អ្នកចូលរួមក្នុងពិធីអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកដល់កម្មករនិយោជិត នៅខេត្តព្រះសីហនុ នាថ្ងៃទី២៨ ខែមីនា ឆ្នាំ២០២៣។ រូបថត NSSF
ភ្នំពេញៈ ដើម្បីចូលរួមកាត់បន្ថយគ្រោះថ្នាក់ចរាចរណ៍ បេឡាជាតិរបបសន្តិសុខសង្គម (ប.ស.ស.) បាននិងកំពុងបន្តកិច្ចសហការជាមួយក្រសួង ស្ថាប័នពាក់ព័ន្ធនានា ចុះអប់រំផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោកដល់កម្មករនិយោជិត និងអ្នកបើកបររថយន្តដឹកកម្មករនិយោជិតផងដែរ។
ការចុះផ្សព្វផ្សាយនេះ ត្រូវបានធ្វើឡើង នៅថ្ងៃទី២៨ ខែមីនា តាមរយៈក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត សហការជាមួយរដ្ឋបាលខេត្តព្រះសីហនុ ដោយចុះអប់រំផ្សព្វផ្សាយពីសុវត្ថិភាពចរាចរណ៍ផ្លូវគោក និងផ្ដល់ជូននូវផ្ទាំងសញ្ញាចរាចរណ៍។
យោងតាម ប.ស.ស. ស្របពេលប្រទេសជាតិមានការរីកចម្រើនលើគ្រប់វិស័យ កំណើនយានជំនិះផ្ទាល់ខ្លួនរបស់បងប្អូនកម្មករនិយោជិត ក៏បានកើនឡើងជាបន្តបន្ទាប់។ ជាមួយនេះ គ្រោះថ្នាក់ចរាចរណ៍ដែលបានកើតឡើងមកលើកម្មករនិយោជិត ក៏មានការកើនឡើងគួរឱ្យកត់សម្គាល់ផងដែរ។
ក្នុងពិធីផ្សព្វផ្សាយនេះ លោកព្រាប ច័ន្ទវិបុល អនុប្រធានក្រុមការងារសុវត្ថិភាពចរាចរណ៍ផ្លូវគោក សម្រាប់គាំពារកម្មករនិយោជិត ក្រុមការងារ(ស.ផ.ក)ថ្លែងថា ការផ្សព្វផ្សាយច្បាប់ ស្តីពីចរាចរណ៍ផ្លូវគោក ដល់ប្រជាពលរដ្ឋឱ្យបានជ្រួតជ្រាប ពិតជាតួនាទីសំខាន់ណាស់ក្នុងការចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក។
លោកបញ្ជាក់ថា៖«ការអប់រំផ្សព្វផ្សាយនេះ ជាចំណេះដឹងប្រកបដោយបទពិសោធន៍ ក្នុងការចែករំលែកដល់អ្នកបើកបរយានយន្តគ្រប់ប្រភេទ ឱ្យចូលរួមគោរពច្បាប់ចរាចរណ៍ និងបើកបរដោយមានការប្រុងប្រយ័ត្ន»។
លោកព្រាប ច័ន្ទវិបុល ក៏បានអំពាវនាវដល់អាជ្ញាធរមូលដ្ឋាន ភូមិ សង្កាត់ សហការអប់រំផ្សព្វផ្សាយដល់ប្រជាពលរដ្ឋដែលជាអ្នកប្រើប្រាស់ផ្លូវតាមភូមិសង្កាត់របស់ខ្លួនឱ្យចូលរួមគោរពនិងអនុវត្តច្បាប់ស្តីពីចរាចរណ៍ផ្លូវគោកឱ្យបានគ្រប់ៗគ្នា ដើម្បីការពារអាយុជីវិតខ្លួនឯង និងអ្នកដទៃ។
ជាមួយគ្នានោះ អភិបាលរងខេត្តព្រះសីហនុ លោក អ៊ី សុខឡេង ក៏បានលើកឡើងដែរថា ការអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកនាពេលនេះពិតជាមានសារៈសំខាន់ និងអាចពញ្ញាក់ស្មារតីដល់ពលរដ្ឋគ្រប់រូប ឱ្យយល់ដឹងពីហានិភ័យនៃគ្រោះថ្នាក់ចរាចរណ៍។
លោកថា គ្រោះថ្នាក់ដែលបណ្តាលមកពីការបើកបរធ្វេសប្រហែស ការប្រើប្រាស់គន្លងផ្លូវ ពិសេសបើកបរក្រោមឥទ្ធិពលនៃគ្រឿងស្រវឹង ការដឹកលើសទម្ងន់កំណត់ ការមិនពាក់មួកសុវត្ថិភាព និងមិនពាក់ខ្សែក្រវាត់សុវត្ថិភាពជាដើម ជាហេតុនាំឱ្យមានគ្រោះថ្នាក់ចរាចរណ៍ដោយយថាហេតុ។
លោកថ្លែងថា៖«ខ្ញុំសូមអំពាវនាវឱ្យគ្រប់មន្ទីរ អាជ្ញាធរគ្រប់លំដាប់ថ្នាក់ ប្រជាពលរដ្ឋក្នុងខេត្តទាំងមូល ត្រូវចូលរួមបង្កើនកិច្ចសហការ និងសហការគ្នា ដើម្បីចូលរួមអនុវត្តច្បាប់ស្តីពីចរាចរណ៍ផ្លូវគោក សំដៅប្រែក្លាយផែនការសកម្មភាពសុវត្ថិភាពចរាចរណ៍ផ្លូវគោកឱ្យមានប្រសិទ្ធភាពខ្ពស់ និងចូលរួមប្រែក្លាយកម្ពុជាទៅជាប្រទេសមួយមានសុវត្ថិភាពចរាចរណ៍»។
បើតាមរបាយការណ៍របស់ក្រុមការងារ ស.ផ.ក. នៃបេឡាជាតិសន្តិសុខសង្គម ក្នុងត្រីមាសទី១ ឆ្នាំ២០២៣នេះ មានគ្រោះថ្នាក់ចរាចរណ៍ចំនួន៦៣៦លើក កើនឡើងចំនួន ២៦០លើក ស្មើនឹង ៧១,៨៩% ធៀបនឹងត្រីមាសទី១ដូចគ្នាក្នុងឆ្នាំ២០២២ ដែលបណ្តាលឱ្យមានអ្នកស្លាប់កើនឡើង ២១% អ្នករបួសធ្ងន់កើនឡើង ០,៨៤% និងអ្នករបួសស្រាលកើនឡើង៧៨%៕
