សកម្មភាពចែកអាហារូបត្ថម្ភដល់កុមារក្នុងសាលារៀន ១ កន្លែង នៅស្រុកកងមាស។ រូបថត FB
ភ្នំពេញៈ តំណាងនៃកម្មវិធីស្បៀងអាហារពិភពនៅកម្ពុជាលោកស្រី គ្លែរ កូណាន់ បានបង្ហាញនូវសេចក្តីរីករាយ និងថ្លែងអំណរគុណចំពោះរដ្ឋាភិបាលកម្ពុជា ដែលបានប្តេជ្ញាចិត្តទទួលយក និងដាក់ឱ្យអនុវត្តនូវកម្មវិធីផ្តល់អាហារដល់កុមារនៅតាមសាលារៀន។
លោកស្រី បានថ្លែងឱ្យដឹងនៅថ្ងៃទី១៥ ខែមីនា បន្ទាប់ពីប្រមុខរាជរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន បានចេញអនុក្រឹត្យសម្រេចដាក់អនុវត្តនូវកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ និងបានត្រៀមថវិកាជាង ៤លានដុល្លារ សម្រាប់អនុវត្តនៅឆ្នាំ២០២៣។
ការដាក់អនុវត្តកម្មវិធីនេះក្នុងគោលបំណងលើកកម្ពស់អាហារូបត្ថម្ភ និងការសិក្សារបស់កុមារក្នុងតំបន់ក្រីក្រ និងភាពងាយរងគ្រោះខ្ពស់ ព្រមទាំងរួមចំណែកបង្កើនផលិតភាពស្បៀងផងដែរ។
លោកស្រី គ្លែរ កូណាន់ បានប្រាប់ឱ្យដឹងថា៖ «យើងសូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលកម្ពុជា ដែលបានប្តេជ្ញាចិត្តទទួលយកកម្មវិធីនេះ ដែលបច្ចុប្បន្ននេះ សាលារៀនប្រមាណជា៤០ ត្រូវបានគ្រប់គ្រងដោយរដ្ឋាភិបាលកម្ពុជា ដោយបានចំណាយថវិកាប្រមាណជិត ៥លានដុល្លារសម្រាប់ផ្តល់អាហារដល់កុមារតាមសាលារៀននៅឆ្នាំនេះ បើប្រៀបធៀបគឺមានការកើនឡើងជិត ៣ លានដុល្លារក្នុងឆ្នាំ២០២២»។
កម្មវិធីផ្តល់អាហារសាលារៀន ត្រូវបានចាប់ផ្តើមឡើងក្នុងឆ្នាំ១៩៩៩ ដោយបានផ្តល់ឱ្យកុមារតាមសាលានូវអាហារដែលមានសុខភាពល្អជារៀងរាល់ព្រឹក។
លោកស្រី គ្លែរ កូណាន់ បានឱ្យដឹងថា ការផ្តល់អាហារតាមសាលានេះ ពិតជាមានសារៈសំខាន់ណាស់ ដែលទាក់ទាញ និងធ្វើឱ្យកុមារនាំគ្នាចូលចិត្តមកសាលារៀន, ជួយឱ្យកុមារទទួលបាននូវសារជាតិចិញ្ចឹម និងមីក្រូសារជាតិសមស្របសម្រាប់ពួកគេអាចផ្តោតលើការសិក្សារបស់ពួកគេបានល្អ។
លោកស្រី ថ្លែងថា សារៈប្រយោជន៍មួយទៀតដែលកុមារទទួលបានពីកម្មវិធីនេះ គឺការរួមចំណែកដល់កិច្ចគាំពារសង្គម ព្រោះវាជួយសម្រួលដល់គ្រួសារឱ្យមានភាពធូរស្រាលក្នុងការផ្តល់អាហារ១ពេលជារៀងរាល់ថ្ងៃដល់កូនៗរបស់ពួកគេ។
លោកស្រីបន្ថែមថា៖ «ជាងនេះទៅទៀត កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ គឺជាគំរូថ្មី១ទៀតដែលជួយជំរុញឱ្យសេដ្ឋកិច្ចក្នុងស្រុក និងកសិករខ្នាតតូចអាចផ្គត់ផ្គង់មកកាន់ទីផ្សារមានភាពល្អប្រសើរផងដែរ»។
លោកស្រី គ្លែរ កូណាន់ ថ្លែងថា បច្ចុប្បន្ននេះ មានសិស្សដែលត្រៀមចូលរៀនកម្រិតបឋមសិក្សា និងសិស្សក្នុងកម្រិតបឋមសិក្សាជាង ២៩០ ០០០ នាក់នៅក្នុងសាលាចំនួន ១ ១១៣ សាលា នៅទូទាំង ១០ ខេត្ត ទទួលបានអត្ថប្រយោជន៍ពីកម្មវិធីអាហារូបត្ថម ដែលសាលារៀនទាំងនេះ ត្រូវបានជ្រើសរើសដោយផ្អែកលើសូចនាករនៃភាពក្រីក្រ, សន្តិសុខស្បៀងអាហារអាហារូបត្ថម្ភ និងការអប់រំ។
លោកស្រីបានបញ្ជាក់ថា៖ «នៅថ្ងៃអនាគត យើងចង់ឃើញកុមារកម្ពុជាគ្រប់រូបទទួលទានអាហារដែលមានសុខភាពល្អនៅតាមសាលារៀនរបស់ពួកគេជារៀងរាល់ថ្ងៃ ហើយយើងសង្ឃឹមថាកម្មវិធីអាហារបំប៉ននៅសាលាជាតិនឹងកាន់តែមានការពង្រីកបន្ថែមទៀត»។
ក្រសួងអប់រំ យុវជន និងកីឡា និងកម្មវិធីស្បៀងអាហារពិភពលោក បានធ្វើសិក្ខាសាលាទូទាំងប្រទេសកាលពីខែមករា ឆ្នាំ២០២៣ ហើយបានព្រមព្រៀងគ្នាក្នុងការកសាងចក្ខុវិស័យឆ្ពោះទៅរកការពង្រីកកម្មវិធីជាតិដែលអាចកើតមាននាពេលអនាគត ទាំងក្នុងមូលដ្ឋាន ក៏ដូចជាអនុវិទ្យាល័យ នៅពេលដែលមានធនធាន និងសមត្ថភាពក្នុងការអនុវត្តកម្មវិធីនេះ។
លោកស្រី គ្លែរ កូណាន់ ថ្លែងថា តាមតួលេខចុងក្រោយបានបង្ហាញថា ក្នុងឆ្នាំ ២០២២អត្រាបោះបង់ការសិក្សាមានចំនួន ១,៦២% ដែលអត្រានៃការថយចុះ មាន ៣, ៤២% បើធៀបទៅនឹងតួលេខឆ្នាំ ២០១៩បើទោះបីជាផលប៉ះពាល់ដ៏យូរអង្វែងនៃជំងឺរាតត្បាតកូវីដ១៩និងវិបត្តិស្បៀងអាហារ/ជី/ប្រេងឥន្ធនៈសកលក៏ដោយ។
លោកស្រី គ្លែរ កូណាន់ បានប្រាប់ថា៖ «យើងជឿថា អាហារនៅតាមសាលា រួមជាមួយនឹងការអន្តរាគមន៍ផ្សេងទៀត នឹងជួយលើកទឹកចិត្តឪពុកម្តាយឱ្យបញ្ជូនកូនៗរបស់ពួកគេ ទៅសាលារៀនកាន់តែច្រើន»។
សូមបញ្ជាក់ថា រាជរដ្ឋាភិបាលកម្ពុជា បានចេញអនុក្រឹត្យស្តីពីការអនុវត្តនូវកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ កាលពីថ្ងៃទី១៣ ខែមីនា ដែលអនុក្រឹត្យនេះមាន១០ជំពូក និង៣១មាត្រា ដោយធ្វើឡើងក្នុងគោលបំណងលើកកម្ពស់អាហារូបត្ថម្ភ និងការសិក្សារបស់កុមារក្នុងតំបន់ក្រីក្រ និងភាពងាយរងគ្រោះខ្ពស់ ព្រមទាំងរួមចំណែកបង្កើនផលិតភាពស្បៀងផងដែរ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានឱ្យដឹងកាលពីថ្ងៃទី១៤ ខែមីនា ថា អាហារូបត្ថម្ភល្អ ចូលរួមលើកកម្ពស់គុណភាពរៀន និងបង្រៀន ថែមទាំងបណ្តាលឱ្យគុណភាពជីវិតរឹតតែប្រសើរ ហើយក្រសួងស្វាគមន៍ចំពោះកិច្ចសហការជាមួយគ្រប់ភាគីពាក់ព័ន្ធដើម្បីលើកកម្ពស់អាហារូបត្ថម្ភ និងសុខភាពសិក្សារបស់អ្នកសិក្សា និងភាគីពាក់ព័ន្ធតាមរយ:គ្រប់រូបភាព។
សូមជម្រាបផងដែរថា កសិផលក្នុងសហគមន៍សំដៅដល់ផលិតផលក្នុងសហគមន៍ ដែលមានដូចជា អង្ករ សាច់ ត្រី ស៊ុត ទឹកដោះសត្វ បន្លែ ផ្លែឈើ គ្រាប់ធញ្ញជាតិ ចំណីអាហារដែលបញ្ចូលមីក្រូសារជាតិជាដើម ដែលមានប្រភពពីផលិតកម្មដំបូង សម្រាប់ផ្គត់ផ្គង់នៅតាមសាលារៀនសាធារណៈ៕
