ភ្នំពេញៈ ដោយ​បាន​បង្ហាញ​ក្តីបារម្ភ​ពី​ករណី​គ្រោះ​ថ្នាក់​ចរាចរ​ណ៍ថា ​ជា​មូលហេតុ​ចម្បង​មួយ​នៃ​ការបាត់​បង់​ជីវិត​និង​រង​របួស​នៅ​កម្ពុជា​ លោក​នាយក​រដ្ឋ​មន្ត្រី ហ៊ុន ​សែន បាន​អំពាវ​ឱ្យ​យុវជន​ទាំង​អស់​ឱ្យ​គោរព​ច្បាប់​ ខណៈ​គ្រោះ​ថ្នាក់​ចរា​ចរណ៍​បាន​និង​កំពុង​ក្លាយ​ជា​ឧប​សគ្គ​ដ៏​ធំ​សម្រាប់​សិស្សា​នុសិស្ស​នា​ពេល​បច្ចុប្បន្ន​។​


​ថ្លែង​នៅ​ក្នុង​ពិធី​ជួប​សំណេះ​សំណាល​ជា​មួយ​សិស្ស​ជាប់​សញ្ញា​បត្រ​មធ្យម​សិក្សាទុ​តិយ​ភូមិ​និទ្ទេស​Aនិង​ការប្រឡង​សញ្ញា​បត្រ​បច្ចេក​ទេស​និង​វិជ្ជា​ជីវៈ​កម្រិត​៣ ឆ្នាំ​ ២០២២ នា​ព្រឹក​ថ្ងៃទី ​២​ ខែកុម្ភៈ នៅ​សាល​ OCIC ជ្រោយ​ចង្វារ លោក ​ហ៊ុន​ សែន បាន​លើក​ឡើង​ថា៖ «​ចៅ​កើត​នៅ​ក្នុង​កាលៈ​ទេសៈ​នេ ​គឺ​ចៅៗ​សំណាង​ណាស់​»​។​

​លោក​នាយក​រដ្ឋម​ន្ត្រី ​ហ៊ុន សែន បាន​បញ្ជាក់​ថា ឧបសគ្គ​ដំ​ធំ​សម្រាប់​សិស្សានុ​សិស្ស​នា​ពេល​នេះ​គឺ​កត្តា​គ្រោះ​ថ្នាក់​ចរា​ចរណ៍​ដែល​ខុស​ពីឧប​សគ្គ​របស់​យុវជន​ជំនាន់​មុនគឺ​សង្គ្រាម ​ព្រោះ​ភ្លើង​សង្គ្រាមបាន​ធ្វើឱ្យ​យុវ​ជន​សម័យ​មុន​បាត់​បង់​ឱកាស​សិក្សា​រៀន​សូត្រ​។​

​ជា​មួយ​គ្នានេះ ​លោក​ក៏បាន​អំពាវ​នាវ​ដល់​សិស្សានុ​សិស្ស​ទាំង​អស់​គោរព​ច្បាប់​ចរា​ចរណ៍​ និង​មាន​ការ​ប្រយ័ត្ន​ខ្ពស់​ជាប់​ជានិច្ច​ ព្រោះ​គ្រោះ​ថ្នាក់​ចរា​ចរណ៍​ គឺជា​មូល​ហេតុ​នៃ​ការ​ស្លាប់​នាំមុខ​គេ​នៅ​កម្ពុជា​ដែល​មិន​ត្រឹមតែ​បាន​បំផ្លាញ​អាយុ​ជី​រិត​មនុស្ស​ប៉ុណ្ណោះ​ទេ​ តែវា​ក៏បាន​ប៉ះពា​ល់​ដល់​ការ​អភិវឌ្ឍ​របស់​កម្ពុជា​ថែម​ទៀត​។​


​លោកហ៊ុ​ន សែន បាន​បន្ត​យ៉ាង​ដូច្នេះ​ថា​៖«​ចៅៗ ​សំណាង​របស់​ចៅៗ​នៅ​ត្រង់​ថា ​ចៅៗ​អត់​ត្រូវ​ការ​រត់លូន ​បញ្ហា​ចៅៗ​ គឺ​នៅ​សេស​សល់​ តែ​មិន​មែន​ជា​បញ្ហា​ធ្ងន់ធ្ងរ​ដូច​យុវជន​សម័យមុ​ន​ទេ ប៉ុន្តែ​នាពេល​ប្ចុ​ប្បន្ន​បញ្ហា​ដែល​ចៅៗ​ត្រូវ​ប្រុង​ប្រយ័ត្ន​រឿង​គ្រោះ​ថ្នាក់​ចរា​ចរណ៍ ​ព្រោះ​ភាគ​ច្រើន​សិស្ស​របស់​យើង​មាន​ទាំង​អ្នកជិះ​កង់​ ជិះ​ម៉ូតូ​ ដែល​ទាម​ទារ​ឱ្យ​ចៅៗ​គោរព​ច្បាប់​ចរា​ចរណ៍ បើក​បរ​ត្រឹមត្រូ​វដែល​ចាំ​បាច់​ត្រូវ​ចាប់​ផ្តើម​ពី​ខ្លួនឯង​ផ្ទាល់​ ព្រោះ​ចរា​ចរណ៍គឺជា​ឧបសគ្គ​សម័យ​ថ្មី​សម្រាប់​ការសិក្សា​របស់​សិស្ស គឺ​ស្ថិត​នៅ​លើ​ខ្លួន​យើង​ដែល​ជា​អ្នក​បញ្ចៀស​គ្រោះ​ថ្នាក់​នេះ​»​។


​ជាង​នេះទៅ​ទៀត ​លោក​នាយក​រដ្ឋមន្ត្រី​ក៏​បាន​ថ្លែង​ដែរ​ថា ដើម្បី​រួម​ចំណែក​ធានា​​សុវត្ថិ​ភាព​ចរាចរ​ណ៍ លោក​ក៏បាន​ជំរុញ​ឱ្យ​គ្រប់​អង្គ​ភាព ​គ្រប់​មូល​ដ្ឋាន​ ត្រូវ​ជំរុញ​ការ​ផ្សព្វ​ផ្សាយ​អប់រំ​លើក​ទឹក​ចិត្ត​ប្រជា​ពលរដ្ឋ ​ពិសេស​យុវជន​ជា​អ្នក​ប្រើ​ប្រាស់​ផ្លូវ​ទាំង​អស់ ​ឱ្យចូល​រួម​គោ​រព​ច្បាប់​ស្ដីពី​ចរា​ចរណ៍​ផ្លូវ​គោក​ ​។​

​ពាក់​ព័ន្ធ​នឹង​ការ​លើក​ឡើង​នេះ ​លោក ​គង់ សុវណ្ណ ស្ថាប​និក និង​ជាទី​ប្រឹក្សា​យុទ្ធ​សាស្ត្ររ​បស់​អង្គការ​ខេ​ម​សេ​ហ្វ បាន​ថ្លែង​ថា បញ្ហា​កត្តា​ហានិ​ភ័យ​នៃ​គ្រោះ​ថ្នាក់​ចរាចរណ៍​ភាគ​ច្រើន​កើត​ឡើង​ដោយ​សារ​មនុស្ស​មាន​ការ​ធ្វេស​ប្រហែស ​ប្រញាប់​ មិន​អធ្យា​ស្រ័យ​​ក្នុង​ការ​បើក​បរ​ដោយ​បើក​បរ​ក្នុង​ល្បឿន​លឿន បើក​បរ​ក្នុង​ឥទ្ធិពល​គ្រឿង​ស្រវឹង​ជា​ដើម​ដែល​ជា​ហានិ​ភ័យ​ខ្ពស់​ធ្វើឱ្យ​ទំហំ​នៃ​គ្រោះថ្នាក់​ចរាចរណ៍​កាន់តែ​មាន​សភាព​ធ្ងន់​ធ្ងរ​ទៅៗ​។​

​អ្នក​ជំនាញ​ខាង​សុវត្ថិ​ភាព​ចរាចរណ៍​រូប​នេះ ​បាន​ស្នើឱ្យ​ប្រជា​ពលរដ្ឋ ពិសេស​យុវជន​សូមកុំ​ឱ្យ​អ្នក​បើក​បរ​ទាំង​អស់ បើកបរ​ក្នុង​ឥទ្ធិពល​គ្រឿង​ស្រវឹង​និង​បង្កើន​ការ​ប្រុង​ប្រ​យ័ន្ន​ខ្ពស់ ​ខណៈ​លោក​ក៏​ចង់​ឱ្យ​គ្រប់​គ្នា​ត្រូវ​រួមគ្នា​បន្ត​ទប់​ស្កាត់​គ្រោះ​ថ្នាក់​ចរាចរ​ណ៍​ដោយ​មិន​បន្ធូរ​ដៃ​ផង​ដែរ​។​

​យោ​ងតាម​របាយ​ការណ៍​អគ្គ​លេខាធិ​ការ​ដ្ឋាន​គណៈ​កម្មាធិ​ការ​ជាតិ​សុវត្ថិ​ភាព​ចរា​ចរណ៍​ផ្លូវគោ​ក (​គ​.​ស​.​ច​.​គ​) កាល​ពី​ថ្ងៃទី ​៣០​ ខែមករា ​ឆ្នាំ​ ២០២៣ ​បាន​ឱ្យ​ដឹង​ថា ពេញ​ ១ ឆ្នាំ​ ២០២២ ​បញ្ហា​គ្រោះ​ថ្នាក់​ចរា​ចរណ៍​នៅ​ទូទាំង​ប្រទេស​កម្ពុជា​ បាន​បណ្ដាល​ឱ្យ​មាន​មនុស្ស​ស្លាប់​ចំនួន​ជាង​ ១ ៧០០ ​នាក់ ​បើ​ធៀប​នឹង​ឆ្នាំ​ ២០២១​ បាន​កើន​ឡើង​ដល់​ ១៤​ ភាគ​រយ ​ក្នុង​នោះ​បាន​បញ្ជូន​ជន​ល្មើស​បង្កឱ្យ​មាន​គ្រោះ​ថ្នាក់​ចរាច​រណ៍ទៅ​តុលា​ការ​ជាង ​៣០០​ នាក់​។​

​របាយ​ការណ៍​ដដែល​បាន​បញ្ជាក់​ថា ក្នុង​ចំណោម​គ្រោះ​ថ្នាក់​ចរា​ចរណ៍​នេះ ​មាន​អ្នក​ស្លាប់​ភាគ​ច្រើន​នៅ​រាជ​ធានី​ភ្នំពេញ​ចំនួន​ ២៧២​ នាក់ ខេត្ត​កណ្តាល​ចំនួន​ ១៥៧​ នាក់ និង​ខេត្ត​កំពង់​ចាម​ចំនួន​ ១៣១​ នាក់​។

​ដោយ​ឡែក ចំពោះ​មូល​ហេតុ​ចម្បង​ដែល​បាន​បណ្ដាល​ឱ្យ​មាន​គ្រោះ​ថ្នាក់​ចរាចរ​ណ៍​នៅ​កម្ពុជា ​គឺ​បណ្តាល​មក​ពីការ​បើក​បរ​ដោយ​លើស​ល្បឿន​កំណត់​៣៩​ភាគ​រយ មិន​គោរព​សិទ្ធិ​ ២៤​ ភាគ​រយ មិន​ប្រកាន់​ស្ដាំ​ ១១ ​ភាគ​រយ វ៉ា​ជែង​ ១០​ ភាគ​រយ បត់​ ៩ ​ភាគ​រយ ស្រវឹង​ ៤​ ភាគ​រយ កត្តា​យាន​យន្ត​ ៣​ ភាគ​រយ និង​ងងុយ​ ១ ភាគ​រយ។ ជាង​នេះ​ទៀត​ក្នុង​ចំណោម​ជនរង​គ្រោះ​ជិះ​ម៉ូតូ​សរុប​ជាង ៤ ​ពាន់​នាក់ ​គឺមាន​អ្នក​មិន​ពាក់​មួក​សុវត្ថិ​ភាព​ជាង​៣​ពាន់​នាក់​ដែល​ភាគ​ច្រើន​មិន​ពាក់​នៅ​ពេល​យប់​៕