សត្វក្រៀលដែលរស់នៅតំបន់ការពារទេសភាពអន្លង់ព្រីង ខេត្តកំពតកាលពីឆ្នាំមុន ។ រូបថត NatureLife-Cambodia
កំពតៈ អង្គការជីវិតសត្វស្លាបអន្តរជាតិប្រចាំកម្ពុជាសហការជាមួយក្រសួងបរិស្ថានបានរៀបចំប្រារព្ធទិវាសត្វក្រៀលលើកទី៦ ដើម្បីផ្សព្វផ្សាយដល់សាធារណជន និងជំរុញឱ្យសហគមន៍មូលដ្ឋានរួមនឹងអ្នកពាក់ព័ន្ធឱ្យចូលរួមអភិរក្សសត្វក្រៀលដែលកំពុងរងគ្រោះឈានទៅផុតពូជ។
ទិវាសត្វក្រៀលនេះនឹងត្រូវធ្វើឡើងនៅតំបន់ការពារទេសភាពអន្លង់ព្រីង ឃុំបឹងសាលាខាងត្បូង ស្រុកកំពង់ត្រាច ខេត្តកំពតនាថ្ងៃទី២៨ ខែកុម្ភ: ដោយមានការរៀបចំព្រឹត្តិការណ៍សំខាន់រួមមាន កម្មវិធីដាំកូនឈើប្រមាណ ៤៥០ ដើម នៅតាមបណ្តោយផ្លូវដែលទើបពង្រីករួចដែលឆ្លងកាត់ក្នុងតំបន់ការពារនេះ មានកម្មវិធីការរត់ប្រណាំង ជិះកង់ ការប្រកួតប្រជែងគំនូរព្រមទាំងមានការសម្ដែងរបស់កុមារដែលមានការប្រឡងសួរសំណួរ-ចម្លើយទាក់ទងនឹងការងារអភិរក្សសត្វក្រៀលផងដែរ។
លោក ប៊ូ វរសក្ស នាយកកម្មវិធីនៃអង្គការជីវិតសត្វស្លាបអន្តរជាតិប្រចាំកម្ពុជា (BirdLife International Cambodia Programme)បានឱ្យដឹងថា កម្មវិធីទិវាសត្វក្រៀលនេះ គឺត្រូវបានធ្វើជារៀងរាល់ឆ្នាំ នៅតំបន់អន្លង់ព្រីងក្នុងខេត្តកំពត និងតំបន់បឹងព្រែកល្ពៅក្នុងខេត្តតាកែវ ហើយនេះជាលើកទី៦ហើយដែលមានការប្រារព្ធទិវានេះឡើង។
លោកបានបន្តថា ការប្រារព្ធទិវាសត្វក្រៀលដែលតែងតែធ្វើនៅតំបន់ទាំង២គឺដោយសារទីតាំងទាំងនោះ មានវត្តមានសត្វក្រៀលមកចុះរកចំណីចាប់ពីខែឆ្នូ រហូតទៅដល់ខែមិថុនា។ ដូច្នេះបំណងនៃធ្វើទិវាសត្វក្រៀលនេះគឺជាការជំរុញការចូលរួមរបស់សហគមន៍ក្នុងការការពារនិងការអភិរក្សសត្វក្រៀលខណៈដែលសត្វប្រភេទនេះកំពុងមានវត្តមានជុំវិញតំបន់ដីសើម។
លោកថា ជាមួយគ្នានេះក៏ជាការជំរុញឱ្យអាជ្ញាធរមូលដ្ឋាន ក៏ដូចជាអ្នកពាក់ព័ន្ធផ្សេងៗចូលរួមក្នុងការការពារ និងគ្រប់គ្រងទីជម្រករបស់សត្វនេះឱ្យមានភាពប្រសើរឡើង។
លោក ប៊ូ វរសក្ស បានបញ្ជាក់ថា៖ «ចំពោះកម្មវិធីនេះ យើងនឹងរៀបចំដោយមានការសម្ដែងរបស់កុមារមានការប្រឡងសួរសំណួរ-ចម្លើយទាក់ទងនឹងការងារអភិរក្ស ទាក់ទងនឹងសារៈសំខាន់សត្វក្រៀលនៅតំបន់ដីសើមដែលជាទីជម្រករបស់វា ហើយក៏មានការជិះកង់កាត់ភូមិនិងរត់ប្រណាំង ដើម្បីផ្សព្វផ្សាយពីការអភិរក្សសត្វក្រៀល និងជំរុញឱ្យចូលរួមសម្អាតតំបន់ដីសើមជាដើមផងដែរ»។
លោកបានបន្តថា ទោះបីជាកម្មវិធីគ្រោងរៀបចំទាំងនេះ ត្រូវបានធ្វើឡើងក្នុងកម្រិតកុមារ និងសហគមន៍មូលដ្ឋាន ឬក្នុងតំបន់ការពារក៏ដោយ តែវាជាការរួមចំណែកយ៉ាងសំខាន់ក្នុងការផ្សព្វផ្សាយទៅកាន់សាធារណជនទូទៅផងដែរ។
លើសពីនេះទៀត ចំពោះឆ្នាំនេះ លោកថា មានការប្រកួតគូរគំនូររវាងសាលាចំនួន២ ដែលស្ថិតនៅក្នុងតំបន់ការពារទេសភាពអន្លង់ព្រីងនោះគឺអ្នកដែលបានត្រៀមគំនូរដើម្បីប្រកួតប្រជែងពួកគាត់នឹងធ្វើបទបង្ហាញពីអត្ថន័យនៃគំនូរដែលទាក់ទងនឹងតំបន់ដីសើមនៅសហគមន៍របស់ពួកគាត់ថាវាមានសារៈសំខាន់ឬអត្ថប្រយោជន៍យ៉ាងណា ក្នុងការងារអភិរក្សសត្វក្រៀល។ ក្រៅពីនេះក៏មានកម្មវិធីដាំដើមឈើនៅតាមដងផ្លូវដែលបានពង្រីកហើយ ពីព្រោះថាកន្លងមកដើមឈើនៅសងខាងផ្លូវត្រូវបានកាប់ដូច្នេះបើមិនដាំដើមឈើដែលបានកាប់ទាំងនោះឡើងវិញទេ វាមានការប៉ះពាល់ដល់សត្វក្រៀល នៅពេលដែលមានអ្នកដំណើរឆ្លងកាត់តំបន់អភិរក្ស។
យោងតាមក្រសួងបរិស្ថានបានឱ្យដឹងថា ចំនួនសត្វក្រៀលមានការថយចុះដែលមកទល់ឆ្នាំ២០២២ មានសល់ត្រឹមតែជាង១៥០ក្បាលប៉ុណ្ណោះ ជាចំនួនដែលមានការថយចុះជាបន្តបន្ទាប់ពីឆ្នាំ២០២០មក ។
យោងតាមការជំរឿនសត្វក្រៀល នៅឆ្នាំ២០២០ កម្ពុជាមានសត្វក្រៀលចំនួន១៩៤ក្បាល, នៅឆ្នាំ២០២១ បានធ្លាក់ចុះមកនៅតែ១៦៤ក្បាល ហើយដល់ឆ្នាំ២០២២ បើតាមរបាយការណ៍បណ្តោះអាសន្នចំនួនសត្វក្រៀលបានបន្តធ្លាក់ចុះនៅសល់ត្រឹមជាង១៥០ក្បាលប៉ុណ្ណោះ។
លោកនេត្រ ភក្ត្រា អ្នកនាំពាក្យក្រសួងបរិស្ថានធ្លាប់បានប្រាប់ថា ចំនួនសត្វក្រៀលនៅលើពិភពលោកសព្វថ្ងៃនេះមានចន្លោះពី១៣ ០០០ទៅ១៥ ០០០ក្បាល ដែលរស់នៅក្នុងប្រទេសឥណ្ឌា អូស្ត្រាលី វៀតណាម ឡាវ និងកម្ពុជា។
សត្វក្រៀលតែងតែបង្ហាញវត្តមាននៅទីតាំង៣សំខាន់គឺអាងត្រពាំងថ្មក្នុងខេត្តបន្ទាយមានជ័យ តំបន់ការពារទេសភាពអន្លង់ព្រីង ខេត្តកំពត និងតំបន់ការពារទេសភាពបឹងព្រែកល្ពៅនៅខេត្តតាកែវ។ ការបង្ហាញខ្លួននេះគឺដើម្បីរកចំណីបន្តការរស់នៅក្នុងតំបន់ដីសើមដែលសម្បូរចំណីនេះពីខែធ្នូដល់ខែកុម្ភៈរៀងរាល់ឆ្នាំ។ រីឯរដូវពងកូន សត្វនេះនឹងផ្លាស់ទីទៅតំបន់ព្រៃរបោះក្នុងខេត្តព្រះវិហារ រតនគិរី និងមណ្ឌលគិរីវិញ៕
