ពិធីដង្ហែ «ព្រះអគ្គិជ័យកីឡា» កាលពីថ្ងៃទី ២៨ មេសា។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ឆ្លើយតបនឹងអ្នករិះគន់ដែលលោកបានលើកឡើងថា មិនមានការយាងព្រះមហាក្សត្រទៅបើកព្រឹត្តិការណ៍ស៊ីហ្គេម ដោយលោកពន្យល់ថា នៅប្រទេសដែលមាននាយករដ្ឋមន្ត្រី ឬរបបសភាគឺនាយករដ្ឋមន្ត្រីចេញប្រកាសបើកព្រឹត្តិការណ៍បែបនេះ។
លោក ហ៊ុន សែន ថ្លែងថា «វាថា អត់យាងព្រះមហាក្សត្រទៅបើកស៊ីហ្គេម»។ ប៉ុន្តែលោកឆ្លើយតបវិញថា ព្រះមហាក្សត្របានប្រទានភ្លើងគប់រួចហើយ។ នៅក្នុងប្រទេសអាស៊ាន មានតែប្រទេសចំនួន៣ទេ ដែលប្រមុខរដ្ឋទៅប្រកាសបើកព្រឹត្តិការណ៍បែបនេះ។ លោកលើកឡើងថា ទី១ គឺប្រធានាធិបតីឥណ្ឌូនេស៊ី ដោយប្រទេសនេះ ជារបបប្រធានាធិបតី មិនមាននាយករដ្ឋមន្ត្រីទេ។ ទី២ គឺហ្វីលីពីន ដែលប្រទេសនេះ មិនមាននាយករដ្ឋមន្ត្រី ប៉ុន្តែមានប្រធានាធិបតី និងអនុប្រធានាធិបតី។ ទី៣ គឺស៊ុលតង់ (មហាក្សត្រប្រ៊ុយណេ) ដែលព្រះអង្គកាន់ជាប្រមុខរដ្ឋផង និងជានាយករដ្ឋមន្ត្រីផង។ ក្រៅពីនោះគឺនាយករដ្ឋមន្ត្រីចេញទៅប្រកាសបើក ពីព្រោះរបបសភាគឺបែបនេះ។
លោក ហ៊ុន សែន ថ្លែងដូច្នេះ ក្នុងពិធីអបអរសាទរខួបលើកទី១៣៧ នៃទិវាពលកម្មអន្តរជាតិ ១ ឧសភា ពិធីបើកការដ្ឋានសាងសង់ចំណតផែកុងតឺន័រនៅខេត្តព្រះសីហនុ និងពិធីអបអរសាទរខួបលើកទី ៧០ នៃទំនាក់ទំនងការទូតរវាងកម្ពុជា និងជប៉ុនដែលធ្វើឡើងនៅចំណតកំពង់ផែក្រុងព្រះសីហនុ នាថ្ងៃទី ១ ឧសភា។
លោកថ្លែងថា៖ «នៅប្រទេស ដែលមាននាយករដ្ឋមន្ត្រី គឺរបបសភាគឺនាយករដ្ឋមន្ត្រីចេញប្រកាស។ អ៊ីចឹង សុំអ្នកល្ងង់ទាំងឡាយហ្អើយ កុំល្ងង់តទៅទៀត។ បើអស់លោកមិនចេះខ្មែរច្បាស់អំពីរបបប្រធានាធិបតី ឬរបប សភាទេអស់លោកគួរតែចេះថា រ៉េហ្សីម ប៉ាឡាម៉ង់ទែរ (regime parlamentare) ឬរ៉េហ្ស៊ីម ប្រេស៊ីដង់ស្យែល (regime presidentiel)។ អ្នកឯងស្គាល់ឱ្យច្បាស់ទៅ! បើស្គាល់មិនច្បាស់ទេកុំធ្វើជាអ្នកចេះ ហើយកុំធ្វើជាអ្នកព្រហើន ញុះញង់ឱ្យមានជម្លោះរវាងព្រះមហាក្សត្រជាមួយនាយករដ្ឋមន្ត្រី»។
លោក ហ៊ុន សែន បន្តថា៖ «ព្រះមហាក្សត្រព្រះអង្គមិនដណ្តើមតួនាទីរបស់នាយករដ្ឋមន្ត្រីទេ ហើយនាយករដ្ឋមន្ត្រីក៏មិនដណ្តើមតួនាទីព្រះមហាក្សត្រដែរ ដូចជាប្រទានភ្លើង គឺព្រះ-មហាក្សត្រយាង។ នាយករដ្ឋមន្ត្រីដង្ហែ»។
បន្ថែមពីនេះ លោក ហ៊ុន សែន បានលើកឡើងថា នៅប្រទេសជប៉ុន ក៏នាយករដ្ឋមន្ត្រីចេញទៅប្រកាសដែរ មិនមែនព្រះចៅអធិរាជចេញទៅប្រកាសនោះទេ ហើយលោកបន្ថែមថា៖ «អាហ្នឹងនិយាយគ្នាឱ្យច្បាស់។ ប្រទេសចិន អាហ្នឹងករណីមួយផ្សេង។ គាត់ជាប្រធានបក្សគាត់ជាប្រធានរដ្ឋគាត់ចេញប្រកាស»។
កាលពីខែមីនា ព្រះរាជពិធីព្រះរាជទាន «ព្រះអគ្គិជ័យកីឡា» របស់ព្រះមហាក្សត្រ នៅប្រាសាទអង្គរវត្តត្រូវបានរៀបចំឡើង ក្រោមវត្តមានថ្នាក់ដឹកនាំកំពូលៗរបស់កម្ពុជា និងថ្នាក់ដឹកនាំផ្នែកកីឡាប្រចាំនៅតំបន់អាស៊ានជាច្រើនរូប។
ជាមួយគ្នានេះលោក ហ៊ុន សែន ក៏បានឆ្លើយតបនឹងមតិរិះគន់ដែលបានលើកឡើងអំពីការមិនយកកម្រៃក្នុងព្រឹត្តិការណ៍ប្រកួតស៊ីហ្គេមនេះដោយលោកបញ្ជាក់ថា ការដែលកម្ពុជាបង្កើតការមិនយកប្រាក់នេះ គឺក្នុងគោលបំណងដើម្បីទាញយកមនុស្សទាំងឡាយចូលមកស្គាល់កម្ពុជា។
លោកថ្លែងថា៖ «កម្ពុជាក្រ តែបេះដូងវាធំ។ រួចហើយមានអាខ្លះ ខំសម្ភាសជាមួយអាវិទ្យុបរទេសនិយាយភាសាខ្មែរ [ថា] បេះដូងធំទាល់តែបេះដូងវារីក។ លុយ ៧ លានដុល្លារ យើងចាយថែមដើម្បីចិញ្ចឹមកីឡាករ កីឡាការិនីរបស់បរទេស។ យើងមិនទាមទារមកវិញតែខ្ញុំជឿចំណុចមួយ។ ដល់ពេលទៅស៊ីហ្គេមលើកក្រោយនៅប្រទេសដទៃ គេក៏អត់យកលុយពីកម្ពុជាវិញដែរ ចាំមើលៗ ចាំមើល។ កាប់ថ្មចំណាំ!»។
លោក ហ៊ុន សែន បន្ថែមថា ប៉ុន្តែអ្វីដែលកម្ពុជាចង់បាន គឺកម្ពុជាចង់បង្ហាញទឹកចិត្តមួយដូចដែលកម្ពុជាធ្លាប់ធ្វើចំពោះនាវា Westerdam កន្លងមក ហើយថា បើទោះបីយកប្រាក់ ៥០ ដុល្លារ ក្នុងកីឡាករម្នាក់ ក៏វាមិនក្លាយទៅជាអ្នកមានបានដែរ។ លោកបន្ថែមថា៖ «អាក្រុមចូលចិត្តជេរហ្នឹងធ្វើម៉េច ធ្វើឱ្យតែផ្ទុយ។ អឺ! ឯងផ្ទុយចំនួនភាគតិចណាស់អាពៅ! បើប្រៀបធៀបជាមួយនឹងប្រជាជនកម្ពុជាដែលកំពុងមានមោទនភាព»។
គួររំឭកថា នាវាទេសចរណ៍ Westerdam ដែលផ្ទុកអ្នកដំណើរជាង ១ ៤០០ នាក់ ត្រូវបានកម្ពុជាអនុញ្ញាតឱ្យចូលចតនៅកំពង់ផែខេត្តព្រះសីហនុ បន្ទាប់ពីប្រទេសចំនួន ៥ រួមមាន ជប៉ុន កោះតៃវ៉ាន់ កោះហ្គាមរបស់សហរដ្ឋអាមេរិក ហ្វីលីពីន និងថៃបានបដិសេធមិនឱ្យនាវានេះចូលចតនៅកំពង់ផែរបស់ពួកគេក្នុងអំឡុងពេលផ្ទុះជំងឺកូវីដ ១៩៕
