ការចូលរួមក្នុងសិក្ខាសាលាពាក់ព័ន្ធនឹងសក្តានុពលទន្លេមេគង្គនៅថ្ងៃទី២៦ មេសា ។ រូបថត រាជបណ្ឌិត្យសភាកម្ពុជា
ភ្នំពេញៈ រាជបណ្ឌិត្យសភាកម្ពុជា និងក្លិបអ្នកកាសែតកម្ពុជា សហការរៀបចំសិក្ខាសាលាបណ្តុះបណ្តាលអ្នកសារព័ត៌មានលើកទី២ ស្តីពី «ការចូលរួមរបស់ប្រព័ន្ធផ្សព្វផ្សាយដើម្បីតំបន់ទន្លេមេគង្គសន្តិភាព ស្ថិរភាពនិងវិបុលភាព» ដើម្បីលើកកម្ពស់ការយល់ដឹងដល់អ្នកសារព័ត៌មានសំដៅធ្វើសេចក្តីរាយការណ៍ពីសក្តានុពលដែលធានានិរន្តរភាពដល់ទន្លេមេគង្គ។
សិក្ខាសាលានេះប្រព្រឹត្តទៅរយៈពេល៣ថ្ងៃចាប់ពីថ្ងៃទី២៦-២៨ ខែមេសា នៅរាជបណ្ឌិត្យសភាកម្ពុជា ដោយមានសិក្ខាកាមចូលរួមចំនួន៦៩នាក់ក្នុងនោះមកពីអង្គភាពសារព័ត៌មានកម្ពុជា១២អង្គភាពដែលមានអ្នកសារព័ត៌មានចំនួន២៨នាក់ ព្រមទាំងអ្នកសារព័ត៌មាននិងភ្ញៀវមកពីប្រទេសជាប់ទន្លេមេគង្គ ចិន ឡាវ មីយ៉ាន់ម៉ា ថៃ និងវៀតណាម សរុបចំនួន១៣នាក់ និងថ្នាក់ដឹកនាំមកពីស្ថាប័នពាក់ព័ន្ធ។
ប្រធានវិទ្យាសា្ថនទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោកគិន ភា បានថ្លែងថា កម្មវិធីសិក្ខាសាលាបណ្តុះបណ្តាលនេះត្រូវបានធ្វើឡើងក្នុងទម្រង់ជាបាឋកថារបស់អ្នកជំនាញ កិច្ចសន្ទនា ការពិភាក្សាជាក្រុមបើកចំហ ករណីសិក្សា ការចែករំលែកព័ត៌មាននិងការធ្វើរបាយការណ៍ជាលាយលក្ខណ៍អក្សរនិងសោតទស្សន៍អំពីបញ្ហាពាក់ព័ន្ធនឹងតំបន់មេគង្គ ។
លោកបានបញ្ជាក់ថា៖«ក្នុងន័យនេះអ្នកសារព័ត៌មានពិតជាមានតួនាទីសំខាន់ណាស់ក្នុងនាំមកនូវព័ត៌មានពិតអំពីតំបន់មេគង្គ និងរួមចំណែកមិនអាចខ្វះបានក្នុងការធ្វើឱ្យតំបន់មេគង្គមានសន្តិភាព ស្ថិរភាព និងវិបុលភាព»។
លោកឱ្យដឹងថា ប្រទេសទាំង៦នៅក្នុងអាងទន្លេមេគង្គត្រូវបានញាំញីជាយូរមកហើយដោយការគ្រប់គ្រងធនធានទឹក ការអភិវឌ្ឍសេដ្ឋកិច្ច ពាណិជ្ជកម្ម ការអភិវឌ្ឍហេដ្ឋារចនាសម្ព័ន្ធ ការវិនិយោគនិងការការពារបរិស្ថាន និងអេកូឡូស៊ីនៅតាមច្រាំងទន្លេរបស់ខ្លួន។
លោកបានថ្លែងថា៖«ដូច្នេះប្រទេសទាំង៦នៃតំបន់មេគង្គ-ឡានឆាង តែងតែបន្តការពិគ្រោះយោបល់កិច្ចសន្ទនា ការផ្លាស់ប្ដូរបទពិសោធន៍និងគម្រោងកិច្ចសហប្រតិបត្តិការដើម្បីលើកកម្ពស់ផលប្រយោជន៍និងភាពជឿជាក់គា្នទៅវិញទៅមក និងការពង្រឹងកម្រិតនៃកិច្ចសហប្រតិបត្តិការគ្នា»។
លោក គី សុខលីម ទីប្រឹក្សាក្លិបអ្នកកាសែតកម្ពុជាបានថ្លែងថា តាមរយៈសិក្ខាសាលារយៈពេល៣ថ្ងៃនេះ សង្ឃឹមថា សិក្ខាកាមទាំងអស់ ក្នុងនោះអ្នកសារព័ត៌មានខ្មែរ និងបរទេស អាចមានគំនិតធ្វើសេចក្តីរាយការណ៍ពីប្រធានបទអ្វីមួយពាក់ព័ន្ធតំបន់មេគង្គ។
លោកថា៖«នៅពេលយើងនិយាយពីសន្តិភាព យើងចង់លើកជាគំនិតមួយគឺទំនាក់ទំនងរវាងប្រជាពលរដ្ឋក្នុងតំបន់ទន្លេមេគង្គ ពេលខ្លះយើងអត់សូវឱ្យពលរដ្ឋនិងពលរដ្ឋយល់គ្នាប៉ុន្មានទេ។អ៊ីចឹងសម្រាប់ខ្ញុំអ្នកសារព័ត៌មានក្នុងប្រទេសនីមួយៗក្នុងតំបន់ទន្លេមេគង្គគួរតែធ្វើសេចក្តីរាយការណ៍ឱ្យបានច្រើនដើម្បីឱ្យប្រជាពលរដ្ឋទាំងក្នុងតំបន់អាចយល់គ្នាបាន អាចស្រឡាញ់គ្នា ហើយអាចអភិវឌ្ឍតំបន់ទន្លេមេគង្គរួមគ្នា»។
លោកបន្ថែមថា ក្នុងសេចក្តីរាយការណ៍នោះអាចនិយាយពីសក្តានុពលរបស់តំបន់ទន្លេមេគង្គ និយាយពីស្ថានភាពពលរដ្ឋនៅតំបន់ទន្លេមេគង្គប្រសើរហើយឬនៅ? មានបញ្ហាប្រឈមអ្វីខ្លះ? កម្រិតជីវភាព និងរបៀបរស់នៅរបស់គាត់។លោកថា៖«ខ្ញុំគិតថាសេចក្តីរាយការណ៍ទាំងអស់នេះសុទ្ធតែមានសារៈសំខាន់ទាំងអស់សម្រាប់អ្នកអាននៅក្នុងប្រទេសនីមួយៗ»។
អ្នកសារព័ត៌មាន Freelancer ១រូបដែលបានចូលរួមសិក្ខាសាលានេះ អ្នកនាង សែម ពិសី បានថ្លែងថា នេះគឺជាលើកទី១ដែលបានចូលរួមសិក្ខាសាលាលើប្រធានបទនេះ ដោយចាត់ទុកថាពិតជាមានសារៈសំខាន់ណាស់សម្រាប់អ្នកសារព័ត៌មាន។
អ្នកនាងបានថ្លែងថា៖«ដោយសារតែទន្លេមេគង្គគឺជាប្រភពធនធានទឹកសំខាន់សម្រាប់ប្រជាជនរស់នៅជាប់តំបន់ទន្លេដូច្នេះទាមទារឱ្យយើងដឹងពីសក្តានុពលទន្លេ ហើយក្នុងនាមយើងជាអ្នកសារព័ត៌មាន តើយើងគួរតែរាយការណ៍ក៏ដូចជាចូលរួមបែបណាក្នុងការលើកកម្ពស់ទន្លេមេគង្គដើម្បីថែរក្សាប្រភពធនធាន?»។
សិក្ខាសាលាបណ្តុះបណ្ដាលអ្នកសារព័ត៌មានលើកទី២នេះធ្វើឡើងក្នុងគោលបំណងលើកកម្ពស់ការយល់ដឹងនិងស្វែងយល់អំពីប្រព័ន្ធនយោបាយនិងប្រព័ន្ធបោះឆ្នោត ដំណើរការប្រជាធិបតេយ្យ និងការរៀបចំការបោះឆ្នោតនៅប្រទេសក្នុងតំបន់មេគង្គ។ពិនិត្យមើលទិដ្ឋភាពបរិស្ថាន សេដ្ឋកិច្ចសង្គម និងការអភិវឌ្ឍនៃប្រទេសមេគង្គ និងពិនិត្យមើលក្របខ័ណ្ឌកិច្ចសហប្រតិបត្តិការនានានៅតំបន់មេគង្គរួមទាំងរបៀបវារៈនយោបាយនិងប្រតិបត្តិការសំខាន់ៗ។គោលបំណងបន្ថែមទៀតនោះគឺលើកកម្ពស់ទំនាក់ទំនងនិងការអនុវត្តប្រព័ន្ធផ្សព្វផ្សាយកាន់តែប្រសើរឡើងអំពីប្រព័ន្ធនយោបាយនិងការបោះឆ្នោតនៅក្នុងតំបន់មេគង្គ៕
