លោក ដន ប្រាម៉ាត់វីណៃ រដ្ឋមន្ត្រីការបរទេសថៃ (ស្តាំ) និងលោក ប្រាក់ សុខុន រដ្ឋមន្ត្រីការបរទេសកម្ពុជា ក្នុងឱកាសលោកទៅបំពេញទស្សនកិច្ចនៅប្រទេសថៃ ២ ថ្ងៃ គឺនៅថ្ងៃទី២៣-២៤ ខែកុម្ភៈ។ រូបថត ក្រសួងការបរទេស
បន្ទាយមានជ័យៈ កម្ពុជា និងថៃបើកដំណើរការសាកល្បងស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ដើម្បីបង្កើនលំហូរពាណិជ្ជកម្មឆ្លងដែន និងវិនិយោគ។
ពិធីបើកដំណើរការសាកល្បងស្ពាននេះធ្វើឡើងក្រោមអធិបតីភាព លោក ដន ប្រាម៉ាត់វីណៃ រដ្ឋមន្ត្រីការបរទេសថៃ និងលោក ប្រាក់ សុខុន រដ្ឋមន្ត្រីការបរទេសកម្ពុជា ក្នុងឱកាសលោកទៅបំពេញទស្សនកិច្ចនៅប្រទេសថៃ ២ ថ្ងៃ គឺនៅថ្ងៃទី២៣-២៤ ខែកុម្ភៈ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី២៤ ខែកុម្ភៈ ថា៖ «ឯកឧត្តមឧបនាយករដ្ឋមន្ត្រីទាំង២ បានធ្វើជាអធិបតីក្នុងពិធីបើកដំណើរការសាកល្បងស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ដែលនឹងរួមចំណែកបង្កើនលំហូរពាណិជ្ជកម្មឆ្លងដែន និងវិនិយោគ ក៏ដូចជាការធ្វើឱ្យប្រសើរឡើងនូវការតភ្ជាប់ និងសុខុមាលភាពនៃប្រជាជនទាំង២»។
សេចក្តីប្រកាសព័ត៌មានបន្តថា ជាមួយនឹងការកត់សម្គាល់ដោយពេញចិត្តចំពោះនិន្នាការជាវិជ្ជមាននៃទំហំពាណិជ្ជកម្មទ្វេភាគី ភាគីទាំង២បានបញ្ជាក់ពីសារៈសំខាន់ចំពោះការខិតខំប្រឹងប្រែងរួមគ្នាដើម្បីសម្រេចឱ្យបាននូវគោលដៅនៃទំហំពាណិជ្ជកម្មទ្វេភាគីចំនួន ១៥ ពាន់លានដុល្លារអាមេរិក នៅឆ្នាំ ២០២៥។
លោក ប្រាក់ សុខុន បានលើកទឹកចិត្តឱ្យភាគីថៃពង្រីកទីផ្សារថៃ និងលុបរបាំងបច្ចេកទេសពាណិជ្ជកម្ម ដើម្បីអនុគ្រោះដល់កសិផលកម្ពុជា។
ភាគីទាំង២ ក៏បានពិភាក្សាផងដែរ អំពីនីតិវិធីអន្តោប្រវេសន៍ រួមទាំងកិច្ចខិតខំប្រឹងប្រែងរួមដើម្បីផ្ដល់ភាពស្របច្បាប់ជូនពលករកម្ពុជា ដែលស្នាក់នៅប្រទេសថៃ ដោយលោក ប្រាក់ សុខុន បានស្នើឱ្យភាគីថៃពិចារណាបញ្ចុះតម្លៃទិដ្ឋាការការងារដល់ពលករខ្មែរ។
ប្រភពដដែលបញ្ជាក់ថា រដ្ឋមន្ត្រីទាំង២បានស្វាគមន៍ចំពោះការលើកកម្រិតផ្លូវជាតិលេខ៦៧ តភ្ជាប់ពីខេត្តសៀមរាប ប្រទេសកម្ពុជា ទៅខេត្តស៊ីសាកេត ប្រទេសថៃ និងបានគូសបញ្ជាក់អំពីសារៈសំខាន់នៃការពង្រឹងកិច្ចសហប្រតិបត្តិការលើវិស័យអាកាសចរ ដោយផ្តោតទៅលើសុវត្ថិភាព សន្តិសុខ ការកសាងសមត្ថភាពស្ថាប័ន និងការបណ្តុះបណ្តាលធនធានមនុស្ស៕
