការតម្លាភាពអន្តរជាតិស្ដីពីចំណាត់ថ្នាក់ស្ថានភាពអំពើពុករលួយប្រចាំឆ្នាំរបស់ប្រទេសកម្ពុជា។
អង្គការតម្លាភាពបានចាត់ថ្នាក់ពីកម្រិតអំពើពុករលួយនៅកម្ពុជាក្នុងស្ថានភាពអាក្រក់ ដែលក្នុងឆ្នាំ ២០២២ កម្ពុជាជាប់ចំណាត់ថ្នាក់ទី១៥០ ក្នុងចំណោមប្រទេសទាំង ១៨០ នៅជុំវិញពិភពលោក។
អ្នកនាំពាក្យរដ្ឋាភិបាលកម្ពុជាលោក ផៃ ស៊ីផាន បញ្ជាក់ថា រាជរដ្ឋាភិបាលមិនដែលចាប់អារម្មណ៍លើរបាយការណ៍ និងចាត់ថ្នាក់របស់អង្គការតម្លាភាពនោះទេ ព្រោះវិធីសាស្ត្រស្រាវជ្រាវ និងការប្រមូលទិន្នន័យរបស់អង្គការនេះមិនស្របគោលការណ៍អន្តរជាតិ និងមិនត្រឹមត្រូវតាមបែបផែនវិទ្យាសាស្ត្រ និងមិនឆ្លុះបញ្ចាំងការពិតពីកម្ពុជា។
លោក ផៃ ស៊ីផាន ថ្លែងថា៖« របាយការណ៍ហ្នឹង [សន្ទស្សន៍នៃការយល់ឃើញពីអំពើពុករលួយឆ្នាំ២០២២ របស់អង្គការតម្លាភាពអន្តរជាតិ] មិនបានបង្ហាញច្បាស់លាស់អំពីវិធាននៃការស្រាវជ្រាវ ការវាយតម្លៃ តាមបែបវិទ្យាសាស្ត្រទេ គឺធ្វើតាមតែរបៀបបរិមាណ [បរិមាណវិស័យ] តែប៉ុណ្ណោះ។ ដូច្នេះរបាយការណ៍មិនមែនជាលទ្ធផលដែលរកឃើញជាវិទ្យាសាស្ត្រ ជាការវាយតម្លៃរបស់យើង គ្រាន់តែជាការផ្សាយព័ត៌មានរបស់អង្គការមួយប៉ុណ្ណោះ»។
លោក សយ ច័ន្ទវិចិត្ត អ្នកនាំពាក្យអង្គភាពប្រឆាំងអំពើរលួយ (ACU) បញ្ជាក់ថា ACU មិនដែលទទួលស្គាល់ឡើយចំពោះការដាក់ពិន្ទុលើកម្រិតអំពើរលួយពីអង្គការតម្លាភាព ព្រោះរបាយការណ៍អង្គការនេះមិនស្របតាមគោលការណ៍អន្តរជាតិ ហើយផ្ទុយពីការពិតទាំងស្រុង ប៉ុន្តែទោះជាយ៉ាងណា ACU តែងតែយកចិត្តទុកដាក់ពិនិត្យព័ត៌មាននិងអនុសាសន៍នានាដើម្បីយកមកពិចារណា ដើម្បីបង្កើនប្រសិទ្ធភាពការងារពាក់ព័ន្ធការប្រយុទ្ធប្រឆាំងអំពើពុករលួយនៅកម្ពុជា។
លោក សយ ច័ន្ទវិចិត្ត ថ្លែងថា៖« រដ្ឋាភិបាលតែងតែចាត់ទុកការងារកំណែទម្រង់ជាចំណុចស្លាប់រស់ ក្នុងការអនុវត្តកម្មវិធីនយោបាយរបស់ខ្លួន។ ខ្ញុំមិនធ្វើការវាយតម្លៃទេ ប៉ុន្តែខ្ញុំគិតថាយើងទាំងអស់គ្នាពិតជាមើលឃើញពីការប្រែប្រួលក្នុងសង្គមយើងពី ១ ថ្ងៃ ទៅ ១ ថ្ងៃ ពាក់ពន្ធ័នឹងអភិបាលកិច្ចល្អ ដែលកើតចេញពីការអនុវត្តគោលនយោបាយកំណែទម្រង់របស់រាជរដ្ឋាភិបាល»។
លោក សយ ច័ន្ទវិចិត្ត បញ្ជាក់ថា រាជរដ្ឋាភិបាលបានយកចិត្តទុកដាក់លើកិច្ចការប្រឆាំងអំពើពុករលួយដែលបាននិងកំពុងធ្វើ និងមានការងារចំពោះមុខជាច្រើនទៀតដែលត្រូវធ្វើបន្ត ក្នុងគោលដៅនាំឱ្យកម្ពុជាក្លាយទៅជាសង្គមមួយដ៏ស្អាតស្អំ នាពេលខាងមុខ។
អង្គការតម្លាភាពបានចាត់ថ្នាក់ពីកម្រិតអំពើពុករលួយនៅកម្ពុជាក្នុងស្ថានភាពអាក្រក់ ដែលក្នុងឆ្នាំ ២០២២ កម្ពុជាជាប់ចំណាត់ថ្នាក់ទី១៥០ ក្នុងចំណោមប្រទេសទាំង ១៨០ ដែលល្អជាងឆ្នាំ ២០២១។ ចំណាត់ថ្នាក់នេះ បង្ហាញពីភាពប្រសើរជាងឆ្នាំមុន ខណៈឆ្នាំ២០២១ កម្ពុជាស្ថិតក្នុងចំណាត់ថ្នាក់ទី១៥៧ ប៉ុន្តែជាចំណាត់ថ្នាក់ទាបបើធៀបទៅក្នុងតំបន់ ដោយកម្ពុជាស្ថិតក្នុងស្ថានភាពអំពើអាក្រក់លំដាប់ទី២ នៅអាស៊ីអាគ្នេយ៍បន្ទាប់ពីម៉ាយ៉ាន់ម៉ា ហើយអាក្រក់លំដាប់ទី៣ នៅអាស៊ីប៉ាស៊ីហ្វិក បន្ទាប់ពីមីយ៉ាន់ម៉ា និងកូរ៉េខាងជើង។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានថ្លែង សរសើររដ្ឋាភិបាលកម្ពុជាចំពោះការខិតខំប្រឹងប្រែងធ្វើឱ្យថយចុះជាលំដាប់នូវអំពើពុករលួយខ្នាតតូច នាប៉ុន្មានឆ្នាំចុងក្រោយនេះ ដែលលោកកត់សម្គាល់លើវិធានកំណែទម្រង់ការគ្រប់គ្រងហិរញ្ញវត្ថុសាធារណៈ ការផ្តល់សេវាច្រកចេញចូលតែ១ ការគ្រប់គ្រងសារពើពន្ធ ការផ្តល់សេវាសាធារណៈនៅក្នុងប្រទេស។
លោក ប៉ិច ពិសី ថ្លែងថា៖ «យើងក៏ជឿផងដែរថា កំណែទម្រង់ការគ្រប់គ្រងហិរញ្ញវត្ថុសាធារណៈត្រូវតែដើរទន្ទឹមគ្នាជាមួយនឹងកំណែទម្រង់លទ្ធិប្រជាធិបតេយ្យ និងនីតិរដ្ឋ។ ប្រសិនបើគ្មានកំណែទម្រង់ទាំងនេះទេ កំណែទម្រង់ការគ្រប់គ្រងហិរញ្ញវត្ថុសាធារណៈនឹងពុំមានប្រសិទ្ធភាព និងមិនមាននិរន្តរភាព ដោយសារតែកង្វះខាតការត្រួតពិនិត្យនិងគណនេយ្យភាពដែលចាំបាច់ ដើម្បីធានាថាថវិកាឬមូលនិធិសាធារណៈត្រូវបានប្រើប្រាស់ប្រកបដោយការទទួលខុសត្រូវ និងតម្លាភាព»។
លោក សឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (ADHOC) និងជាអ្នកឃ្លាំមើលសង្គម ថ្លែងគាំទ្រទៅលើសន្ទស្សន៍ចាត់ថ្នាក់អំពើពុករលួយរបស់អង្គការតម្លាភាពអន្តរជាតិ ខណៈលោកមើលឃើញពីស្ថានភាពអំពើពុករលួយ ការសូកប៉ាន់ ជាក់ស្តែងក្នុងសង្គម ជាពិសេសការធ្លាក់ចុះខ្លាំងនៃប្រព័ន្ធយុត្តិធម៌នៅកម្ពុជា ដែលជាធាតុចម្បងនាំឱ្យកើតមានអំពើពុករលួយ។
លោក សឹង សែនករុណា ថ្លែងថា៖ «ខ្ញុំថារដ្ឋាភិបាលគួរមានការស្រាវជ្រាវបន្ថែម បើទោះបីជាយើងមិនជឿជាក់លើរបាយការណ៍របស់អង្គការតម្លាភាព គួរធ្វើការស្រាវជ្រាវឱ្យបានច្បាស់លាស់មួយ កុំស្រាវជ្រាវទៅតាមអ្វីដែលខ្លួនចង់បាន។ បើសិនឱ្យស្ថាប័នក្នុងជួររដ្ឋាភិបាលស្រាវជ្រាវ ខ្ញុំយល់ថា រកមិនឃើញទេ ឃើញតែលទ្ធផលរបាយការណ៍ល្អរហូត មិនអាចរកឃើញធាតុពិតទេ»។
លោក សឹង សែនករុណា បន្ថែមថា រដ្ឋាភិបាលគួរបង្កើតគណៈកម្មការឯករាជ្យមួយដែលមានអំណាចក្នុងការស្រាវជ្រាវដ៏ច្បាស់លាស់ពីស្ថានភាពអំពើពុករលួយនៅក្នុងសង្គម និងអាចដោះស្រាយ ចាត់វិធានការ និងផ្តន្ទាទោស ដល់អ្នកប្រព្រឹត្តអំពើពុករលួយ ដោយតម្លាភាព ទាំងការអនុវត្តលើជនតូចតាច និងអ្នកមានអំណាច។
លោក ករុណា ថ្លែងថា៖«បើសិនជារដ្ឋាភិបាលមានឆន្ទៈពិតប្រាកដ(ដោះស្រាយបញ្ហាពុករលួយ)។បើសិនជាអាចដោះស្រាយបាន កម្ពុជាមុខជាបង្កើនល្បឿនអភិវឌ្ឍន៍លឿនជាងនេះ»។
របាយការណ៍ស្តីសន្ទស្សន៍នៃអំពើរលួយឆ្នាំ ២០២២ នេះ អង្គការតម្លាភាពពិភពលោកបានសិក្សា និងជ្រើសរើសព័ត៌មាននិងទិន្នន័យពីប្រភពធំៗ ចំនួន ៨ រួមមានការស្ទង់មតិពីធុរជនរបស់វេទិកាសេដ្ឋកិច្ចពិភពលោក, Asian Intelligence, ចំណាត់ថ្នាក់ហានិភ័យប្រចាំប្រទេសស្ដីពីការយល់ដឹងជាសកល, ចំណាត់ថ្នាក់ហានិភ័យប្រចាំប្រទេសរបស់ទីភ្នាក់ងារសេដ្ឋវិទូ ប្រភពនៃសន្ទស្សន៍ប្រជាធិបតេយ្យ និងគោលនយោបាយពីធនាគារពិភពលោកជាដើម។
អង្គការនេះបានដាក់ចេញអនុសាសន៍ចំនួន ៦ ចំណុច ដល់រដ្ឋាភិបាលដើម្បីកែលម្អស្ថានភាពអំពើពុករលួយ ដែលជារួមស្នើដល់រដ្ឋាភិបាល ធ្វើការបើកលម្ហសេរីភាពបញ្ចេញមតិ ពន្លឿនការអនុម័តលើសេចក្ដីព្រាងច្បាប់ទទួលបានព័ត៌មាន ធ្វើកែលម្អច្បាប់ប្រយុទ្ធប្រឆាំងអំពើពុករលួយ កែលម្អប្រព័ន្ធយុត្តិធម៌ឱ្យមានភាពប្រសើរឡើង ជាពិសេសពង្រឹងអំណាចនិងសិទ្ធិសេរីភាពនៃស្ថាប័ន និងបុគ្គល និងចាត់វិធានការបង្ក្រាបបទល្មើសអំពើពុករលួយក្នុងទ្រង់ទ្រាយធំ៕
វីដេអូ៖
