លោកឌិត ទីណា ក្នុងសន្និបាតកាលពីថ្ងៃទី ១៤ មីនា។ រូបថត ក្រសួងកសិកម្ម
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក ឌិត ទីណា បានថ្លែងថា ក្រសួងនឹងជួយគាំទ្របន្ថែមក្នុងការរកដៃគូវិនិយោគ ព្រមទាំងការទទួលបានកម្ចីដែលមានអត្រាការប្រាក់ទាបជំរុញការបង្កើតមូលនិធិជួយដល់សហគមន៍កសិកម្ម ដើម្បីកសាង និងពង្រីកទៅតាមខ្សែបណ្តោយនៃក្រុមអ្នកផលិត ដើម្បីទទួលបានប្រាក់ចំណេញ និងនិរន្តរភាពសេដ្ឋកិច្ច ព្រមទាំងចូលរួមកាត់បន្ថយការនាំចូលកសិផលពីបរទេស។
លោកបានថ្លែងបែបនេះ នៅក្នុងពិធីបិទសន្និបាតការងារសហគមន៍កសិកម្មឆ្នាំ ២០២២ និងលើកទិសដៅឆ្នាំ ២០២៣ ក្រោមប្រធានបទ «សហគមន៍កសិកម្មជាចលករនៃផលិតកម្មកសិកម្មតាមកិច្ចសន្យា» កាលពីថ្ងៃទី ១៤ មីនា ឆ្នាំ ២០២៣។
លោករដ្ឋមន្ត្រីថ្លែងថា សហគមន៍កសិកម្មទូទាំងប្រទេសពិតជាបានចូលរួមចំណែកយ៉ាងសកម្មក្នុងផលិតកម្មកសិកម្ម កសិពាណិជ្ជកម្ម កសិឧស្សាហកម្ម និងការផ្តល់សេវាគាំទ្រនានាដល់ផលិតកម្មកសិកម្ម ពិសេសការអនុវត្តកសិកម្មតាមកិច្ចសន្យា (Contract Farming) ដើម្បីជំរុញការអភិវឌ្ឍកសិកម្ម។
ទោះជាយ៉ាងណាលោករដ្ឋមន្ត្រី បានណែនាំដល់ប្រធានមន្ទីរត្រូវពិនិត្យមើលសហគមន៍កសិកម្មដែលមានសកម្មភាពមានប្រយោជន៍ និងប្រសិទ្ធភាព ហើយលុបចោលសហគមន៍កសិកម្មទាំងឡាយណា ដែលមិនមានសកម្មភាព។
លោកបានផ្តល់អនុសាសន៍ថា៖ «នៅក្នុងចំណោមសហគមន៍ទៀតសោត ត្រូវតែមានការទុកចិត្តគ្នា ធ្វើការរួមគ្នា ដោយចៀសវាងដាច់ខាតការបោកប្រាស់កេងបន្លំគ្នាទៅវិញទៅមក។ ជាងនេះទៀត សហគមន៍ត្រូវមានផែនការដាំដុះច្បាស់លាស់ ស្របតាមកិច្ចសន្យា និងមានព័ត៌មានច្បាស់លាស់ក្នុងខ្សែចង្វាក់ផលិតកម្មនីមួយៗតាំងពីអ្នកផលិតរហូតទីផ្សារ»។
លោក យ៉ង សាំងកុមារ រដ្ឋលេខាធិការក្រសួងកសិកម្មបានថ្លែងកាលពីថ្ងៃទី ១៥ មីនា ថា លោកបានដឹកនាំកិច្ចប្រជុំការងារគម្រោងពិពិធកម្មកសិកម្មជាមួយមន្ទីរកសិកម្ម និងស្ថាប័នពាក់ព័ន្ធ ជាពិសេសពិភាក្សាការធ្វើធុរកិច្ចកសិកម្មដោយផ្តោតលើការពង្រឹងការគាំទ្រដល់សហគមន៍កសិកម្មលើបញ្ហាទីផ្សារ។ចំពោះការជួយដល់សហគមន៍កសិកម្មឱ្យទទួលបានកម្ចីមានការប្រាក់ទាបវិញ បច្ចុប្បន្ន ក្រសួងកំពុងគិតគូរលើបញ្ហានេះ។
លោកបញ្ជាក់ថា៖ «ដើម្បីដោះស្រាយបញ្ហានេះក្រសួងត្រូវពង្រឹងសមត្ថភាពសហគមន៍ជាមុនសិន ដូចជាការជំរុញឱ្យមានផែនការទីផ្សារច្បាស់លាស់ តាមរយៈការអនុវត្តកិច្ចសន្យាទីផ្សារ ដើម្បីកសាងទំនុកចិត្តដល់គ្រឹះស្ថានហិរញ្ញវត្ថុ ដែលបានផ្តល់កម្ចី។ ក្រសួងកំពុងធ្វើការវាយតម្លៃឡើងវិញ ដើម្បីពង្រឹងសហគមន៍ដែលនៅខ្សោយឱ្យខ្លាំង ដោយបច្ចុប្បន្នយើងសង្កេតឃើញថា សហគមន៍ដែលមានសក្តានុពលខ្លាំងមានប្រមាណជាង ១០ ភាគរយ មធ្យមជាង ៧០ ភាគរយ និងសហគមន៍មានសក្តានុពលទាបមានត្រឹមប្រហែល ១០ ភាគរយ»។
លោក ប៉ាត សាវឿន ប្រធានសហគមន៍ឃុំអូរសារាយ នៅខេត្តតាកែវ បានប្រាប់ឱ្យដឹងថា កន្លងទៅសហគមន៍ តែងតែទៅស្នើសុំកម្ចីពីធនាគារពាណិជ្ច ដែលមានអត្រាការប្រាក់ខ្ពស់ និងមានតម្រូវការឯកសារធានាច្រើន ថែមទាំងតម្រូវការទ្រព្យធានា ដែលសហគមន៍មិនអាចបំពេញលក្ខខណ្ឌទាំងនេះបាននៅឡើយ។
លោកបញ្ជាក់ថា៖ «កង្វះទុន គឺជាបញ្ហាដ៏សំខាន់មួយសម្រាប់សហគមន៍ ជាពិសេសនៅពេលរដូវប្រមូលផលម្តងៗ ដោយសមាជិករបស់សហគមន៍ត្រូវការលុយបង្វិលភ្លាមៗ សម្រាប់ទូទាត់ការចំណាយថ្លៃដើមរបស់គាត់។ ដូចនេះ បើសិនជាមានការសម្របសម្រួលពីក្រសួងលើបញ្ហាកម្ចីឥណទាននេះ យើងរំពឹងថា សហគមន៍នឹងទទួលបានកម្ចីដែលមានអត្រាការប្រាក់ទាប មានលក្ខខណ្ឌងាយស្រួល ដើម្បីយកមកប្រើប្រាស់សម្រាប់ប្រមូលទិញកសិផលរបស់កសិករយើង នៅរដូវប្រមូលផល»។
សូមជម្រាបជូនថា សហគមន៍កសិកម្មចាប់ផ្តើមបង្កើតឡើងនៅឆ្នាំ ២០០៣ ដោយពេលចាប់ផ្តើមមានតែ ១ សហគមន៍ប៉ុណ្ណោះ។ រហូតមកដល់ឆ្នាំ ២០២៣ នេះចំនួនសហគមន៍កសិកម្មនៅតាមបណ្តារាជធានី ខេត្តទាំង ២៥ បានកើនឡើងដល់ចំនួន ១ ២៥១សហគមន៍ ដែលមានសមាជិកសរុប ១៧០ ២០៨ នាក់ ក្នុងនោះស្ត្រីមាន ១០៧ ៣៨០ នាក់ មានភាគហ៊ុនសរុបប្រមាណ ១២,៨លានដុល្លារ និងដើមទុនសរុបជាង ២៦ លានដុល្លារ។
ចំពោះមុខរបរសំខាន់ៗរបស់សហគមន៍កសិកម្មមានដូចជា ការធ្វើផលិតកម្មកសិកម្ម ការធ្វើកសិពាណិជ្ជកម្ម កសិឧស្សាហកម្ម និងការផ្តល់សេវាកម្មគាំទ្រដល់ផលិតកម្មកសិកម្ម ដោយក្នុងនោះ មានមុខដំណាំសំខាន់ៗដូចជាដំណាំស្រូវនិងការផលិតស្រូវពូជ បន្លែ ស្វាយកែវរមៀត ម្រេច មៀនប៉ៃលិន ពោត ស្វាយចន្ទី និងដំឡូងមីជាដើម៕
វីដេអូ៖
