លោកស្រី ប៊ុន រ៉ានី ពេលចុះពិនិត្យស្ដ្រីឆ្លងទន្លេកន្លងមក។ រូបថត FN
ភ្នំពេញៈ លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាចេញសារលិខិតក្នុងឱកាសទិវាឆ្មបជាតិអន្តរជាតិឆ្នាំនេះដោយជំរុញឱ្យបន្តការវិនិយោគដល់ការងារឆ្មបបន្ថែមទៀត ដើម្បីធានាដល់សុខភាពប្រជាជនកម្ពុជាក្នុងពេលបច្ចុបន្ន និងអនាគត ខណៈអត្រានៃការសម្រាលកូនដោយឆ្មបជំនាញមានការកើនឡើង។
នៅថ្ងៃទី ៥ ខែឧសភា ឆ្នាំ ២០២៣ ខាងមុខ កម្ពុជា និងពិភពលោក នឹងរួមគ្នាប្រារព្ធទិវាឆ្មបជាតិ-អន្តរជាតិ ក្រោមប្រធានបទ «រួមគ្នាជាថ្មី៖ ពីភ័ស្តុតាងជាក់លាក់ ទៅការអនុវត្តពិតប្រាកដ» ក្នុងគោលបំណងលើកកម្ពស់ការយកចិត្តទុកដាក់ចំពោះសុខភាពមាតា ទារក កុមារទូទាំងសកលលោក និយាយជារួម និងនិយាយដោយឡែកសម្រាប់ប្រទេសកម្ពុជា។
លោកស្រី ប៊ុន រ៉ានី បានលើកឡើងក្នុងសារលិខិតនោះថា ប្រធានបទឆ្នាំ ២០២៣ នេះ បានផ្តោតជាសំខាន់ទៅលើការប្តេជ្ញាចិត្តរួមរបស់ប្រទេសទាំងអស់ ជាសមាជិករបស់អង្គការសុខភាពពិភពលោក ក្នុងនោះមានទាំងប្រទេសកម្ពុជាផងដែរក្នុងការខិតខំប្រឹងប្រែងដោយប្រមូលគ្រប់លទ្ធភាព និងធនធានដែលមានមកវិនិយោគលើការងារឆ្មប ដើម្បីមានឆ្មបជំនាញគ្រប់គ្រាន់។
លោកស្រីបានបញ្ជាក់ថា៖ «ពោលគឺត្រូវមានឆ្មប គិលានុបដ្ឋាក និងវេជ្ជបណ្ឌិត ដែលបំពេញការងារជួយស្ត្រីក្នុងការសម្រាលកូន អាចឆ្លើយតបបានទៅនឹងតម្រូវការចាំបាច់នៃការថែទាំសុខភាព ដើម្បីកាត់បន្ថយអត្រាស្លាប់របស់ស្ត្រី មាតា ទារក និងកុមារ។ ឆ្មបជំនាញគ្រប់ៗរូប បាន និងកំពុងបំពេញការងារយ៉ាងសកម្មក្នុងការតាមដានរកដើមហេតុនៃបញ្ហា និងផលវិបាកនានាដើម្បីទប់ស្កាត់ជំងឺ ព្យាបាល និងសង្គ្រោះបន្ទាន់ក្នុងគោលបំណងកាត់បន្ថយអត្រានៃការស្លាប់របស់មាតា ទារក និងកុមារ»។
តាមការអង្កេតប្រជាសាស្ត្រ និងសុខភាពរបស់កម្ពុជា បានបង្ហាញថា អត្រានៃការសម្រាលកូនដោយឆ្មបជំនាញមានការកើនឡើងពី ៣៤ ភាគរយ នៅឆ្នាំ ២០០០ ដល់ ៩៩ ភាគរយ នៅឆ្នាំ ២០២១-២២។ កំណើននេះ បានធ្វើឱ្យអត្រាមរណភាពមាតាបានថយចុះពី ៤៣៧ ករណី នៅឆ្នាំ ២០០០ មកនៅ១៥៤ ករណី ក្នុង ១ សែនកំណើតរស់នៅក្នុងឆ្នាំ ២០២១-២២ ខណៈអត្រាមរណភាពទារកទើបកើតបានថយចុះពីចំនួន ៣៧ ករណីនៅឆ្នាំ ២០០០ មកនៅត្រឹម ៨ ករណីក្នុង ១ ពាន់កំណើតរស់ នៅឆ្នាំ ២០២១-២២។ ចំណែកអត្រាមរណភាពកុមារអាយុក្រោម៥ឆ្នាំបានថយចុះពី ១២៤ ករណី នៅឆ្នាំ២០០០ ដល់ ១៦ ករណីក្នុង ១ ពាន់កំណើតរស់នៅឆ្នាំ ២០២១-២២។
ជាមួយគ្នានោះលោកស្រី ប៊ុន រ៉ានី បានអំពាវនាវឱ្យគ្រប់ស្ថាប័នពាក់ព័ន្ធទាំងអស់ ទាំងជាតិ និងអន្តរជាតិ ជួយ និងបន្តជួយវិនិយោគគាំទ្រដល់ការងារឆ្មបថែមទៀត ដើម្បីសុខភាពប្រជាជនកម្ពុជា ក្នុងពេលបច្ចុប្បន្ន និងពេលអនាគត។
លោកស្រីបានបញ្ជាក់ថា៖ «យើងមិនត្រូវស្កប់ស្កល់នឹងវឌ្ឍនភាពខាងលើនេះឡើយ ដូចនេះហើយខ្ញុំសូមអំពាវនាវចំពោះថ្នាក់ដឹកនាំ មន្ត្រីរាជការ បុគ្គលិកសុខាភិបាល អ្នកផ្តល់សេវាទាំងអស់ សូមចូលរួមគាំទ្រការអនុវត្តគោលនយោបាយរបស់រាជរដ្ឋាភិបាលឱ្យកាន់តែមានប្រសិទ្ធភាពខ្ពស់ ដើម្បីឈានទៅសម្រេចបាន គោលដៅរបស់រាជរដ្ឋាភិបាលតាមការកំណត់»។
បន្ថែមពីនេះលោកស្រី បានណែនាំថា មិនត្រូវបន្ធូរបន្ថយការខិតខំប្រឹងប្រែងនោះទេ ព្រោះប្រទេសនីមួយៗចាំបាច់ត្រូវមានឆ្មបជំនាញគ្រប់គ្រាន់ ហើយឆ្មបជំនាញទាំងនោះត្រូវទទួលបានជាប្រចាំនូវការបង្វឹកបំប៉នជំនាញ ទទួលបាននូវចំណេះដឹងថ្មីៗ ដែលមានប្រសិទ្ធភាពសម្រាប់ការផ្តល់សេវាថែទាំ ជួយសង្គ្រោះ និងព្យាបាលទាន់ពេលវេលា។
លោកស្រីបានបញ្ជាក់ថា៖ «ក្រៅពីការផ្តល់សេវាសម្រាលកូន កាតព្វកិច្ចសំខាន់មួយទៀតគឺការថែទាំស្ត្រីក្នុងពេលមានគភ៌ និងការថែទាំមាតា ទារក ក្រោយពេលសម្រាល រួមទាំងផ្តល់ការអប់រំអំពី អាហារូបត្ថម្ភ ការចិញ្ចឹម ថែទាំទារក និងកុមារតូច។ បន្ថែមពីលើនេះ ឆ្មបជំនាញអាចជួយស្ត្រីក្នុងការទទួលបាននូវសេវាពន្យារកំណើតតាមតម្រូវការ និងតាមប្រាថ្នា ផ្តល់ការពិនិត្យតាមដានជំងឺមហារីកសុដន់ ឬមហារីកមាត់ស្បូន និងជួយស្ត្រីដែលរងគ្រោះដោយអំពើហិង្សាទាក់ទងយេនឌ័រថែមទៀត»។
យោងតាមគេហទំព័ររបស់គណៈឆ្មបកម្ពុជា បានឱ្យដឹងថា ចាប់តាំងពីឆ្នាំ ២០១២ មកទល់បច្ចុប្បន្ន កម្ពុជាមានឆ្មបចំនួន ៤ ១០០ រូប បានចុះបញ្ជីជាមួយគណៈឆ្មបរាជធានី-ខេត្តចំនួន ២៧ កន្លែង ខណៈមានបុគ្គលិកសុខាភិបាលដែលជាឆ្មបកម្រិតមធ្យម និងឆ្មបបឋមសរុបចំនួន ៣ ៧៣១ នាក់៕
