ទិដ្ឋភាពនៃការរៀបចំពិធីទទួលឆ្នាំថ្មីប្រពៃណីខ្មែរ នៅរមណីយដ្ឋានវត្ដភ្នំ កាលពីថ្ងៃទី៥ មេសា ។ រូបថត រដ្ឋបាលសាលារាជធានីភ្នំពេញ
ភ្នំពេញៈលោក ឃួង ស្រេង អភិបាលរាជធានីភ្នំពេញ បានអំពាវនាវដល់ប្រជាពលរដ្ឋពីគ្រប់មជ្ឈដ្ឋាន មកចូលរួមទស្សនាកម្សាន្តសប្បាយនៅសង្ក្រាន្តវត្តភ្នំ ឱ្យបានច្រើនកុះករ ដែលនឹងរៀបចំឡើងរយៈពេល ៣ ថ្ងៃ ជាប់ៗគ្នា។
ទន្ទឹមនឹងនោះដែរ សហភាពសហព័ន្ធយុវជនកម្ពុជា (សសយក) ក៏មានរៀបចំព្រឹត្តិការណ៍ដ៏ធំមួយផងដែរ គឺអង្គរសង្ក្រាន្តឆ្នាំ២០២៣ នៅខេត្តសៀមរាប ចាប់ពីថ្ងៃទី១៤ ដល់ទី១៦ ខែមេសា ឆ្នាំ២០២៣ ក្រោមប្រធានបទ «ក្តីស្រមៃ និងក្តីសង្ឃឹម»។
គណៈកម្មាធិការជាតិរៀបចំបុណ្យជាតិ-អន្តរជាតិបានណែនាំឱ្យគ្រប់ក្រសួង ស្ថាប័ន មន្ទីរ អាជ្ញាធរមូលដ្ឋានរួមនឹងវិស័យឯកជនរៀបចំពិធីអបអរសាទរបុណ្យចូលឆ្នាំថ្មីប្រពៃណីជាតិនាពេលខាងមុខ។
លោក ឃួង ស្រេង បានលើកឡើងកាលពីថ្ងៃទី៥ ខែមេសា ថា រដ្ឋបាលរាជធានីភ្នំពេញនឹងរៀបចំ «សង្ក្រាន្តវត្តភ្នំ»នៅរមណីយដ្ឋានវប្បធម៌ប្រវត្តិសាស្ត្រវត្តភ្នំរយៈពេល៣ថ្ងៃចាប់ពីថ្ងៃទី១៤-១៦ ខែមេសា ឆ្នាំ២០២៣ វេលាម៉ោង ៨ព្រឹកដល់ម៉ោង ២០ នៃថ្ងៃនីមួយៗ។
រដ្ឋបាលរាជធានីភ្នំពេញ នឹងមានកម្មវិធីបែបប្រពៃណីសាសនា និងកម្មវិធីកម្សាន្ដសប្បាយជាច្រើន ដូចជាពិធីទទួលទេវតាឆ្នាំថ្មី ពិធីដង្ហែព្រះពុទ្ធរូប ពូនភ្នំខ្សាច់ ស្រង់ព្រះ ការសម្ដែងសិល្បៈ ការលេងល្បែងប្រជាប្រិយជាតិ ការប្រគំតន្ត្រីបុរាណ-សម័យ ការរាំលេង កម្សាន្ត និងការដាក់តាំងបង្ហាញគំនូរបុរាណ និងវត្ថុសិល្បៈវប្បធម៌។
លោក ឃួង ស្រេង បានបញ្ជាក់ថា៖ «ដូចនេះ រដ្ឋបាលរាជធានីភ្នំពេញសូមអំពាវនាវដល់បងប្អូនប្រជាពលរដ្ឋពីគ្រប់មជ្ឈដ្ឋានសូមអញ្ជើញមកចូលរួមទស្សនាកម្សាន្តសប្បាយនៅសង្ក្រាន្តវត្តភ្នំឱ្យបានច្រើនកុះករ»។
ទាក់ទងនឹងពិធីបុណ្យចូលឆ្នាំខ្មែរនេះដែរ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (សសយក) ក៏បានថ្លែងសារសម្រាប់ពិធីបុណ្យចូលឆ្នាំខាងមុខ ដោយលោកជឿជាក់ថា ប្រជាពលរដ្ឋខ្មែរទាំងអស់បានត្រៀមខ្លួនរួចជាស្រេចក្នុងការជួបជុំក្រុមគ្រួសារ និងត្រៀមខ្លួនធ្វើដំណើរកម្សាន្តជិតឆ្ងាយដើម្បីប្រារព្ធពិធីបុណ្យចូលឆ្នាំ។
លោកបានថ្លែងថា៖ «សហភាពសហព័ន្ធយុវជនកម្ពុជា នឹងរៀបចំព្រឹត្តិការណ៍អង្គរសង្ក្រាន្តឆ្នាំ២០២៣ នៅខេត្តសៀមរាប ចាប់ពីថ្ងៃទី១៤ ដល់ទី១៦ ខែមេសា ក្រោមប្រធានបទ ក្តីស្រមៃ និងក្តីសង្ឃឹម»។
ជាមួយគ្នានេះដែរ (សសយក) រួមជាមួយនឹងក្រសួងវប្បធម៌ និងវិចិត្រសិល្បៈបានរៀបចំពិធីសំពះគ្រូរួមគ្នា បួងសួងសុំសេចក្តីសុខ និងការសម្ដែងក្នុងព្រឹត្តិការណ៍អង្គរសង្ក្រាន្ត ឱ្យដំណើរការរលូនកាលពីថ្ងៃទី៦ ខែមេសា ឆ្នាំ២០២៣ នាពហុកីឡដ្ឋានជាតិមរតកតេជោ។
ដោយឡែក កាលពីរសៀលថ្ងៃទី៤ ខែមេសា កន្លងមក វិទ្យាស្ថានខុងជឺនៃរាជបណ្ឌិត្យសភាកម្ពុជា ប្រចាំវិទ្យាល័យអង្គរ ក៏បានរៀបចំកម្មវិធីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរផងដែរ ដើម្បីផ្លាស់ប្តូរបទពិសោធន៍ពីវប្បធម៌របស់ប្រទេសកម្ពុជា និងប្រទេសចិន។
នាឱកាសនោះលោក លាវ ជឺ ជាប្រធានការិយាល័យកុងស៊ុលចិនប្រចាំខេត្តសៀមរាប បានលើកឡើងថា លោកមានក្តីសោមនស្សរីករាយនៅពេលបានមកចូលរួម និងស្វែងយល់ពីទំនៀមទម្លាប់ ប្រពៃណីបុណ្យចូលឆ្នាំ ប្រពៃណីជាតិខ្មែរ ខណៈប្រទេសកម្ពុជា ជាប្រទេស ដែលមានអរិយធម៌ដ៏ចំណាស់មួយ នៅអាស៊ីអាគ្នេយ៍ ហើយទំនៀមទម្លាប់ ប្រពៃណីបុណ្យចូលឆ្នាំថ្មី របស់កម្ពុជា គឺមានប្រវត្តិយូរអង្វែងមកហើយ។
ចំណែក លោកស្រី ម៉ននី រង្សី អភិបាលរងខេត្តសៀមរាប ក៏បានឱ្យដឹងដែរថា មនុស្សគ្រប់ជាតិសាសន៍ តែងតែប្រារព្ធពិធីបុណ្យចូលឆ្នាំថ្មី គ្រាន់តែការកំណត់ពេលវេលា និងការរៀបចំពិធីមានភាពប្លែកៗពីគ្នាស្របទៅតាមជំនឿ និងទំនៀមទម្លាប់ប្រពៃណីរបស់គេប៉ុណ្ណោះ។
សូមបញ្ជាក់ថា ព្រឹត្តិការណ៍អង្គរសង្ក្រាន្ត ឆ្នាំ២០២៣ នាខេត្តសៀមរាប នឹងមានកម្មវិធីដូចជា ពិធីទទួលទេវតាឆ្នាំថ្មី កម្មវិធីសួនមុនីហទ័យ (ពិព័រណ៍ម្ហូប) កម្មវិធីពិព័រណ៍សង្ក្រាន្ត កម្មវិធីបំបែកឯតទគ្គកម្មពិភពលោក ពិធីសមាធិ អុំទូកកម្សាន្ត ពិព័រណ៍ និងកម្មវិធីជាច្រើនទៀត៕
