កិច្ចពិភាក្សារកធាតុចូលទាក់ទងនឹងផ្លូវថ្នល់កាលពីថ្ងៃទី៣ ឧសភា ។ រូបថត ក្រសួងសាធារណការ
ភ្នំពេញៈ មន្ត្រីជំនាញរបស់ក្រសួងសាធារណការ និងដឹកជញ្ជូន បានជួបពិភាក្សាគ្នាដើម្បីពិនិត្យរកធាតុចូលនៃសេចក្តីព្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ដែលរៀបចំដោយក្រុមការងារបច្ចេកទេស P4I & Austroads របស់ប្រទេសអូស្ដ្រាលី។
កាលពីរសៀលថ្ងៃទី៣ ខែឧសភា ឆ្នាំ២០២៣ លោក យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូនបានដឹកនាំកិច្ចប្រជុំពិនិត្យ និងពិភាក្សាលើធាតុចូលនៃសេចក្ដីព្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់នៅទីស្ដីការក្រសួងក្រោមជំនួយឥតសំណងពីរដ្ឋាភិបាលអូស្ដ្រាលី ដោយមានការចូលរួមពីថ្នាក់ដឹកនាំក្រសួង និងមន្ត្រីបច្ចេកទេសរបស់ក្រសួងជាច្រើនរូប។
តាមការប្រកាសរបស់ក្រសួងសាធារណការ នៅថ្ងៃទី៤ ឧសភា បានឱ្យដឹងថា កិច្ចប្រជុំនេះត្រូវបានរៀបចំឡើង ដើម្បីទទួលបានមតិយោបល់ក៏ដូចជាធាតុចូលទាក់ទងនឹងបទដ្ឋានបច្ចេកទេសតាមផ្នែកនីមួយៗឱ្យបានលម្អិត និងគ្រប់ជ្រុងជ្រោយ ដោយធ្វើយ៉ាងណាកែសម្រួល និងរៀបចំបទដ្ឋានបច្ចេកទេសឱ្យកាន់តែមានគុណភាព ប្រសិទ្ធភាព និងសមស្របតាមតម្រូវការស្ថានភាពបច្ចុប្បន្ន។
ក្រសួងបានបញ្ជាក់ថា៖«អង្គប្រជុំបានជជែកពិភាក្សាលម្អិតលើផ្នែកបច្ចេកទេសនីមួយៗដោយមានការកែសម្រួលនិងបំពេញបន្ថែមតម្រូវការចាំបាច់មួយចំនួនដើម្បីធ្វើឱ្យប្រសើរឡើងនូវស្ដង់ដាបច្ចេកទេសនិងសមស្របតាមស្ថានភាពបច្ចុប្បន្នសម្រាប់ប្រើប្រាស់ក្នុងព្រះរាជាណាចក្រកម្ពុជា»។
លោកហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្តិ៍នៅថ្ងៃទី៤ ឧសភាថា សេចក្តីព្រាងបទដ្ឋានបច្ចេកទេសផ្លូវថ្នល់ គឺត្រូវបានរៀបចំដោយក្រុមការងារបច្ចេកទេស P4I & Austroads របស់ប្រទេសអូស្ត្រាលី ដោយមានការចូលរួមពីក្រុមការងារបច្ចេកទេសទាំង៥របស់ក្រសួង។
លោកបានបន្តថា ក្រុមទាំង៥ នេះ នឹងទទួលភារកិច្ចពិនិត្យលើបទដ្ឋានបច្ចេកទេសនីមួយៗទៅតាមជំនាញឯកទេសរបស់ក្រុមនីមួយៗដោយធ្វើយ៉ាងណាកែសម្រួលបទដ្ឋានបច្ចេកទេសផ្លូវថ្នល់ឱ្យកាន់តែមានគុណភាព ប្រសិទ្ធភាព និងសមស្របតាមតម្រូវការស្ថានភាពបច្ចុប្បន្នរបស់កម្ពុជា។
លោកបានបញ្ជាក់ថា៖«ការខិតខំប្រឹងប្រែងធ្វើបទដ្ឋាននេះគឺនឹងធ្វើឱ្យការរៀបចំស្ថាបនានិងស្តារជួសជុលស្ពានផ្លូវថ្នល់របស់យើងឡើងវិញមានលក្ខណៈស្តង់ដាខ្ពស់ធ្វើឱ្យផ្លូវមានអាយុកាលយូរអង្វែង កាត់បន្ថយនូវការចំណាយ ហើយជាពិសេសគឺកាត់បន្ថយគ្រោះថ្នាក់ចរាចរណ៍នោះឯង។ ពេលនេះ យើងមិនទាន់អាចវាយតម្លៃបានថា យើងបានបញ្ចប់ការជជែកលើបទដ្ឋាននេះបានប៉ុន្មានភាគរយនៅឡើយទេ»។
ក្រុមទាំង៥ សម្រាប់សិក្សាស្វែងយល់លម្អិតលើបទបច្ចេកទេសតាមផ្នែកនីមួយៗ នោះរួមមាន ក្រុមទី១ បន្ទុកចរាចរណ៍ (Traffic Loading) ក្រុមទី២ គណនាកម្រាលផ្លូវ (Pavement Design) ក្រុមទី៣ វិធីសាស្ត្រក្នុងការប្រើប្រាស់សម្ភារសំណង់(Materials Technology) ក្រុមទី៤ បទដ្ឋានស្ដង់ដាក្នុងការធ្វើពិសោធន៍ (Laboratory Standards) និងក្រុមទី៥ សមភាពយេនឌ័រ អ្នកអសមត្ថភាពការងារ និងសង្គមស៊ីវិល - ការកាត់បន្ថយហានិភ័យគ្រោះមហន្តរាយ និងការប្រែប្រួលអាកាសធាតុ (Gender Equality, Disability and Social Inclusion - Disaster Risk Reduction and Climate Change) ឬ (GEDSI – DRRCC)។ នេះបើតាមការបញ្ជាក់បន្ថែមពីលោក ហ៊ាង សុធាយុត្តិ ៕
