សមាជិកព្រឹទ្ធសភានៅក្នុងសម័យប្រជុំ។ រូបថត FB
ភ្នំពេញៈ សមាជិកព្រឹទ្ធសភា បានបើកកិច្ចប្រជុំ អនុម័តសេចក្ដីស្នើវិសោធនកម្មបទបញ្ជាផ្ទៃក្នុង ដើម្បីធ្វើឱ្យមានភាពស្របច្បាប់តាមរដ្ឋធម្មនុញ្ញ ក្នុងដំណើរការប្រជុំតាមប្រព័ន្ធអេឡិចត្រូនិកនៅពេលដែលមានឧបសគ្គដែលមិនអាចប្រជុំដោយផ្ទាល់បានដូចជាករណីជំងឺកូវីដ ១៩ ដែលបានផ្ទុះឡើងរួចមកហើយនោះ។ យោងតាមសេចក្តីប្រកាសព័ត៌មានរបស់ព្រឹទ្ធសភាក្នុងសម័យប្រជុំលើកទី១០ នៃព្រឹទ្ធសភានីតិកាលទី៤ កាលពីថ្ងៃទី ៦ ខែមីនា ឆ្នាំ ២០២៣។
លោកម៉ម ប៊ុននាង អ្នកនាំពាក្យព្រឹទ្ធសភាបានប្រាប់បណ្តាញផ្សព្វផ្សាយថា៖ «ការធ្វើវិសោធនកម្មនេះដើម្បីស្របទៅតាមបរិបទថ្មី ដែលយើងមានកូវីដអីជាដើម យើងមិនអាចជួបជុំគ្នាកើតឡើយ យើងធ្វើការតាមផ្ទះ យើងធ្វើការនៅក្នុងចំនួនមនុស្សតិច យើងមិនបានជួបជុំគ្នាពេញលេញ ដែលយើងត្រូវធ្វើវិសោធនកម្មដើម្បីអាចប្រជុំតាមប្រព័ន្ធអេឡិចត្រូនិកនេះហើយ ព្រោះថ្ងៃនេះយើងមានត្រឹមកូវីដ ចុះថ្ងៃក្រោយយើងមានវិនាសកម្មស្រដៀង ឬលើសកូវីដ យើងនឹងមានបញ្ហាក្នុងការប្រជុំ ក្នុងការអនុម័តច្បាប់ ការឆ្លងច្បាប់ ការពិភាក្សាច្បាប់»។
លោកម៉ម ប៊ុននាង បានថ្លែងនៅក្នុងកិច្ចសម្ភាសន៍តាមទូរស័ព្ទបន្ថែមថា ការធ្វើវិសោធនកម្មនេះ ព្រោះតែព្រឹទ្ធសភាមើលឃើញពីបទពិសោធន៍ទំនាក់ទំនងពីថ្នាក់ដឹកនាំកំពូល ធ្វើការប្រជុំ ឬការពិភាក្សានៅក្នុងថ្នាក់ជាតិ ថ្នាក់តំបន់ និងអន្តរជាតិក៏ធ្លាប់ប្រព្រឹត្តទៅតាមប្រព័ន្ធវីដេអូអនឡាញផងដែរ គ្រាសម័យជំងឺរាតត្បាតជាសកលកូវីដ១៩។ ដូច្នេះ ព្រឹទ្ធសភាចង់ប្រើប្រាស់វិធីសាស្ត្រនេះដើម្បីបង្កភាពងាយស្រួលនៅពេលមានវិបត្តិដែលមិនអាចជួបគ្នាផ្ទាល់ ដើម្បីបើកសម័យប្រជុំកើត។
គួរបញ្ជាក់ថា ការធ្វើវិសោធនកម្មបទបញ្ជាផ្ទៃក្នុងនៃព្រឹទ្ធសភា រៀបចំឡើងដើម្បីកែសម្រួលបំពេញខ្លឹមសារបន្ថែម ដើម្បីឱ្យមានសង្គតិភាពទៅនឹងរដ្ឋធម្មនុញ្ញ ច្បាប់ បរិបទនៃការវិវឌ្ឍថ្មី និងការអនុវត្តរដ្ឋសភា ព្រមទាំងស្របទៅនឹងស្ថានភាព នៃការអនុវត្តជាក់ស្តែងក្នុងការធានាបាននូវនិរន្តរភាព និងកិច្ចដំណើរការជាប្រក្រតីរបស់ព្រឹទ្ធសភា ហើយអង្គប្រជុំព្រឹទ្ធសភាបានពិនិត្យ និងអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា ដោយមានសំឡេងគាំទ្រចំនួន ៥៩សំឡេង ពោលគឺចំនួនសមាជិកព្រឹទ្ធសភាទាំងមូល៕
