លោកគ្រូ អ្នកគ្រូ និងកុមារា កុមារី ក្នុងពិធីសម្ពោធបណ្តាល័យ នៅសាលាបឋមសិក្សាឆ្វាំងកាលពីថ្ងៃទី៧មីនា។ រូបថត អង្គការភ្លែនអន្តរជាតិកម្ពុជា
ស្ទឹងត្រែងៈ អង្គការសុវណ្ណភូមិ អង្គការភ្លែនអន្តរជាតិកម្ពុជា និងមន្ទីរអប់រំយុវជននិងកីឡាខេត្តស្ទឹងត្រែង រួមគ្នាបង្កើតបណ្ណាល័យកុមារមេត្រីថ្មី នៅសាលាបឋមសិក្សាដែលដាច់ស្រយាលសម្បូរដោយជនជាតិដើមភាគតិច ដោយបណ្ណាល័យនេះមានបំពាក់សម្ភារតាមបែបឌីជីថលដើម្បីជាជំនួយដល់កុមារក្នុងការហ្វឹកហាត់បង្កើនទម្លាប់អំណាន។
កាលពីខែកុម្ភៈតាមរយៈកិច្ចសហការរវាងអង្គការភ្លែនអន្តរជាតិកម្ពុជាអង្គការសុវណ្ណភូមិនិងមន្ទីរអប់រំយុវជននិងកីឡាខេត្តស្ទឹងត្រែងបានសម្ពោធដាក់ឱ្យប្រើប្រាស់បណ្ណាល័យកុមារមេត្រីថ្មីនៅសាលាបឋមសិក្សាមួយកន្លែងដែលបណ្ណាល័យនេះនឹងអនុញ្ញាតឱ្យសិស្សានុសិស្សប្រមាណ៤១២នាក់ (កុមារីចំនួន២១៩នាក់) ទទួលបានអត្ថប្រយោជន៍តាមរយៈអំណាន។
លោកពេជ្រ សុវណ្ណប្រធានផ្នែកកម្មវិធីនៃអង្គការសុវណ្ណភូមិបានប្រាប់ភ្នំពេញប៉ុស្តិ៍ថា នៅក្នុងឆ្នាំសិក្សា២០២៣នេះបណ្ណាល័យកុមារមេត្រីចំនួន២ត្រូវបានបង្កើតឡើងនៅក្នុងខេត្តស្ទឹងត្រែងហើយវាគឺជាផ្នែកមួយនៃគម្រោងលើកកម្ពស់គុណភាពសិក្សាដល់កុមារដែលបាត់បង់ឱកាសនៅភូមិភាគឦសានដែលមាន៥ស្រុកមានស្រុកសេសានស្រុកថាឡាបរិវ៉ាត់ស្រុកបុរីអូរស្វាយសែនជ័យស្រុកសៀមប៉ាងនិងស្រុកសៀមបូក។
លោកបានឱ្យដឹងបន្ថែមថា៖«យើងចាប់ផ្តើមធ្វើបណ្ណាល័យកុមារមេត្រីនេះគឺយើងមានជ្រុងអំណានដោយសារកាលហ្នឹងយើងមើលទៅសាលាភាគច្រើនគឺអត់ទាន់មានបន្ទប់ហើយមួយទៀតមិនទាន់មានបណ្ណារក្ស។ជ្រុងអំណានមានន័យថាវាជាកន្លែងមួយដែលយើងដាក់សៀវភៅតាមថ្នាក់រៀនដែលក្នុង១សាលាយើងបានជួយជ្រុងអំណានចាប់ពី២បន្ទប់ទៅ៤បន្ទប់ទៅតាមសាលាធំឬតូច។កាលហ្នឹងយើងធ្វើបានចំនួន១២សាលាតែក្រោយមកយើងក៏ចាប់ផ្តើមប្រែក្លាយឱ្យទៅជាបណ្ណាល័យកុមារមេត្រីនេះតែម្តង»។
បើតាមលោកពេជ្រសុវណ្ណបណ្ណាល័យទាំង២គឺក្រុមការងារបានដាក់ដំណើរបានមួយកន្លែងហើយគឺនៅសាលាបឋមសិក្សាឆ្វាំងស្ថិតនៅក្នុងស្រុកថាឡាបរិវ៉ាត់ខណៈបណ្ណាល័យ១កន្លែងទៀត ស្ថិតនៅសាលាបឋមសិក្សាពងគ្រាលក្នុងស្រុកសៀមប៉ាងដែលនឹងត្រូវប្រកាសដាក់ឱ្យប្រើប្រាស់នៅថ្ងៃទី៤មីនា។
លោកថ្លែងថាបណ្ណាល័យនេះត្រូវបានរៀបចំឡើងដោយសហគមន៍ដែលមានបំពាក់សម្ភារតាមបែបឌីជីថលដើម្បីជាជំនួយដល់កុមារក្នុងការហ្វឹកហាត់បង្កើនទម្លាប់អំណានក៏ដូចជាការអភិវឌ្ឍផ្នែកខួរក្បាលនិងបញ្ញាក្នុងការវិភាគដោះស្រាយបញ្ហាផ្សេងៗផងដែរ។
លោកបានបញ្ជាក់ថា៖«នៅតំបន់នោះគឺជាតំបន់ដាច់ស្រយាលដែលមានជនជាតិដើមភាគតិចយើងរស់នៅហើយអត្រាបោះបង់ការសិក្សាខ្ពស់ហើយពួកគាត់មិនសូវទទួលបានការរៀនសូត្រពេញលេញទេ។យើងគិតថាបណ្ណាល័យនេះនឹងជួយដល់សិស្សានុសិស្សដែលអាចឱ្យគាត់រៀនបន្ថែមទៀតមានន័យថាពួកគាត់អាចចូលមកអានសៀវភៅដូចជាអាចមើលទូរទស្សន៍វៃឆ្លាតដែលយើងដាក់ភ្ជាប់ជាមួយកម្មវិធីអំណាននិងអាចរៀនតាមបច្ចេកវិទ្យាទំនើបចុងក្រោយ»។
លោកថេង សុខហឿននាយកសាលាបឋមសិក្សាឆ្វាំងបាននិយាយថា ការមានបណ្ណាល័យនៅក្នុងសាលារៀនគឺពិតជាសំខាន់ខ្លាំងណាស់ដែលកុមារៗតែងតែចង់បានហើយពេលនេះបានដូចបំណងដែលគម្រោងនេះបានបង្កើតបណ្ណាល័យដែលជួយដល់កុមារក្នុងតំបន់នេះបានច្រើនដូចជាជួយឱ្យកុមារបានអានសៀវភៅទទួលបានចំណេះដឹងបន្ថែមក្រៅពីម៉ោងសិក្សានិងមានការបង្កើតទម្លាប់សិស្សអានច្រើននិងចេះស្រឡាញ់សៀវភៅហើយនៅពេលសិស្សស្រឡាញ់សាលាសិស្សមានចំណេះដឹងសិស្សអាចឡើងថ្នាក់ច្រើនជាងមុនកាត់បន្ថយអត្រានៃការបោះបង់និងត្រួតថ្នាក់។
លោក បានបញ្ជាក់ថា៖«ខ្ញុំពិតជាត្រេកអរសប្បាយចិត្តខ្លាំងណាស់ ដោយមិននឹកគិតថា នឹងបានបណ្ណាល័យសម្រាប់សាលាខ្ញុំ ហើយដែលមានជាសម្ភារដែលមិនធ្លាប់មានដូចជាធ្នើរ សៀវភៅរឿង និងបំពាក់ទៅដោយ Smart TVសម្រាប់សិស្សមើល និងអានសៀវភៅ ដែលសាលាផ្សេងមិនមាន»។
នាយកសាលារូបនេះ បានបង្ហាញការតាំងចិត្តបន្ថែមថា៖«ក្នុងនាមខ្ញុំជានាយកសាលា ក៏ដូចជាលោកគ្រូអ្នកគ្រូ និងជំរុញណែនាំអាណាព្យាបាលសិស្ស និងសិស្សានុសិស្សឱ្យយល់ដឹងពីតម្លៃនៃការសិក្សា ការចូលអានសៀវភៅក្នុងបណ្ណាល័យ មានការអានឱ្យសិស្សស្តាប់ ពន្យល់ និងមានគូរជាគំនូរដោយសិស្សដាក់តាំងនៅបណ្ណាល័យ»។
បើតាមលោកថេង សុខហឿន កន្លងមកនេះអង្គការសុវណ្ណភូមិ រួមទាំងស្ថាប័នពាក់ព័ន្ធបានជួយជាសម្ភារនានា ដើម្បីគាំទ្រឱ្យមានថ្នាក់ពន្លឿនការសិក្សា ជួយសិស្សរៀនយឺត កាត់បន្ថយអត្រានៃការបោះបង់ការសិក្សាច្រើនជាពិសេសនោះគឺបានជួយជាបណ្ណាល័យដែលមិនធ្លាប់មានកន្លងមក។
លោក សេង សំអ៊ាន ប្រធានការិយាល័យអប់រំស្រុកថាឡាបរិវ៉ាត់ បាននិយាយថា៖«បណ្ណាល័យនេះ ពិតជាបានជួយកាត់បន្ថយកុំឱ្យកុមារដើរលេងច្រើនអត់ប្រយោជន៍ ដោយយកពេលវេលាដែលមានតម្លៃមកសិក្សាបន្ថែមហើយវាជាកន្លែងល្អសម្រាប់កុមារចូលអាន ស្រាវជ្រាវកាត់បន្ថយកុំឱ្យកុមារលេងអត់ប្រយោជន៍ពេលម៉ោងចេញលេងអាចបង្កគ្រោះថ្នាក់ធ្វើឱ្យសិស្សចូលចិត្តអានសៀវភៅជាងមុន ព្រោះមានសៀវភៅល្អៗនិងមានទូរទស្សន៍សម្រាប់មើលនិងរៀនសូត្រនៅនឹងកន្លែងហើយប្រជាជនអាចចូលរួមអានបាន នៅបណ្ណាល័យផងដែរ ហើយផែនការបន្តការិយាល័យជួយជ្រោមជ្រែងសាលាឱ្យកាន់តែមានការអភិវឌ្ឍល្អ»។
លោក យី គឹមថាន នាយករងប្រចាំប្រទេស ទទួលបន្ទុកកម្មវិធីនៃអង្គការភ្លែនអន្តរជាតិ បានប្រាប់ភ្នំពេញប៉ុស្តិ៍ថា ការបង្កើតបណ្ណាល័យ ក្រោមកិច្ចសហការជាមួយអង្គការសុវណ្ណភូមិ និងមន្ទីរអប់រំខេត្តនេះ គឺជាគម្រោងមួយរបស់អង្គការភ្លែន ដែលមានគោលដៅ ក្នុងការលើកកម្ពស់ការសិក្សារបស់កុមារ។
លោក រំពឹងថា ក្រោមកិច្ចសហការទាំងនេះ នឹងចូលរួមចំណែកបន្ថែមទៀតក្នុងការបង្កើតបណ្ណាល័យដើម្បីជំរុញឱ្យកុមារនៅតាមតំបន់ដាច់ស្រយាលបានទទួលការសិក្សា និងទទួលឱកាសនៃការអាន ខណៈដែលកន្លងមក ការសិក្សា បានរកឃើញថា ពួកគេ ភាគច្រើនបានបាត់បង់ឱកាសទាំងនេះ៕
