ភ្នំពេញៈ​ លោកនាយក​រដ្ឋមន្ត្រី ហ៊ុន សែន បាន​ណែនាំ​ទៅដល់​គ្រប់​សាលារៀន​ទាំងអស់​ត្រូវ​ទប់ស្កាត់​ធ្វើយ៉ាងណា​កុំឱ្យ​មេរោគ​កូ​វីដ​​ ១៩​ ឆ្លង​ចូលក្នុង​សាលារៀន​ឱ្យសោះ ហើយ​ត្រូវខិតខំ​ទប់ស្កាត់ ការពារ​កុំ​ឱ្យមាន​ការរីក​រាលដាល​តាមរយៈ​ការអនុវត្ត​វិធានការ​សុខាភិបាល​។​


​លោក​បាន​ថ្លែង​ដូចនេះ​នា​ថ្ងៃទី​ ២ ​កុម្ភៈ ក្នុង​ពិធី​សំណេះសំណាល​ជាមួយ​សិស្ស​និទ្ទេស A ក្នុង​ឆ្នាំ​សិក្សា ​២០២១-២០២២ សរុប​ជាង ​១ ​ពាន់​នាក់​។ ជំនួប​សំណេះសំណាល​នេះ​ធ្វើឡើង​នៅ​មជ្ឈមណ្ឌល​សន្និបាត និង​ពិព័រណ៍​កោះ​ពេជ្រ​។

​លោក ហ៊ុន សែន ថ្លែងថា​៖ «​ឆ្នាំនេះ បញ្ហា​កូ​វីដ ​១៩ បាន​ធូរស្រាល ហើយ​ការធូរស្រាល​នេះ​វា​ក៏មាន​ការរួមចំណែករ​បស់​លោកគ្រូ អ្នកគ្រូ សិស្សានុសិស្ស​នៅ​ទូទាំងប្រទេស ហើយក៏​សុំឱ្យ​លោកគ្រូ អ្នកគ្រូ សិស្សានុសិស្ស​បន្ត​ខិតខំ​ធ្វើយ៉ាងណា​កុំឱ្យ​សាលា​របស់​យើង​មាន​កូ​វីដ ហើយ​ប្រសិនបើ​មាន​ក៏ត្រូវ​ខិតខំ​ធ្វើយ៉ាងណា​កុំ​ឱ្យមាន​ការរីក​រាលដាល​ដោយ​ត្រូវ​ជំរុញឱ្យមាន​ការអនុវត្ត​វិធានការ​សុខាភិបាល​ឱ្យបាន​ត្រឹមត្រូវ​»​។​

​ជាមួយគ្នានេះដែរ លោកនាយក​រដ្ឋមន្ត្រី ក៏បាន​អំពាវនាវ​ឱ្យ​លោកគ្រូ អ្នកគ្រូ និង​សិស្សានុសិស្ស​ទាំងអស់​បន្ត​ទៅ​ទទួលយក​ការចាក់​វ៉ាក់សាំង​កូ​វីដ​ ១៩​ ដោយ​មិនអាច​មានការ​ធ្វេសប្រហែស​បានទេ​ដោយសារ​កូ​វីដ​ ១៩​ មិនទាន់​ទៅណា​ឡើយ​។​


​លោក​បញ្ជាក់ថា៖ «​យើង​មិនត្រូវ​បាត់​ការប្រុងប្រយ័ត្ន​នោះទេ ហើយ​ត្រូវ​គ្រប់គ្រង​ឱ្យបាន​ទាក់ទង​នឹង​កូ​វីដ​នេះ ហើយ​រឿង​កន្លងទៅ​ដែល​យើង​ប្រញាប់​បិទ​សាលា​ភ្លាមៗ​គឺ​កង្វល់​ដ៏​ធំ​បំផុត​របស់​យើង​គឺ​បារម្ភ​រឿង​គ្រូបង្រៀន និង​សិស្ស​ដែល​អាច​នឹងមាន​ការស្លាប់ និង​មាន​ការរីក​រាលដាល​ខ្លាំង​»​។​


​វិធានការ​សុខាភិបាល «៣ ​កុំ ៣ ​ការពារ​» នៅតែមាន​ប្រសិទ្ធភាព ហើយ​លោកនាយក​រដ្ឋមន្ត្រី សង្ឃឹមថា លោកគ្រូ អ្នកគ្រូ នឹង​នៅតែ​បន្ត​ការយកចិត្តទុកដាក់ រួមទាំង​គ្រប់​មជ្ឈដ្ឋាន​ទាំងអស់​ត្រូវ​រួមគ្នា និង​យកចិត្តទុកដាក់​ឱ្យ​សាលារៀន​ក្លាយទៅជា​ទីកន្លែង​នៃ​ការ​ចង់ទៅ​របស់​សិស្ស​។​

​លោកស្រី ឱ វណ្ណឌី​ន អ្នកនាំពាក្យ​ក្រសួងសុខាភិបាល និង​ជា​ប្រធាន​គណៈកម្មការ​ចំពោះ​កិច្ច​ចាក់​វ៉ាក់សាំង​កូ​វីដ​ ១៩ ក្នុង​ក្របខ័ណ្ឌ​ទូទាំងប្រទេស (​គ​.​វ​.​ក​១៩) បានលើកឡើង​កាលពី​ថ្ងៃទី​ ៣១ ​មករា​ថា សិស្សានុសិស្ស ប្រជាពលរដ្ឋ កម្មករ​កម្មការិនី​ទាំងអស់ កុំ​ពន្យារពេល​ចាក់​វ៉ាក់សាំង​ដូ​ស​ជំរុញ​លើសពី​រយៈពេល​ដែល​ក្រសួងសុខាភិបាល​បានកំណត់​។​

​លោកស្រី​បាន​បញ្ជាក់ថា​៖ «​រយៈពេល​ពី​ដូ​ស​ជំរុញ​ ១ ទៅ​ដូ​ស​ជំរុញ​ ១ ​ទៀត គឺ​ពី​ ៤ ទៅ​ ៦​ ខែ និង​ពី​ ៣ ​ខែ​ឡើងទៅ សម្រាប់​អ្នកជា​សះស្បើយ​ពី​ជំងឺ​កូ​វីដ​ ១៩ ហើយ​ត្រូវ​ចងចាំ​ថ្ងៃខែ​ឆ្នាំ​ដែល​បុគ្គល​បាន​ចាក់​ដូ​ស​ចុងក្រោយ សម្រាប់​ការចាក់​ដូ​ស​បន្តបន្ទាប់​ទៀត​នៅពេល​ដល់​វេន​ចាក់​ដោយ​មិន​ហួសពេល​យូរពេក​ដែល​ធ្វើឱ្យ​កងការពារ​ក្នុង​សរីរាង្គកាយ​បុគ្គល​នឹង​ធ្លាក់​ចុះខ្សោយ ឬ​ចុះ​អស់​តែម្តង​»​។

​ទាក់ទង​នឹង​ការចាក់​វ៉ាក់សាំង​កូ​វីដ​ ១៩​ នេះដែរ​លោកស្រី​ក៏បាន​ណែនាំ​ទៅដល់​គណៈនាយក​សា​លា ឱ្យ​បន្ត​យកចិត្តទុកដាក់​ដល់​ការចាក់​វ៉ាក់សាំង​កូ​វីដ​ ១៩ ដល់​សិស្សានុសិស្ស និង​អ្នកគ្រូ​លោកគ្រូ​ព្រមទាំង​បុគ្គលិក​សាលា​របស់ខ្លួន ដោយ​រៀបចំ​កាលវិភាគ ដើម្បីឱ្យ​ក្រុមគ្រូពេទ្យ​មក​ផ្ដល់​សេវា​ការចាក់​វ៉ាក់សាំង​កូ​វីដ​ ១៩​ នៅ​សាលា​ផ្ទាល់​តែម្ដង ទៅតាម​វេន និង​បន្ត​ការអនុវត្ត​វិធានការ​អប់រំ ការពារ បង្ការ និង​ទប់ស្កាត់​ការរីក​រាលដាល ឬ​ផ្ទុះឡើង​សាជាថ្មី​នៃ​ជំងឺឆ្លង​ដ៏​កាច​សាហាវ​នេះ​ជា​បន្តទៀត​។

​សូមបញ្ជាក់ថា បច្ចុប្បន្ន​ទីតាំង​ចាក់​វ៉ាក់សាំង​កូ​វីដ​ ១៩ មាន​នៅតាម​មូលដ្ឋាន​សុខាភិបាល​សាធារណៈ ទូទាំង ២៥ រាជធានី-​ខេត្ត និង​តាម​មន្ទីរពេទ្យ​ជាតិ​ដែល​ផ្តល់​ភាពងាយស្រួល​ជូន​ដល់​ពលរដ្ឋ​អាច​ទៅ​ទទួល​វ៉ាក់សាំង​បាន​។​

​បើតាម​ក្រសួងសុខាភិបាល គិត​ត្រឹម​ថ្ងៃទី​ ១​ កុម្ភៈ ឆ្នាំ ​២០២៣ លទ្ធផល​ការចាក់​វ៉ាក់សាំង​កូ​វីដ​ធៀប​នឹង​ចំនួន​ប្រជាជន​សរុប​ ១៦ លាន​នាក់​ចាក់​បាន ​៩៥,៣៩%​។​

​សម្រាប់​អត្រា​ចាក់​ដូ​ស​ទី​៣ មាន​ជាង ១០,៥ លាន​នាក់ ដូ​ស​ទី​ ៤ មាន​ជិត​ ៥​ លាន​នាក់ ដូ​ស​ទី​ ៥​ ជាង​ ១,៥ លាន​នាក់ និង​ដូ​ស​ទី​៦ មាន​ជាង​ ១៦ ​ម៉ឺន​នាក់​៕