ការិយាល័យបង្ការពន្លត់អគ្គិភ័យ និងសង្គ្រោះនៃស្នងការនគរបាលរាជធានីភ្នំពេញ បានឱ្យដឹងថា នៅវេលាម៉ោងប្រមាណ ២ រសៀលនេះ មានករណីអគ្គិភ័យបានឆាបឆេះអគារខុនដូមួយកន្លែងនៅជាន់ទី១៥ ដែលមានទីតាំងស្ថិតនៅសង្កាត់ ទន្លេបាសាក់ ខណ្ឌ ចំការមន។
យោងតាមព័ត៌មានបឋមរបស់ការិយាល័យបង្ការពន្លត់អគ្គិភ័យ និងសង្គ្រោះបានឱ្យដឹងថា នៅវេលាម៉ោង ១និង៥០នាទី រសៀលថ្ងៃទី២៦ ខែកុម្ភៈ ឆ្នាំ ២០២៣នេះ មានអគ្គិភ័យបាននិងកំពុងឆាបឆេះអគារខុនដូមួយកន្លែងនៅជាន់ទី១៥ ជាប់មហាវិថីព្រះនរោត្ដម សង្កាត់ទន្លេបាសាក់ ខណ្ឌចំការមន ដែលទីតាំងឆាបឆេះនេះ គឺនៅក្បែរមជ្ឈមណ្ឌលព្រីនស៍ ផ្លាសា។ ខុនដូនេះរួមមានទាំងអគារពាណិជ្ជ ផ្សារទំនើប និងកន្លែងកម្សាន្ត នៅជាន់ផ្ទាល់ដីផងដែរ។
របាយការណ៍បឋមពីសមត្ថកិច្ច បានឱ្យដឹងថា ក្រោយពីអន្តរាគមន៍ពន្លត់អគ្គិភ័យអស់រយៈពេលជាង ៣០ នាទីមកនេះ គឺកម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ គ្រប់គ្រងស្ថានការណ៍ពន្លត់បាន ១០០ភាគរយ ដោយបានប្រើប្រាស់ឡានទឹកអស់ជាច្រើនគ្រឿង។
ក្នុងហេតុការណ៍នេះ សមត្ថកិច្ចពុំទាន់បង្ហាញតួលេខពីទំហំខូចខាតនៅឡើយទេ ខណៈមូលហេតុនៃការឆាបឆេះនេះសមត្ថកិច្ចកំពុងស្រាវជ្រាវបន្តទៀត។ ទោះជាយ៉ាងណា គិតត្រឹមម៉ោងជិត ៣រសៀលនេះ ពុំទាន់ឃើញមានមនុស្សរងរបួសនោះទេ។
សម្រាប់ប្រជាពលរដ្ឋដែលបានឃើញហេតុការណ៍អគ្គិភ័យនៅរាជធានីភ្នំពេញ អាចទាក់ទងផ្តល់ព័ត៌មានបន្ទាន់តាមរយៈលេខ 666 ឬក្រុមការងារព័ត៌មាន និងប្រតិកម្មរហ័សតាមរយៈលេខទូរស័ព្ទ 097 7 3333 55៕
