ពលរដ្ឋ(អាវស)ដែលពាក់ព័ន្ធជំងឺផ្ដាសាយបក្សី H5N1ទទួលអំណោយពីមន្ត្រីសុខាភិបាលក្រោយតេស្តអវិជ្ជមានH5N1។ រូបថត FN
ភ្នំពេញៈ មន្ត្រីជាន់ខ្ពស់ក្រសួងសុខាភិបាលបានឱ្យដឹងថា លទ្ធផលតេស្តចំនួន២៩ សំណាកដែលពាក់ព័ន្ធជាមួយកុមារីដែលបានស្លាប់ដោយសារជំងឺផ្តាសាយបក្សី H5N1 គឺអវិជ្ជមានទាំងអស់រួមទាំងឪពុករបស់កុមារីនេះផងដែរ ខណៈមន្ត្រីសុខាភិបាល និងអាជ្ញាធរខេត្តកំពុងតាមដានករណីនេះដោយយកចិត្តទុកដាក់។
រដ្ឋលេខាធិការប្រចាំការក្រសួងសុខាភិបាលលោកស្រី យក់ សម្បត្ដិ បានឱ្យដឹងថា យោងតាមការបញ្ជាក់ដោយវិទ្យាស្ថានប៉ាស្ទ័រ និងវិទ្យាស្ថានសុខភាពសាធារណៈ កាលពីយប់ថ្ងៃទី២៦ខែកុម្ភៈនេះសំណាកសរុបចំនួន ២៩ដែលត្រូវបានយកមកធ្វើតេស្តរកមេរោគH5N1 គឺលទ្ធផលបង្ហាញថាអវិជ្ជមានទាំងអស់ដែលជាអ្នកប៉ះពាល់ជាមួយអ្នកស្លាប់ រួមទាំងឪពុកអ្នកជំងឺផងដែរ។ លោកស្រីថ្លែងថា៖« យើងបានធ្វើតេស្ដទៅអ្នកពាក់ព័ន្ធផ្ទាល់ ហើយលទ្ធផលគឺអវិជ្ជមាន រួមទាំងឪពុកដែលឆ្លងពីកូនស្រី ដោយការរាប់មេរោគក្នុងខ្លួនតិចណាស់ ឥឡូវនេះគាត់អវិជ្ជមានដែរ ហើយអ្នកផ្សេងៗទៀតយើងកំពុងស្រាវជ្រាវបន្ដ និងអប់រំប្រជាពលរដ្ឋ ឲ្យអនុវត្តវិធានការសុខាភិបាលឲ្យបានខ្ជាប់ខ្ជួន»។
លោកស្រី បញ្ជាក់ថា ទោះជាលទ្ធផលមកអវិជ្ជមាននៃជំងឺផ្ដាសាយបក្សីទាំងអស់ក៏ដោយ ប៉ុន្តែមន្ត្រី និងអាជ្ញាធរពាក់ព័ន្ធទាំងអស់ នៅតែបន្ដធ្វើការយ៉ាងប្រុងប្រយ័ត្នជាមួយអាជ្ញាធរមូលដ្ឋាននៅទូទាំងប្រទេស តាមរយៈអប់រំដល់ប្រជាពលរដ្ឋឱ្យមានការយល់ដឹង និងផ្សព្វផ្សាយស្ប៉តអប់រំផ្ដាសាយបក្សីនៅតាមទូរទស្សន៍ សហគមន៍ និងបណ្ដាញសង្គម ជាដើម។
ប្រធានមន្ទីរព័ត៌មានខេត្តព្រៃវែង លោក ញ៉ែម សៅគ្រី បានថ្លែងប្រាប់នៅថ្ងៃទី២៦ ខែកុម្ភៈថា មន្ត្រីសុខាភិបាលនិងអាជ្ញាធរនៅបន្តតាមដានតំបន់ដែលមានការឆ្លងជំងឺផ្តាសាយបក្សី H5N1ជាប្រចាំ ដើម្បីត្រៀមឆ្លើយតបផ្នែកសុខាភិបាលនៅពេលមានភាពមិនប្រក្រតីណាមួយកើតឡើង។ លោកបន្ថែមថា ដោយឡែកបុរសជាឪពុកដែលឆ្លងជំងឺផ្តាសាយបក្សី H5N1 កំពុងសម្រាកព្យាបាលនៅមន្ទីរពេទ្យហើយមានស្ថានភាពល្អប្រសើរឡើងវិញហើយ បន្ទាប់ពីមានការមើលថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យជំនាញ។
លោក ថ្លែងថា អ្នកជំងឺH5N1 ដែលកំពុងសម្រាកព្យាបាលក្នុងមន្ទីរពេទ្យបង្អែកស្រុកស៊ីធរកណ្តាល នៅព្រឹកថ្ងៃទី២៦ ខែកុម្ភៈ ឆ្នាំ២០២៣ នេះ គាត់មានសុខភាពធម្មតាវិញហើយៗ ករណីជំងឺផ្តាសាយបក្សី H5N1 ដែលកើតឡើងនៅភូមិរលាំង ឃុំរំចេក ស្រុកស៊ីធរកណ្តាល ខេត្តព្រៃវែង ដោយគិតត្រឹមថ្ងៃទី២៦ ខែកុម្ភៈ ពុំទាន់ឆ្លងរាលដាលដល់ភូមិផ្សេងទៀតនោះទេ។
រដ្ឋលេខាធិការក្រសួងសុខាភិបាលលោកស្រី ឱ វណ្ឌឌីន ថ្លែងថា ពាក់ព័ន្ធបញ្ហានេះ ក្រុមការងារក្រសួងសុខាភិបាល កំពុងធ្វើការរួមគ្នាយ៉ាងយកចិត្តទុកដាក់ជាមួយអាជ្ញាធរខេត្តព្រៃវែង ក៏ដូចជាមន្ទីរសុខាភិបាលខេត្តព្រៃវែង ព្រមទាំងមន្ត្រីជំនាញខាងពេទ្យសត្វ ក្នុងការធ្វើការអង្កេត ស្រាវជ្រាវ ស្វែងរកអ្នកប៉ះពាល់ជាបន្តបន្ទាប់។
លោកស្រីបន្តថា៖«ជាបឋមយើងស្វែងរកអ្នកប៉ះពាល់កុមារីដែលបានបាត់បង់ជីវិត ហើយរកឃើញឪពុករបស់កុមារីមានផ្ទុកវីរុស H5N1 អ៊ីចឹងយើងត្រូវបន្តស្វែងរកអ្នកប៉ះពាល់ជាមួយបុរសអាយុ ៤៩ឆ្នាំនេះ»។
លោកស្រី ឱ វណ្ឌឌីន ថ្លែងថា ក្នុងនោះមន្ត្រីសុខាភិបាល និងអាជ្ញាធរពាក់ព័ន្ធក៏បានធ្វើការអប់រំសុខភាព ជូនប្រជាពលរដ្ឋដែលរស់នៅទីកន្លែងកើតហេតុឱ្យមានការប្រុងប្រយ័ត្ន និងត្រូវរាយការណ៍ទៅកាន់អាជ្ញាធរក្នុងករណីមានការសង្ស័យអ្វីមួយ។
លោកស្រី ក៏បានរំឭកសាថ្មី ដោយអំពាវនាវដល់ប្រជាពលរដ្ឋមានការប្រយ័ត្នប្រយែងជាពិសេសត្រូវចៀសវាងការប៉ះពាល់ជាមួយនឹងបសុបក្សី ដោយត្រូវចេះការពារខ្លួនដោយមានស្រោមដៃ សម្អាតដៃ ព្រោះការលាងសម្អាតដៃឱ្យបានញឹកញាប់នៅតែជាចំណុចសំខាន់សម្រាប់ការជួយការពារខ្លួនពីការឆ្លងជំងឺនេះ។
កុមារីអាយុ១១ឆ្នាំ ៦ខែម្នាក់ស្លាប់ដោយសារជំងឺផ្តាសាយបក្សី H5N1 កាលពីថ្ងៃទី២២ ខែកុម្ភៈ ឆ្នាំ២០២៣ នៅភូមិរលាំង ឃុំរំចេក ស្រុកស៊ីធរកណ្ដាល ខេត្តព្រៃវែង៕
វីដេអូ៖
