លោកលី ធុជ នៅក្នុងព្រះរាជពិធីបុណ្យចម្រើនព្រះជន្មនិងព្រះរាជពិធីគ្រងរាជសម្បត្តិរបស់ព្រះមហាក្សត្រ Charles III ពីថ្ងៃទី១០ ឧសភា ។ រូបថត Ly Thuch page
ភ្នំពេញៈអនុប្រធានទី១ អាជ្ញាធរមីន លោកទេសរដ្ឋមន្ត្រី លី ធុជ បានលើកឡើងថា ចក្រភពអង់គ្លេសជាដៃគូដែលស្ថិតស្ថេរជាមួយគ្នា ហើយកម្ពុជានៅតែដឹងគុណចំពោះការគាំទ្ររបស់ចក្រភពអង់គ្លេសដែលបានផ្តល់ជំនួយមកកម្ពុជា ដើម្បីជួយដល់វិស័យជាច្រើនក្នុងរយៈពេលជាច្រើនឆ្នាំកន្លងមក។
លោក លី ធុជ បានលើកឡើងដូចនេះក្នុងនាមរាជរដ្ឋាភិបាលកម្ពុជាដែលបានចូលរួមជាភ្ញៀវកិត្តិយសក្នុងឱកាសនៃការអបអរសាទរព្រះរាជពិធីបុណ្យចម្រើនព្រះជន្មនិងព្រះរាជពិធីគ្រងរាជសម្បត្តិរបស់ព្រះមហាក្សត្រCharles III នៃចក្រភពអង់គ្លេសនិងអៀរឡង់ខាងជើងកាលពីល្ងាចថ្ងៃទី១០ ខែឧសភា ឆ្នាំ២០២៣។
លោកបានលើកឡើងនាឱកាសនោះថា៖«ក្នុងនាមរាជរដ្ឋាភិបាលនិងប្រជាជនកម្ពុជា ខ្ញុំសូមថ្វាយព្រះពរយ៉ាងស្មោះស្ម័គ្របំផុតចំពោះព្រះមហាក្សត្រ CharlesIII និងថ្វាយព្រះពរចំពោះរាជ្យសម្បត្តិដ៏រុងរឿង ដែលនឹងផ្តល់ជូនប្រជាជននៃចក្រភពអង់គ្លេសនិងអៀរឡង់ខាងជើងកាន់តែមានសុភមង្គលនិងវិបុលភាព»។
អនុប្រធានទី១ អាជ្ញាធរមីន ក៏បានបញ្ជាក់ផងដែរថា ក្នុងថ្ងៃដ៏វិសេសនេះ មិនត្រឹមតែប្រារព្ធពិធីឡើងគ្រងរាជ្យរបស់ព្រះមហាក្សត្រCharles III ប៉ុណ្ណោះទេ ប៉ុន្តែវាក៏បង្ហាញពីភាពជាដៃគូដែលស្ថិតស្ថេររវាងកម្ពុជា និងចក្រភពអង់គ្លេស។
លោកលី ធុជ បានសង្កត់ធ្ងន់ថា៖ «កម្ពុជានៅតែដឹងគុណចំពោះការគាំទ្ររបស់ចក្រភពអង់គ្លេសដែលបានផ្តល់ជំនួយមកកម្ពុជាក្នុងរយៈពេលជាច្រើនឆ្នាំកន្លងមក ហើយកម្ពុជាទន្ទឹងរង់ចាំបន្តធ្វើការយ៉ាងជិតស្និទ្ធជាមួយចក្រភពអង់គ្លេសសម្រាប់ឆ្នាំខាងមុខៗទៀតដើម្បីទំនាក់ទំនងមិត្តភាពនិងកិច្ចសហប្រតិបត្តិការជិតស្និទ្ធរវាងប្រទេសទាំង២ និងដើម្បីសេចក្តីសុខ សេចក្តីចម្រើននៃប្រជាជាតិទាំង២»។
សូមរំឭកផងដែរថា ក្នុងរយៈពេលប៉ុន្មានឆ្នាំមកនេះ ប្រទេសកម្ពុជា និងចក្រភពអង់គ្លេសបានអភិវឌ្ឍកិច្ចសហប្រតិបត្តិការល្អគ្រប់ជ្រុងជ្រោយ ដើម្បីផលប្រយោជន៍ទៅវិញទៅមករបស់ប្រជាជនទាំង២។
ក្នុងនោះដែរ ស្ថានទូតអង់គ្លេសប្រចាំនៅកម្ពុជា បានជួយក្នុងការសម្របសម្រួលដ៏មានតម្លៃក្នុងការជំរុញកិច្ចសន្ទនារវាងអាជ្ញាធរពាក់ព័ន្ធនៃប្រទេសកម្ពុជានិងចក្រភពអង់គ្លេសលើវិស័យផ្សេងៗដូចជា ពាណិជ្ជកម្ម កិច្ចការបរទេស បរិស្ថាន និងវិស័យការពារជាតិ ជាដើម។ នេះជាការថ្លែងបន្ថែមពីលោក លី ធុជ។
លោកបានបន្តថា៖«យើងក៏សូមអរគុណដល់ចក្រភពអង់គ្លេសចំពោះការគាំទ្រនិងជំនួយដ៏មានតម្លៃសម្រាប់កម្ពុជាក្នុងវិស័យអភិវឌ្ឍន៍ជាច្រើន រួមទាំងការអប់រំ សកម្មភាពបោសសម្អាតមីន ពាណិជ្ជកម្ម សុខភាព បរិស្ថាន ក៏ដូចជាការប្រគល់នូវមរតករបស់កម្ពុជាមកវិញកាលពីខែកុម្ភៈ ឆ្នាំ២០២៣ ក្នុងនោះគ្រឿងអលង្ការមាស និងលោហៈដ៏មានតម្លៃសរុបចំនួន៧៧ដុំ»។
សូមបញ្ជាក់ថា កាលពីថ្ងៃទី៦ ខែឧសភា ឆ្នាំ២០២៣ ព្រះអង្គម្ចាស់ឆាលស៍ ទី៣ (Charles III) បានឡើងគ្រងរាជសម្បត្តិនៅក្នុងពិធីរាជាភិសេកធំបំផុតរបស់ចក្រភពអង់គ្លេសសម្រាប់រយៈពេល៧ទសវត្សរ៍ និងជាការបង្ហាញព្រឹត្តិការណ៍ដ៏អស្ចារ្យមានអាយុកាលជាង១ ០០០ឆ្នាំ។
ព្រះអង្គម្ចាស់ ឆាលស៍ (Charles) បច្ចុប្បន្នមានព្រះជន្ម៧៣វស្សាជាព្រះរាជបុត្រច្បងបានឡើងសោយរាជ្យបន្តជាព្រះមហាក្សត្រចក្រភពអង់គ្លេសបន្ទាប់ពីព្រះមាតាគឺព្រះមហាក្សត្រីអេលីហ្សាប៊ែតទី២ (Elizabeth II) សោយទិវង្គតកាលពីថ្ងៃទី៨ ខែកញ្ញា ឆ្នាំ២០២២ ក្នុងព្រះជន្ម៩៦ព្រះវស្សា៕
