ប.ស.ស. ដាក់ឱ្យសាកល្បងផ្នែកថែទាំសុខភាពសម្រាប់បុគ្គលស្វ័យនិយោជន៍ នៅខេត្តព្រះសីហនុកាលពីថ្ងៃទី ២៨ ខែមីនា។ រូបថត NSSF
ភ្នំពេញៈ បេឡាជាតិសន្តិសុខសង្គម (ប.ស.ស.) ប្រកាសដាក់ឱ្យអនុវត្តគម្រោងសាកល្បងរបបសន្តិសុខសង្គមផ្នែកថែទាំសុខភាពសម្រាប់បុគ្គលស្វ័យនិយោជន៍ ដោយជំហានដំបូងអ្នកបើកបរត្រីចក្រយានយន្ត (ម៉ូតូកង់ ៣) ក្នុងរាជធានីភ្នំពេញ នឹងមានសិទ្ធិទទួលបានការធានារ៉ាប់រងសុខភាពចាប់ពីថ្ងៃទី ១ ខែមេសា តទៅ។
ការអះអាងនេះបានធ្វើឡើងកាលពីថ្ងៃទី ២៧ ខែមីនា ឆ្នាំ ២០២៣ នៅក្នុងសិក្ខាសាលាផ្សព្វផ្សាយស្តីពីការដាក់ឱ្យអនុវត្តគម្រោងសាកល្បងរបបសន្តិសុខសង្គមផ្នែកថែទាំសុខភាពសម្រាប់បុគ្គលស្វ័យនិយោជន៍ដែលរៀបចំដោយប.ស.ស ។ ជាមួយនឹងការប្រកាសនេះ ប.ស.ស.ក៏បានចុះអនុស្សរណៈនៃការយោគយល់គ្នា (MOU) ជាមួយអង្គការ ហ្រ្គេត (GRET) ស្តីពីការពង្រីករបបសន្តិសុខសង្គមសម្រាប់បុគ្គលស្វ័យនិយោជន៍ផងដែរ។
ថ្លែងក្នុងសិក្ខាសាលានោះ លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានលើកឡើងថា ជាជំហានដំបូងគម្រោងសាកល្បងនេះ នឹងចាប់អនុវត្តសម្រាប់តែបុគ្គលស្វ័យនិយោជន៍ (អ្នកបើកបរត្រីចក្រយានយន្ត) ដែលស្ថិតក្នុងភូមិសាស្ត្ររាជធានីភ្នំពេញតែប៉ុណ្ណោះ។
លោកបានបន្តថា៖ «ការដាក់ឱ្យអនុវត្តគម្រោងសាកល្បងរបបសន្តិសុខសង្គមផ្នែកថែទាំសុខភាពសម្រាប់បុគ្គលស្វ័យនិយោជន៍នាពេលនេះ នឹងក្លាយជាយន្តការសិក្សាសម្រាប់ការពង្រីកនៃការគ្របដណ្តប់របបសន្តិសុខសង្គមសម្រាប់គ្រប់បុគ្គលស្វ័យនិយោជន៍នៅក្នុងព្រះរាជាណាចក្រកម្ពុជានាពេលខាងមុខ ហើយនេះគឺជាការរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការអនុវត្តគោលនយោបាយគាំពារសង្គមកម្ពុជាផងដែរ»។
បើតាមលោក អ៊ុក សមវិទ្យា កន្លងមក បេឡាជាតិសន្តិសុខសង្គម និងអង្គការ ហ្រ្គេត ក្រោមការឧបត្ថម្ភគាំទ្រដោយទីភ្នាក់ងារបារាំងសម្រាប់អភិវឌ្ឍន៍ (AFD) បានសហការអនុវត្តគម្រោងមួយឈ្មោះថា SPIN ដែលគម្រោងនេះទទួលបានសមិទ្ធផលជាច្រើន ដូចជា ការអភិវឌ្ឍកម្មវិធីតាមគេហទំព័រ ការវាយតម្លៃហានិភ័យហិរញ្ញវត្ថុ ការអភិវឌ្ឍមជ្ឈមណ្ឌលព័ត៌មាននៃ ប.ស.ស. និងទទួលបានយុទ្ធសាស្ត្រនៃការផ្សព្វផ្សាយ។
លោក ហេង សុផាន់ណារិទ្ធ អគ្គនាយករងប.ស.ស.បានប្រាប់ ភ្នំពេញ ប៉ុស្តិ៍ថា ក្រៅពីប្រកាសអនុវត្តគម្រោងសាកល្បងនៅថ្ងៃទី ២៧ មីនា ភាគីទាំង ២ ក៏បានចុះ MOU រួមគ្នាក្នុងការរៀបចំការអភិវឌ្ឍ ការអនុវត្ត ការវាយតម្លៃ និងការផ្សព្វផ្សាយគម្រោង A4S ដើម្បីសិក្សាអំពីការពង្រីកវិសាលភាពរបបសន្តិសុខសង្គមដល់បុគ្គលស្វ័យនិយោជន៍ និងបុគ្គលដែលមិនទាន់ទទួលបានការធានារ៉ាប់រង នៅក្នុងរាជធានីភ្នំពេញ។
លោកបានបញ្ជាក់ថា៖ «ការចុះអនុស្សរណៈនៃការយោគយល់គ្នានាពេលនេះ គឺជាស្ពានក្នុងការរួមចំណែកជួយឱ្យ ប.ស.ស កម្ពុជាអាចពង្រឹងសមត្ថភាពរបស់ខ្លួនបន្ថែមក្នុងការពង្រីកសក្តានុពលនៃការអនុវត្តរបបសន្តិសុខសង្គមឆ្ពោះទៅរកការរីកចម្រើនប្រកបដោយនិរន្តរភាព ពិសេសអាចពង្រីកនូវការការពារផ្នែកសន្តិសុខសង្គមសម្រាប់គ្របដណ្តប់ដល់បុគ្គលស្វ័យនិយោជន៍ក្នុងការការពារហានិភ័យសុខភាពនិងរក្សាបាននូវស្ថិរភាពប្រាក់ចំណូល»។
លោក ហេង សុផាន់ណារិទ្ធ បង្ហាញក្តីសង្ឃឹមថា គ្រប់ភាគីពាក់ព័ន្ធ នឹងប្តេជ្ញាខិតខំសម្រេចឱ្យបានជោគជ័យទៅតាមគោលបំណងដែលបានចុះអនុស្សរណៈនៃការយោគយល់គ្នានេះដើម្បីចែករំលែកចំណេះដឹង ការផ្លាស់ប្តូរបទពិសោធន៍ និងការផ្តល់កិច្ចសហការគ្នាទៅវិញទៅមកដើម្បីពង្រីកវិសាលភាពរបបសន្តិសុខសង្គមទៅដល់ប្រជាជនគោលដៅផ្សេងៗទៀតផងដែរ។
ជាមួយនឹងកិច្ចសហការនេះ អង្គការហ្រ្គេត (GRET) បានអះអាងថា ចាប់ពីថ្ងៃទី ១ ខែមេសាតទៅ អ្នកបើកបរត្រីចក្រយានយន្ត (ម៉ូតូកង់ ៣) ក្នុងរាជធានីភ្នំពេញ ដែលស្ថិតក្នុងក្រុមស្វ័យនិយោជន៍ នឹងមានសិទ្ធិទទួលបានការធានារ៉ាប់រងសុខភាពជាមួយនឹងប.ស.ស តាមរយៈគម្រោងសាកល្បងរបបសន្ដិសុខសង្គមផ្នែកថែទាំសុខភាពសម្រាប់បុគ្គលស្វ័យនិយោជន៍។
អង្គការហ្រ្គេត បានអះអាងថា ដើម្បីចុះឈ្មោះ អ្នកបើកបរម៉ូតូកង់ ៣ ត្រូវយកអត្តសញ្ញាណប័ណ្ណសញ្ជាតិខ្មែរ និងបណ្ណសម្គាល់យានយន្តមកកាន់ទីស្នាក់ការកណ្តាលរបស់ប.ស.សឬចុះឈ្មោះតាមរយៈកម្មវិធី NSSF-PilotScheme រីឯថ្លៃវិភាគទានប្រចាំខែ ដែលត្រូវបង់ គឺមានចំនួន ១៥ ៦០០ រៀល។
អង្គការហ្រ្គេត បានបញ្ជាក់ថា «ហើយបន្ទាប់ពីបង់ថ្លៃវិភាគទានចំនួន ២ ខែជាប់គ្នា ពួកគាត់នឹងអាចទទួលបានសេវាព្យាបាលជំងឺក្នុងមណ្ឌលសុខភាពដែលទទួលស្គាល់ដោយ ប.ស.ស.ក៏ដូចជា សេវាសម្ភព និងសេវាសង្គ្រោះបន្ទាន់។ គម្រោងសាកល្បងនេះដើម្បីសម្រេចបាននូវប្រព័ន្ធសន្តិសុខសង្គមរួមបញ្ចូលគ្នាសម្រាប់អ្នកបម្រើការវិស័យក្រៅផ្លូវការ ដូចជា អ្នកបើកបរ ត្រីចក្រយានយន្ត និងអ្នកធ្វើការតាមផ្ទះ»។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធថ្លែងថា ការចុះ MOU នេះជាជំហានបន្ទាប់មួយនៃការអនុវត្តច្បាប់ស្តីពីរបបសន្តិសុខសង្គម ក្រោមគោលនយោបាយជាតិគាំពារសង្គម ដែលបានពង្រីកវិសាលភាពដល់ក្រុមបុគ្គលស្វ័យនិយោជន៍នៃក្រុមអ្នកសេដ្ឋកិច្ចក្រៅប្រព័ន្ធ។
លោកបានថ្លែងនៅថ្ងៃទី ២៨ ខែមីនាថា៖ «របបសន្តិសុខសង្គមនេះ មានលក្ខណៈខុសពីអ្នកធ្វើការដែលមានថៅកែតាមក្រុមហ៊ុនត្រឹមត្រូវ ឬអ្នកសេដ្ឋកិច្ចក្នុងប្រព័ន្ធ ដែលគេមានរបបថែទាំសុខភាព របបហានិភ័យការងារ ឬគ្រោះថ្នាក់ការងារ និងរបបសោធននិវត្តន៍»។
លោកថា ដោយឡែកសម្រាប់បុគ្គលស្វ័យនិយោជន៍ដែលបានចុះ MOU នេះ ទទួលបានតែរបបថែទាំសុខភាពប៉ុណ្ណោះ មិនទាន់ទទួលបានលក្ខខណ្ឌ ២ ទៀត លើគ្រោះថ្នាក់ការងារ និងសោធននិវត្តន៍។
លោក វន់ ពៅ ក៏អំពាវនាវដល់រដ្ឋាភិបាល និងស្ថាប័នពាក់ព័ន្ធ ពិចារណាផ្តល់លក្ខខណ្ឌគ្រប់ប្រភេទនៃរបបសន្តិសុខសង្គមទៅដល់អ្នកប្រកបរបរផ្ទាល់ខ្លួននៃក្រុមអ្នកសេដ្ឋកិច្ចក្រៅប្រព័ន្ធនេះ ក៏ដូចជាព្យាយាមពង្រីកវិសាលភាពឱ្យបានទៅដល់អ្នកសេដ្ឋកិច្ចក្រៅប្រព័ន្ធទាំងឡាយនៅទូទាំងប្រទេសផងដែរ។
លោក សេង ហួរ អ្នកបើកកង់ ៣ នៅក្នុងរាជធានីភ្នំពេញរយៈពេល ៥ ឆ្នាំ បានថ្លែងថា ការផ្តល់ឱកាសដល់ក្រុមអ្នកបើកកង់ ៣ ឱ្យទទួលបានការធានារ៉ាប់រងពី ប.ស.ស. គឺជាឱកាសល្អ ដែលភាគច្រើនពួកលោក ចង់ទទួលបានដូចគេដូចឯង។ លោកបានរៀបរាប់ថា ក្រុមអ្នកបើកកង់ ៣ គឺមានការប្រឈមច្រើន ជាពិសេសបញ្ហាជំងឺ និងគ្រោះថ្នាក់តាមដងផ្លូវដោយលោកសង្ឃឹមថា បើការផ្តល់សេវានេះល្អ មិនខ្វះអ្នកចូលជាសមាជិកទេ។
លោកបានបញ្ជាក់ថា៖ «បើការបង់ភាគទានក្នុង ១ ខែ តែប៉ុណ្ណឹងមែន គឺតិចទេ។ យើងជាអ្នករត់ផាសអាប់ អាចបង់បាន។ ប៉ុន្តែយើងខ្លាចតែពេលយើងបង់ហើយ ពេលឈឺពេលអី យើងមិនទទួលបានសេវាល្អ ព្រោះធ្លាប់ឮមកថា អ្នកផ្តល់សេវា អីហ្នឹងពិបាក»៕
រាយការណ៍បន្ថែម សំបាន ច័ន្ទដារ៉ា
