ពិធីតាំងពិព័រណ៍សៀវភៅ នៅភ្នំពេញ កាលពីថ្ងៃ២២ ខែកុម្ភៈ ឆ្នាំ២០២៣។ រូបថត ហេង ជីវ័ន
ភ្នំពេញៈ សមាគមអ្នកបោះពុម្ពផ្សាយសៀវភៅនៅកម្ពុជា ស្នើដល់អ្នកចូលរួមក្នុងពិព័រណ៍សៀវភៅ កុំដាក់តាំងលក់សៀវភៅដែលត្រូវបានបកប្រែ ថតចម្លង ឬបោះពុម្ព ដោយគ្មានការអនុញ្ញាតពីម្ចាស់កម្មសិទ្ធិស្នាដៃ ព្រោះថា ការបកប្រែ ការបោះពុម្ព និងការចម្លង ដោយគ្មានការអនុញ្ញាតពីម្ចាស់កម្មសិទ្ធិ គឺជាអំពើខុសច្បាប់។
សមាគមអ្នកបោះពុម្ពផ្សាយសៀវភៅនៅកម្ពុជា បានលើកឡើងក្នុងលិខិតរបស់ខ្លួនចុះថ្ងៃទី ៧ ខែមីនា ថា ច្បាប់ស្ដីពីសិទ្ធិអ្នកនិពន្ធ និងសិទ្ធិប្រហាក់ប្រហែល ត្រូវបានប្រកាសឱ្យប្រើប្រាស់ កាលពីថ្ងៃទី ៥ ខែមីនា ឆ្នាំ ២០២៣។ ក្រៅពីនោះ សមាគមអ្នកបោះពុម្ពផ្សាយសៀវភៅនៅកម្ពុជា ក៏បានជួបប្រជុំគ្នា ដើម្បីពិភាក្សាពីបញ្ហានេះ កាលពីថ្ងៃទី ២៤ ខែកុម្ភៈ ឆ្នាំ ២០២៣ ផងដែរ។
សមាគមបន្តថា ក្នុងគោលបំណងរួមចំណែកលើកកម្ពស់ការអនុវត្តច្បាប់ស្ដីពីសិទ្ធិអ្នកនិពន្ធ និងសិទ្ធិប្រហាក់ប្រហែលឱ្យកាន់តែមានប្រសិទ្ធភាពខ្ពស់ សមាគមអ្នកបោះពុម្ពផ្សាយសៀវភៅនៅកម្ពុជា និងគណៈកម្មការ រៀបចំពិព័រណ៍សៀវភៅ ដើម្បីអបអរសាទរទិវាជាតិអំណាន ១១ មីនា លើកទី៨ ឆ្នាំ២០២៣ ដែលរៀបចំនៅវិទ្យាស្ថានបច្ចេកវិទ្យាកម្ពុជា ពីថ្ងៃទី១០ ដល់ថ្ងៃទី១២ ខែមីនា ឆ្នាំ២០២៣។
«ការបកប្រែ ការថតចម្លង ឬការបោះពុម្ពសៀវភៅណាមួយ ដោយគ្មានការអនុញ្ញាតពីម្ចាស់កម្មសិទ្ធិស្នាដៃ គឺជាអំពើខុសច្បាប់។ នេះបើតាមច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែល។ ស្នើសុំលោក លោកស្រី អ្នកនាងកញ្ញាទាំងអស់ កុំដាក់តាំងលក់សៀវភៅដែលត្រូវបានបកប្រែ ថតចម្លង ឬបោះពុម្ព ដោយគ្មានការអនុញ្ញាតពីម្ចាស់កម្មសិទ្ធិស្នាដៃ»។ នេះបើតាមការបញ្ជាក់ពីសមាគម។
លោកស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល សាទរចំពោះការចូលរួមចំណែករបស់សមាគម ដើម្បីការពារម្ចាស់កម្មសិទ្ធិស្នាដៃ តាមរយៈការជំរុញកុំឱ្យមានការដាក់តាំងលក់សៀវភៅ ដែលត្រូវបានបកប្រែ ថតចម្លង ឬបោះពុម្ព ដោយគ្មានការអនុញ្ញាតពីម្ចាស់កម្មសិទ្ធិស្នាដៃ។
លោកពន្យល់ថា កម្ពុជា កាលពី១០ ឬ២០ឆ្នាំមុន គឺមិនទាន់មានច្បាប់ការពារអ្នកនិពន្ធ និងសិទ្ធិប្រហាក់ប្រហែល ប៉ុន្តែបច្ចុប្បន្ន កម្ពុជាមានទាំងច្បាប់ជាតិ និងច្បាប់អន្តរជាតិ ស្របពេលកម្ពុជា ចូលជាសមាជិកពេញសិទ្ធិ នៃអនុសញ្ញាទីក្រុងប៊ែល នៅថ្ងៃទី៩ ខែមីនា ឆ្នាំ២០២៣នេះ។
លោកបញ្ជាក់ថា៖«អនុសញ្ញាទីក្រុងប៊ែលហ្នឹង គឺស្តីអំពីកិច្ចការពារស្នាដៃអក្សរសាស្ត្រ និងសិល្បៈ ដែលតម្រូវឱ្យរដ្ឋភាគីទាំងអស់ ត្រូវគោរពគ្នាទៅវិញទៅមកនូវស្នាដៃអក្សរសាស្ត្រ និងសិល្បៈ។ ការបកប្រែ ថតចម្លង ឬបោះពុម្ព គឺស្ថិតនៅក្នុងស្នាដៃអក្សរសាស្ត្រហើយ ដែលទាមទារឱ្យអ្នកនិពន្ធយើង អ្នកបោះពុម្ពយើង ធ្វើយ៉ាងណា គោរព និងការពារទៅលើស្នាដៃរបស់រដ្ឋជាភាគី»។
លោកបន្ថែមថា៖«យើងមិនអាចយកស្នាដៃគេមកបកប្រែបានទេ។ យើងមិនអាចយកសៀវភៅគេមកបោះពុម្ពធ្វើជារបស់យើងបានទេ»។
ជាមួយនឹងការអះអាងនេះ លោក ស៊ឹម សត្តា បាននិយាយថា រាល់ការបកប្រែទាំងអស់ ត្រូវតែមានការអនុញ្ញាតពីម្ចាស់ស្នាដៃ។ ក្រសួងលើកទឹកចិត្តដល់អ្នកនិពន្ធកម្ពុជា ចូលរួមបង្កើតស្នាដៃដោយខ្លួនឯង និងធ្វើការបោះពុម្ព ដោយគោរពតាមនីតិវិធី ដើម្បីទទួលបានការការពារ មិនត្រឹមតែក្នុងប្រទេស គឺទទួលបានការការពារក្នុងប្រទេសចំនួន១៨០ ដែលជារដ្ឋភាគី។
លោកបញ្ជាក់ថា៖«វាជាចំណុចល្អរបស់កម្ពុជា ដែលពួកគាត់ចាប់ផ្តើមយល់អំពីគោលការណ៍ច្បាប់។ យើងគោរពគ្នាទៅវិញទៅមក យើងមិនមែនអនាធិបតេយ្យយកស្នាដៃគេយកមកធ្វើអ្វីផ្តេសផ្តាសទេ។ ខ្ញុំគិតថា ការធ្វើបានបែបនេះ គឺទី១ លើកកិត្យានុភាពជាតិ មុខមាត់ជាតិដែលកម្ពុជាសម្បូរអ្នកនិពន្ធសម្បូរបែប អាចចេញទៅកាន់ទីផ្សារអន្តរជាតិបាន»។
ច្បាប់ស្ដីពីសិទ្ធិអ្នកនិពន្ធ និងសិទ្ធិប្រហាក់ប្រហែល បានចែងថា អ្នកនិពន្ធដែលបានបង្កើតស្នាដៃហើយ គឺមានសិទ្ធិផ្តាច់មុខក្នុងការផ្សព្វផ្សាយស្នាដៃរបស់ខ្លួនតាមរយៈការបោះពុម្ពផ្សាយ ឬផ្សាយតាមរយៈប្រព័ន្ធអន្តរបណ្តាញជាដើម។ ក្រៅពីមានសិទ្ធិផ្តាច់មុខក្នុងការផ្សព្វផ្សាយស្នាដៃនេះ ច្បាប់ក៏បានបើកផ្លូវឱ្យម្ចាស់សិទ្ធិនោះ អាចមានសិទ្ធិប្តឹងតវ៉ាជំទាស់ ក្នុងករណីមានការរំលោភបំពានលើស្នាដៃរបស់ខ្លួន។ បើករណីនេះនៅតែបន្តម្ចាស់សិទ្ធិក៏អាចដាក់ពាក្យបណ្តឹងទៅតុលាការបានផងដែរ។
លោកថា៖«នៅក្នុងបទប្បញ្ញត្តិ មិនតម្រូវឱ្យគាត់ទៅសុំពីណាគេទេ។ ប៉ុន្តែគាត់មានសិទ្ធិខ្លួនឯងក្នុងការផ្សព្វផ្សាយស្នាដៃហ្នឹង។ ក៏ប៉ុន្តែយើងមានបញ្ញត្តិ១នៅក្នុងច្បាប់ គឺតម្រូវឱ្យគាត់មកស្នើសុំលិខិតអនុញ្ញាតបោះពុម្ព ដែលជាការស្ម័គ្រចិត្តទេ ដើម្បីយើងធ្វើការគ្រប់គ្រងទៅលើស្នាដៃទាំងនោះ ហើយគាត់ក៏ទទួលបានការការពារក្នុងកម្រិតជាតិ និងអន្តរជាតិ»។
លោកហុក សុទ្ធិ នាយកអង្គការស៊ីប៉ា បាននិយាយថា កន្លងមកជាច្រើនឆ្នាំមកនេះ ការចាប់ផ្តើមអភិវឌ្ឍការបោះពុម្ពសៀវភៅ ចាប់ពីគ្មានសោះ រហូតដល់មានអ្នកបោះពុម្ពផ្សាយកាន់តែច្រើនឡើង។ ទន្ទឹមនឹងការកើនឡើងនេះ ក៏មានការកើតឡើងក្នុងរូបភាពយកស្នាដៃរបស់គេទាំងស្រុង ទាំងអត្ថបទ រូបភាព និងសៀវភៅទាំងមូលរបស់គេ មកធ្វើការបោះពុម្ព ដោយគ្មានអនុញ្ញាតពីម្ចាស់សិទ្ធិដែរ។
លោកថ្លែងថា៖«អ្នកខ្លះដែលបានយល់ ឬមិនបានដឹង គាត់ចូលរួមទាំងអស់គ្នា ដើម្បីចូលរួមចំណែកពង្រឹងវិស័យអប់រំ និងការពារកម្មសិទ្ធិបញ្ញារបស់យើងទាំងអស់គ្នា ព្រោះបើយើងយករបស់គេមកប្រើប្រាស់ ដោយមិនបានសុំពីគេនោះ ថ្ងៃណាមួយ គេនឹងយករបស់យើងទៅដែរ គេនឹងលួចរបស់យើងទៅដែរ។ យើងកុំប្រើប្រាស់របស់គេដោយខុសច្បាប់ កុំឱ្យគេប្រើប្រាស់របស់យើងដោយខុសច្បាប់ដែរ»៕
