កងកម្លាំងមួកខៀវកម្ពុជាមុនចេញដំណើរទៅបំពេញបេសកកម្មមនុស្សធម៌នៅប្រទេសលីបង់ កាលពីថ្ងៃទី ៥ ខែកុម្ភៈ ឆ្នាំ ២០២៣។ រូបថត មជ្ឈមណ្ឌលជាតិរក្សាសន្ដិភាព
ភ្នំពេញៈ កម្ពុជាបានបន្តបញ្ជូនកងកម្លាំងមួកខៀវ ដែលជាកងកម្លាំងប្តូរវេនចំនួន ២១៦ នាក់ ចេញទៅបំពេញបេសកកម្មមនុស្សធម៌ ក្រោមឆត្រអង្គការសហប្រជាជាតិ (អសប ឬ UN) នៅប្រទេសលីបង់ កាលពីថ្ងៃទី ៥ ខែកុម្ភៈ ខណៈនៅថ្ងៃដដែល កងកម្លាំងមួកខៀវ ដែលបានបំពេញបេសកកម្មនៅប្រទេសនេះ ក៏បានធ្វើមាតុភូមិនិវត្តន៍មកដល់កម្ពុជាវិញ បន្ទាប់ពីបញ្ចប់បេសកកម្មរយៈពេល ១ ឆ្នាំ។
សេចក្តីប្រកាសព័ត៌មានរបស់មជ្ឈមណ្ឌលជាតិរក្សាសន្តិភាព បញ្ជាក់នាថ្ងៃទី ៦ ខែកុម្ភៈ ថា កម្ពុជា បានបន្តបញ្ជូនកងកម្លាំងវិស្វកម្មលេខ ៨២៧ ដែលជាកងកម្លាំងប្តូរវេនចំនួន ២១៦ នាក់ ចេញទៅបំពេញបេសកកម្មមនុស្សធម៌ក្រោម ឆត្រអង្គការសហប្រជាជាតិ (UN) នៅសាធារណរដ្ឋលីបង់។ នៅរាត្រីថ្ងៃដដែលនោះ កងកម្លាំងវិស្វកម្មលេខ ៨២៩ ក៏បានធ្វើមាតុភូមិនិវត្តន៍មកដល់កម្ពុជាវិញ បន្ទាប់ពីបញ្ចប់បេសកកម្ម ក្នុងរយៈពេល ១ ឆ្នាំ ដ៏ជោគជ័យ និងនាំកិត្យានុភាពជូនជាតិ។
ពិធីជូនដំណើរ និងទទួលកងទ័ពមួកខៀវកម្ពុជា បានធ្វើឡើង ក្រោមអធិបតីភាព លោក សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព ព្រមទាំងថ្នាក់ដឹកនាំ នៃមជ្ឈមណ្ឌលជាតិរក្សាសន្តិភាព នៅព្រលានយន្តហោះ អន្តរជាតិភ្នំពេញ។
លោក សែម សុវណ្ណនី បានថ្លែងក្នុងពិធីនោះថា៖ «បេសកកម្ម នៅសាធារណរដ្ឋលីបង់ ជាឆ្នាំទី១៣ ហើយកងវិស្វកម្មលេខ ៨២៩ គឺជាកងទី១២ ដែលបានចូលរួមអនុវត្តបំពេញភារកិច្ចប្រកបដោយផ្លែផ្កា ព្រមជាមួយនឹងលទ្ធផល គួរជាទីមោទនៈ»។
លោក សុវណ្ណនី បានបន្ថែមថា៖ «ជាមួយគ្នា កងនេះរក្សាបាននូវភាពស្អាតស្អំ មានវិន័យល្អ ព្រមទាំងអនុវត្តយ៉ាងខ្ជាប់ខ្ជួនតាមនិយាមរបស់អង្គការសហប្រជាជាតិ ដោយយកសុវត្ថិភាពជាចម្បង រហូតទទួលបានជោគជ័យ ដោយមិនមានសមាជិកណាម្នាក់របួស ឬពលី ដោយយថាហេតុណាមួយឡើយ»។
កងកម្លាំងមួកខៀវកម្ពុជា ដែលត្រូវបានបញ្ជូនទៅបំពេញបេសកកម្មមនុស្សធម៌នៅលីបង់ កាលពីថ្ងៃទី ៥ ខែកុម្ភៈ។ រូបថត មជ្ឈមណ្ឌលជាតិរក្សាសន្តិភាព
លោកក៏បានក្រើនរំឭកដល់កងកម្លាំង ដែលត្រូវប្តូរវេនទាំង ២១៦ នាក់ បន្តរួមសាមគ្គីគ្នា ជាធ្លុងមួយ និងត្រូវគិតគូរពីសុវត្ថិភាពជាចម្បង ពិសេសអំឡុងពេលអនុវត្តភារកិច្ច ដោយមិនត្រូវមើលស្រាលស្ថានការណ៍ណាមួយឡើយ។
លោក សែម សុវណ្ណនី ជំរុញកងកម្លាំងត្រូវប្តូរវេននេះត្រូវចេះដកបទពិសោធន៍ និងមេរៀនល្អៗ កែតម្រូវរាល់កំហុសឆ្គង ដែលបានកើតមានឡើង ដើម្បីសម្រេចបានជោគជ័យជូនដល់ប្រទេសជាតិ ក្រុមគ្រួសារ និងខ្លួនឯងផ្ទាល់។
លោកថ្លែងថា៖ «ត្រូវចងចាំថា វត្តមានរបស់កម្លាំងយើងនីមួយៗ មិនត្រឹមតែតំណាងឱ្យ អង្គការសហ ប្រជាជាតិ កងយោធពលខេមរភូមិន្ទ មជ្ឈមណ្ឌលជាតិប៉ុណ្ណោះទេ គឺតំណាងឱ្យប្រទេសកម្ពុជាទាំងមូល។ ដូច្នេះ គ្រប់សកម្មភាពទាំងក្នុង និងក្រៅម៉ោងធ្វើការ ត្រូវតម្កល់កិត្តិយសជាតិជាចម្បង»។
លោក សែម សុវណ្ណនី បន្តថា ប្រតិបត្តិការរក្សាសន្តិភាព ដែលជាគោលការណ៍សកល បាននិងកំពុងដើរតួនាទីយ៉ាងសំខាន់ តាមរយៈការចូលរួមពីគ្រប់មជ្ឈដ្ឋានជាតិ និងអន្តរជាតិប្រតិបត្តិការរួមគ្នា ក្នុងការជួយដល់បណ្តាប្រទេសដែលរងការហែកហួរដោយសារជម្លោះប្រដាប់អាវុធសង្គ្រាម និងចូលរួមជាមួយសាមីប្រទេស ក្នុងការស្តារនីតិសម្បទា សន្តិភាព ស្ថិរភាព និងការអភិវឌ្ឍ។
លោកបានថ្លែងថា កងកម្លាំងកម្ពុជាដែលបានបំពេញបេសកកម្មរយៈពេល ១ ឆ្នាំ នៅប្រទេសមជ្ឈិមបូព៌ា ដែលមានសីតុណ្ហភាពក្រោមសូន្យអង្សាខុសគ្នាពីប្រទេសកម្ពុជា និងជាតំបន់សម្បូរទៅដោយភ្នំ រងសម្ពាធវិបត្តិសេដ្ឋកិច្ច ជម្លោះព្រំដែនរវាងប្រទេសអុីស្រាអែល។ ទន្ទឹមនឹងការឃ្លាតឆ្ងាយពីគ្រួសារ គឺពិតជាបានលះបង់ដ៏ធំធេង និងមិនអាចកាត់ថ្លៃបាន។
សេចក្តីប្រកាសព័ត៌មានដដែល បានបញ្ជាក់ថា ចាប់តាំងពីឆ្នាំ ២០០៦ រហូតមកដល់ឆ្នាំ ២០២៣ នេះ កម្ពុជាបានសម្រេចបញ្ជូនកងកម្លាំងចូលរួមក្នុងបេសកកម្មរក្សាសន្តិភាពជាង ៨ ពាន់នាក់ នៅក្នុងប្រទេសចំនួន ៩ រួមមាន ប្រទេសស៊ូដង់ ស៊ូដង់ខាងត្បូង ឆាដ អាហ្រ្វិកកណ្តាល លីបង់ ស៊ីប ស៊ីរី ម៉ាលី និងយេម៉ែន។ បច្ចុប្បន្ន កងកម្លាំងយោធាមួកខៀវកម្ពុជា ជាង ៨០០ នាក់ បាននិងកំពុងបំពេញកាតព្វកិច្ចរក្សាសន្តិភាព នៅប្រទេសស៊ូដង់ខាងត្បូង លីបង់ ម៉ាលី និងអាហ្រ្វិកកណ្តាល។
សេចក្តីប្រកាសព័ត៌មានដដែលបញ្ជាក់ទៀតថា កម្ពុជាជាប់ចំណាត់ថ្នាក់លេខ ២ ក្នុងអាស៊ាន និងលេខ ១២ ក្នុងចំណោមប្រទេសទាំងអស់ ដែលបញ្ជូនកងទ័ពមួកខៀវទៅតាមបណ្តាប្រទេសនានាលើពិភពលោក។
លោកគិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ភ្នំពេញប៉ុស្តិ៍ នាថ្ងៃទី ៦ ខែកុម្ភៈ ថា ការបន្តបញ្ជូនកងកម្លាំងមួកខៀវទៅបំពេញបេសកកម្មនេះ គឺមានសារៈសំខាន់ណាស់ សម្រាប់ជាផ្នែកមួយនៃការរួមចំណែករបស់កម្ពុជាក្នុងបេសកកម្មរក្សាសន្តិភាព និងមនុស្សធម៌ របស់អសប ពីព្រោះកម្ពុជា ជាប្រទេសធ្លាប់រងគ្រោះដោយសារ សង្គ្រាម និងគ្រាប់មីន។ មេរៀនទាំងអស់នេះគឺកម្ពុជាចងចាំ។
លោកគិន ភា បានថ្លែងថា៖ «អ៊ីចឹង ការរួមចំណែករបស់កម្ពុជា បង្ហាញពីការយកចិត្តទុកដាក់ពង្រីកនូវតួនាទីរបស់ខ្លួន ដើម្បីឱ្យសកម្មភាពបេសកកម្មសន្តិភាពហ្នឹង វាកាន់តែឈានឡើង»៕
